Read Thado Chin Thutanho 14 Bible Online

Thutanho 14 - Thado Chin bible

Thutanho 14

¹Chuin Samson chu Timnah'a achesuh-in, chule Timnah'a chun Philistine te chanuho numei khat amun ahi.

²Chuin ama ahung touvin anule apa henga aseijin, hitin ati, Keiman Timnah'a Philistine te chanuho numei khat kamui: hijeh chun amanu chu kaji dingin gapui lhonin, ati.

³Hiche phatchun anule apan ahengah, Nasopi ho chanute ahiloule kamite jouse lah-a numei umlouhel hija, cheptanlou Philistine te kichenpi ding nagot ham? atilhonin ahi. Chuin Samson'in apa henga, Amanu neipui peh-in; ajehchu amanun kalung atoh lheh-e, ati.

⁴Achuti vangin anule apan hichu Pakaiya kon ahi le, aman Philistine te douna-a phat gomkom ahol ahi chu ahelhon pon ahi. Ajehchu hiche petna chu Philistine ten Israelte chunga vai ahomu ahi.

⁵Chujouvin Samson anule apa toh Timnah'a achesuh-un, chule Timnah kho lengpi leilai ahung lhung taovin: chuin veuvin, keipi bahkai golbep khatnin ahin ngih tai.

⁶Chuin Pakai Lhagao chu thanei tah-in achunga ahung chun ahile, aman kelnou alhetel bangin, akhutna imacha choilouvin abottel tan ahi. Ahinla aman athilbol chu anule apa henga aseidoh pon ahi.

⁷Chuin ama achesuh-in, numei chutoh akihoulimin; chule amanun Samson alunglhaisah lheh-in ahi.

⁸Chuin phat chomkhat jouvin amanu puidingin ahung kilekitnin, akeipi bahkai thasa longchu ve dingin akiheijin ahile; veuvin, keipi bahkai long sunga chun khoilhah anakaijin ahi.

⁹Chuin aman akhutnin alan, alamjot pumin anen, anule apa koma ahungin, amani jong apen, chule amanin jong anelhonin ahi. Ahinla hiche khoiju chu keipi bahkai thilong sunga kona alah ahi chu anule apa aseipeh pon ahi.

¹⁰Hitichun apachu numeinu koma chun achesuh tan ahi. Chuin Samson'in chukhoma chun golvah abolin ahi; ajehchu gollhang hon hitia chu abolngai mong ahi.

¹¹Chuin ahitin ahi, amahon ama amuphatnun, ama koma umdingin loi somthum ahinpuijun ahi.

¹²Chuin Samson'in ahenguva, Keiman naheng uva thuchih khat kasei ding: hiche chu nanghon golvah nisagi sunga neihilchen theijuva, nahetdoh uva ahile, keiman nangho ponsil somthum, chule kikhelna von somthum kapeh dingu ahi.

¹³Amavang neihilchen theilouvu leh, nanghon ponsil somthum le kikhelna von somthum neipeh dingu ahi, ati. Chuin amahon ahenga, Nathuchih chu seijin, keihon ngaijuvinge, atiuve.

¹⁴Chuin aman amaho henga, Mi ne-a konin nehding ahung potnin, thahat tah-a kona thil lhumtah ahung potne, ati. Chuin amahon nithum geijin thuchih chu ahedoh thei pouvin ahi.

¹⁵Chuin nisagi nin ahitin ahi, amahon Samson jinu henga, Hiche thuchih hi eihil chetna dingun najipa jolin, achutiloule nangma le napa inhi meija kahal dingu ahi: nangman kanei hou lahpeh dinga neikouvu ham? Hiti chu hilouham? atiuvin ahi.

¹⁶Chuin Samson jinu chu ahenga akapmin, hitin aseije, Nangman nei ngailut ahipon, neihot joh ahi: Nangman kamite henga thuchih nadongin, keima neiseipeh poi, ati. Chuin aman amanu henga, Ven, keiman kanu kapa koma jong kaseilou ahin, hiche chu nangma koma kasei ding ham? ati.

¹⁷Chuin agolvah-u kibol sungse, nisagi ni chun amanu a-angsunga akapkap jengtan ahi. Chuin ni sagi nin ahitin ahi, amanun aha ngeh behseh jehchun aseidoh pehtan ahi. Chuin amanun thuchih chu amite chateho henga aseipeh tan ahi.

¹⁸Chuin ni sagi ni nisalhum masangin khopi-a cheng pasal ho chun ahenga, Khoiju sanga lhumjo ipiham? chule keipi bahkai sanga hatjo ipi ham? atiuvin ahi. Chuin aman amaho henga chun, Kabongla-a hi lou nakai louvu hile, kathuchih hi hedoh pouvin nate, ati.

¹⁹Chuin Pakai Lhagao achunga ahungchun, ama Ashkelon'a achesuh-in, mi somthum athatnin, avonhou chu ahinlan, athuchih aseidohho henga chun kikhelna von somthum chu apetan ahi. Chuin alunghan akoujah-in, apa in lama achetou tan ahi.

²⁰Chule Samson jinu chu agolpa, agolpha pena aneipa henga chun ape taovin ahi.