Read Thado Chin Thutanho 15 Bible Online

Thutanho 15 - Thado Chin bible

Thutanho 15

¹Ahinla chomkhat jouvin ahung hitin ahi, suhlou chang atlaijin, Samson'in kelnou khat apon ajinu agavilin; chule, Indan sunga kajinu henga kagalut ding ahi, ati. Ahin ajinu pa-in alutding aphalpon ahi.

²Chuin ajinu pan, Keiman najinu nahot mongmonga kangaito ahitan; hijeh-a chu naloipa kapeh ahitai. Anaonu hi ama sanga hoijoa hilouham? Nahenga katao ahi, amanu khelin kipuitan, ati.

³Chuin Samson'in amaho chungchanga hitin aseitai, Tun keiman amaho chunga mona boljong leng Philistine mihon a-engkhan eihisah thei pouvinte, ati.

⁴Chuin Samson achen sial jathum amanin, ameiju akan matnin, meisel phabep alan, amei le amei kikah-a chun akanmat pehtan ahi.

⁵Chuin meisel ho-a chun mei atih-in, Philistine te changphung dinglah-a alhalut nin ahile, changphal le changphung dinglai ho, lengpilei le Olive thing jouse geijin akamangtan ahi.

⁶Chujouvin Philistine ten, Hichehi kon abol ham? atiuve. Chuin amahon, Timnah tupa Samson bol ahi, ajehchu aman ajinu alahpeh-a aloipa apeh jeh ahi, tin adonbut uve. Chuin Philistine te ahungun, amanu chule apa chu meijin ahal lih taovin ahi.

⁷Chuin Samson'in amaho henga, Nanghon hiche nabol jeh uva hi, keiman nachung uva phu kalah ding ahi, hichu kabol chaiteng umthim bepding kahi, ati.

⁸Chuin aman amaho chu khotona beijin mitamtah athatnin; chule achesuh-in Etam songpi vuma agacheng tan ahi.

⁹Chujouvin Philistine te achetouvun, Judah gamsunga gebuh asonguvin, chule Lehi mun'a chun akithe jalun ahi.

¹⁰Chuin Judah miten, Ipi bola keiho douna-a hunga nahiuvem, atiuve. Chuin amahon adonbutnun, Samson kantum dingle, kachung uva abol bang banga achunga bol dinga hungtouva kahiuve, atiuve.

¹¹Chuphatnin Judah mi sangthum Etam molsang songpi chunga chun achetouvun, chule Samson henga, Philistine hi eiho chunga vaipo ahiuve ti nahetlou ham? Chule nangman kachunguva nabol pihi ipi ham? atiuve. Chuin aman amaho henga, Ka chunga atoh bang banguva chu keiman jong amaho chunga katoh ahi, ati.

¹²Chule amahon ama henga, Keihon nangma Philistine te khutna kapehdoh theina dinguva, nangma kantum dinga hunga kahiuve, atiuve. Chuin Samson'in ahenguvah, Nangho tah-in neitha louna dingun kahenga kihahselun,atin ahi.

¹³Chuin amahon ahenga, Ahipoi, keihon nangma kakanchah uva, amaho khutna kapehdoh dingu ahibouve; keihon nangma nathat pouvinge, atiuve. Chuin amahon amachu khao thahbet nin akanun, song chunga konchun ahin puidoh-un ahi.

¹⁴Chule ama Lehi mun ahunglhun phatnin, Philistine te chu ama dounan hatah in a-aovun ahi. Hichun Pakai Lhagao thanei tah-in achunga ahung chun ahile, akhut kikanna khaoho chu meija kihaltan abang jengin, akhutna konin akikan naho chu alhamang tan ahi.

¹⁵Chule aman Sangan khagu thahbet khat amun, hichu alan, hiche-a chun mi asang asang avolihtan ahi.

¹⁶Chuin Samson'in, Sangan khagu mangchan, athop athopmin kavolhun, Sangan khagu mangchan, mi sangkhat kathatnin ahi, ati.

¹⁷Chuin ahung hitin ahi, aman thu aseijouvin, sangan khagu chu akhutna konin apaimangin, hichemun chu Ramath-lehi asahtai.

¹⁸Chuin ama hatah-in adang chahtan, Pakai hengah ataovin, hitin ati, Nangman nasoh khutna hi hitobang lhatdohna nasatah hi napeh ahitan; tu-a hi dangchah-a kathi-a, cheptan louho khutna hi kalhuh ding ham? ati.

¹⁹Hijeh chun Pathen'in Lehi mun'a chun komtong apokehsah-in ahile, chu-a kon chun twi ahung longdoh-in; chule aman adonphatnin, alungthim ahatdoh kitnin, ahaldoh kit tai. Hijeh chun hiche mun chu En-hakkore asah tan, hichu tuni geijin Lehi mun'a aum jingin ahi.

²⁰Chuin aman Philistine te nikho laijin Israelte chunga kum somni thu anatanin ahi.