Read Thado Chin Thutanho 17 Bible Online

Thutanho 17 - Thado Chin bible

Thutanho 17

¹Chule Ephraim molsanga chun Micah kiti mikhat aumin ahi.

²Chuin aman anu henga, Nangma-a kona dangka shekel sangkhat le jakhat kiladoh, nana gaosap khum, chule keima jah-a jong nanasei chu, ven, hiche dangka chu kakoma aume; keima lah ahi, ati. Chuin anun, Kachapa, Pakaiya phattheiboh changin, ati.

³Chuin aman anu koma dangka shekel sangkhat le jakhat chu anungpeh phatnin, anun ahenga, Milim kilha le kikheng semna dinga keiman kakhutna kon kachapa dinga dangka chu Pakaiya kapehdoh ahitai: hijeh-a chu tu-a hi nangma koma kapehdoh ding ahi, ati.

⁴Ahivangin sum chu anu henga alepeh-in ahi. Chuin anun dangka shekel jani chu alan, dangka khengpa apen ahile, aman hiche-a kon chun milim kilha le milim kikheng asemin; chule hicheho chu Micah in'a umin ahi.

⁵Chule Micah kitipa chun pathen ho inkhat aneijin, thempu boitong sangkhol le milim houna asemin, chule achapate lah-a khat chu athenso-in, amachu thempun apangin ahi.

⁶ Hiche laichun Israel ten leng aneipouvin, ahinla mijousen ama mitna dih asah chanchu aboljengu ahi.

⁷Chule Judah gam Bethlehem'a kon Judah insungmi gollhang khat aumin; ama chu Levi mi ahin, chule chukoma chu khopema ahi.

⁸Chule hichepa chun chen nading mun amu muna-a cheng dingin Judah gam Bethlehem khopi chu ahin dalhan ahi. Chuin ama akholjin lena lamin, Ephraim molsanga um Micah in chu ahung lhungin ahi.

⁹Chuin Micah'in amapa henga, Hoija kona hung nahim? ati. Chuin aman ahenga, Keima Judah gam Bethlehem'a kon Levi mi kahin, chule chen nading mun hola kholjin le-a kahi, ati.

¹⁰Chuin Micah in ahenga, Keima toh chengkhomin, chule keima dingin pa le thempu-in pangin, chule keiman kumkhatna dangka shekel som, von tokhat, chule nehle chah kapeh ding ahi, ati. Hitichun Levi mipa chu achengtai.

¹¹Chule Levi mipa chu mipatoh umkhom dingchu anomtan, chule gollhangpa amapa dingchun achapa khat tobang ahitan ahi.

¹²Chuin Micah chun Levi gollhangpa chu athenson, chule gollhangpa chu athempun apangin, Micah in'a chun aumin ahi.

¹³Chujouvin Micah'in, Tun Levi mikhat thempu-in kaneitan, Pakaiyin kachunga thilpha abolding ahi ti kahetai, ati.