Read Thado Chin Thutanho 16 Bible Online

Thutanho 16 - Thado Chin bible

Thutanho 16

¹Chujouvin Samson Gaza'ah achen ahile numei kijoh khat amun, amanu henga chun alut tan ahi.

²Chuin Gaza mite henga, Samson hilama ahunge, ti aseipeh taovin ahi. Chuin amahon a-um na munm chu a-umkimvelun, chule jan khovah keijin khopi kotpi-a chun achanguvin, jan khovah in thipchetnin aumun, Jingkah kho ahungvah vahleh itha dingu ahi, akitiuvin ahi.

³Chuin Samson khangkimgei alumin, khangkimin athoudoh-in, khopi kotpi kotkhahle akhom tenitoh abotdoh-in, abonchan alengkouva apun, Hebron maijona um lhangvum khatna apudoh pehtan ahi.

⁴Chule hiche nung chun ahitin ahi, aman Sorak phaichama numei khat amin Delilah kitinu chu adeicha tan ahi.

⁵Chuin Philistine vaipoho chu amanu henga ahungun, ahenga, Amapa hi kakan tum uva achunga kachuh theina dingun, iti achunga tha kanei thei dingu ham ti hetdohna dingin, amapa khu anajolin lang, athahatna nasatah khu hoija umham ana hedoh-in: chule keiho mikhat cheh-in nangma dangka sangkhat le jakhat kapeh dingu ahi, atiuve.

⁶Chuin Delilah'in Samson henga, Nahenga katao ahi, nathahatna nasatah hi hoija uma hija, chule nangma suhgentheina dinga hi ipi-a naki kan dingham? neiseipeh temin, ati.

⁷Chuin Samson'in amanu henga, Ago khalou khaogui hing sagi in eikanleo, keima lhasam tangting, midangho bang bang kahi ding ahitai, ati.

⁸Hiche phatchun Philistine vaipohon chun amanu henga, ago khalou khaogui hing sagi ahinchoijun, chule amanun hicheho-a chun akanin ahi.

⁹Tun mi phabepmin ama chu achang lhiuvin, indan sunga chu amanu toh uma ahiuve. Chuin amanun ahenga, Samson, Philistine te nachunga chuding ahi taove, ati. Chuin aman khaoguiho chu patdum kipheh meija kihaltan bangin abottan jengtan ahi. Hitichun athahatna chu hetdoh ahipon ahi.

¹⁰Chuin Delilah'in Samson henga, Ven, nangman neidai chavaijin, jouvin neilheme. Tu-a hi katao ahi, ipi-a nakikan tum thei dingham? ati.

¹¹Chuin aman amanu jah-a, amahon mi kikanna khahlou khao thahbet-a eikan leu, kalhahsam ding ahitan, chuteng midangho bang bang kahi ding ahitai, ati.

¹²Hitichun Delilah'in khao thahbet alan, Samson chu akanin, ajah-a, Samson, Philistine te nachunga chuding ahitaove, atin ahi. Chule mi phabepmin indan sunga achanlhih jingu ahi. Chuin aman hicheho chu patjang kibot tan bangin akhutna konin atumtan tan ahi.

¹³Chuin Delilah'in Samson henga, Tuni geihin nangman neidai chavaijin, jouvin nei lheme: ipi-a kikan ding nahim, neihilin, ati. Chuin aman, Nangman kalua kasam pheh sagi hi hehkople chun, ati.

¹⁴Chuin aman ahehkopmin akildet chetnin, ahenga, Samson, Philistine te nachunga chuding ahitaove, ati. Chuin ama a-imutna konin athoudoh-in, asam lom kihehkop leh akilna chu abotdoh tan ahi.

¹⁵Chuin amanun ahenga, Nalungsung keima koma umlouva, nangman kalungsetne iti neitithei ham? Nangman hiche thumvei neidai chavaijin, nahatna nasatah hi hoilaija umham neiseipeh poi, ati.

¹⁶Chuin ahitin ahi, amanun aniseh-a angah jinga, adoh jing phatnin, amapa thiding khopmin alung gimtan ahileh;

¹⁷Hichun alungthim jouse amanu henga aseijin, hitin ati, Kalu chunga samchem kipan khalou ahi; ajehchu keima kanu oisunga patna Pathen'a dinga Nazir mi kahi. Kasam akivo chaija ahile kahatna keija kona chemanga, kalhahsam ding, midangho bang bang kahiding ahitai, ati.

¹⁸Chuin Delilah'in amapan ahenga alungsunga um jouse aseidoh chu amuphatnin, Philistine vaipoho koudingin mi asolin, ajah uva, Khatvei hungtou kitnun, ajehchu aman alungsunga um jouse eiseipehtai, ati. Chujouvin Philistine vaipoho chu ahungun, akhutnuva sum jong ahin choijun ahi.

¹⁹Chuin amanun amapa chu apheipi chunga alupsah-in a-imutsah-in; asam voudingin mi akouvin, alua lom sagi-a asam kikan chu avolhah pehtan ahi. Chuin amanun asugim panin, chule athahatna chu ama-a konin achemang tan ahi.

²⁰Chuin amanun, Samson, Philistine te nachunga chuding ahi taove, ati. Chuin ama a-imutna-a konin ahung thouvin, chule, Nidang bangin chedoh ingting, kithing lhange ati. Ahinla Pakaiyin ama adalhah chu ahepon ahi.

²¹Ahinla Philistine ten amanun, amit teni akaldoh-un, Gaza'a apui lhaovin, sum-eng henkol abupeh-un; songkul inna sumhei goijin apangtai.

²²Ahinla alu-a asam chu akivotol nungin ahung khangpan kit tan ahi.

²³Chujou phatnin Philistine vaipoho chu a-pathenu Dagon henga kilhaina loupitah bola, kipa thanop boldingin akikhom khom taovin ahi. Ajehchu amahon, I-pathen'u hin imelmapao Samson hi ikhutnuva eipehdoh-u ahi, atiu ahi.

²⁴Chuin mipin ama amuphatnun a-pathen'u chu avahchoijun ahi. Ajehchu amahon, I-pathen'un imelmapao, chule eiho tamtah eithatnuva, igamsungu sumangpa hi ikhutnuva apehdoh ahitai, atiuve.

²⁵Chuin ahitin ahi, amaho alungthimu akipa phat chun, Vetnom um eibolpeh diuvin Samson gakouvun atiuvin ahi. Chuin amahon songkul in'a konchun Samson agakouvun, chule aman amaho dingchun vetnom um abolpehtai. Chuin amahon amachu khom lentah ni kah-a adinsah-un ahi.

²⁶Chuin Samson'in akhut kaile-a pang chapangpa henga chun, Inpi kingapna khom teni chu kaki ngainadin neituh sah-in, ati.

²⁷Tun in chu numei le pasal dimsetna ahin, chule Philistine vaipoho jouse chu umsoh keijuva; Chule in chunga chu Samson vetnom um bol vedinga numei pasal mi sangthum jen uma ahiuve.

²⁸Chuin Samson Pakai henga ataovin, Vo Pathen, Philistinte chunga khatvei sehseh kamit teni asuhchotnao phu kalah theinadin; Vo Pakai Pathen, katao ahi, neigel doh-in, chule katao ahi, tu khatvei sehseh hi katha hatsah-in, ati.

²⁹Chuin Samson'in inpi douva pang, alaija inpi kidouna khomteni chu atuh-in; chule khatna chun akhut jetlam angamin, khat joh-a chun akhut veilam angamin ahi.

³⁰Chuin Samson'in, Philistine mite hito thitha tange, atin ahi. Chuin aman athahat jouse-a asonin ahile, inpi chu vaipoho jouse le asunga umho jouse chunga chun achimtan ahi. Hitichun hiche athinia amitha chu ahinlaija atha sangin atamjon ahi.

³¹Chujouvin asopitele apa insung mite ahungsuh-un, along chu alauvin, ahin potouvun, Zorah le Eshtaol kikah-a apa Manoah lhankhuh-a chun avui taovin ahi. Aman Israelte chunga kum somni thu anatanin ahi.