Read Thado Chin Thutanho 18 Bible Online

Thutanho 18 - Thado Chin bible

Thutanho 18

¹Hiche nikho laichun Israelte lah-a leng aumpoi. Chule hiche nikholai machun Dan mite chenna ding gam aholun ahi; ajehchu hiche nikho geija chu Israelte phung lah-a amaho gamlo ding aumloulai ahi.

²Chuin Dan chate chun aumnao mun Zorah le Eshtaol kho-a konin a-insungmiu pasal hangsan cheh mi nga gam velhi dingle gamhol dingin asolun; ajah uvah, Cheovinlang gamchu gakholun, atiuve. Hichun Ephraim molsanga um Micah in'a chun aga lhungun, hia chun ageh taovin ahi.

³Amaho Micah in'a aumlaijun, amahon Levi gollhangpa chu a-awso-a konin aheuvin; aheng lama akiheijun, ajah-a, Kon hikoma hi nahin puilut ham? Chule hikoma hi ipi nabol ham? chule hikoma hi ipi naneijem? atiuve.

⁴Chuin aman ahenguvah, Micah'in hiti khati hin eibolin, eigoijin, chule athempua kapan ahi, ati.

⁵Chuin amahon ahenga, Nahenga kataovu ahi, kachenao lampia hi kakhantou kakhantou lou dingu kahet theina diuvin, Pathen neidoh peh-un, atiuvin ahi.

⁶Chuin thempupa chun ahenguvah, Lungmong tah-in cheovin, Pakaiyin nachenao lampia naumpi naove, ati.

⁷Chujouvin mi ngaho chun akipat doh-un, Laish kho-a ahung lhungun, hichea chengho Sidon miho bang banga-a chamdela, mongtah le bit keija achenu chu amuvin; chule hiche gama chun ipi lama hijongle ajachatnau boldoh pehding lamkai aneipouvin ahi. Chule amaho Sidon mite-a konin agamlauvin, chule koimato jong kigui jopna anei pouvin ahi.

⁸Chuin amaho Zorah le Eshtaol'a sopite henga ahungun: chule asopiho chun ahenguva, Ipi seithei nanei uvem? atiuve.

⁹Chuin amahon, Amaho doudinga ikontou theina dinguvin, kipat un: ajehchu keihon gamchu kagam'u uvin, chule veovin, gamphatah ahi. Ima nabol got louvu ham? Chu gama cheding le galut ding chule galo ding thase hih-un.

¹⁰Nangho nache tengule, mongtah-a cheng miho kom le gam lentah nalhun dingu ahi. Ajehchu Pathen'in leisetna thil um jouse lhahsam louna mun chu nakhut uva napeh-u ahitai, atiuve.

¹¹Chuin Zorah le Eshtaol kho-a konchun Dan insung mite mi jagup chu manchah pumin ahung kondoh-un ahi.

¹²Chuin amaho achetouvun, Judah gam Kirjath-jearim'a gebuh asongtaove. Hijeh chun hiche munchu tuni geijin Mahaneh-dan asah-un ahi. Veovin hichu Kirjath-jearim nunglama uma ahi.

¹³Chuin amaho chua konchun Ephraim molsang lam ajonun, Micah in ahung lhung taovin ahi.

¹⁴Chujouvin Laish gam velhia che mi ngaho chun adonbutnun, asopiho henga, Nangho hiche inho-a hi thempu boitong sangkhol, milim ho, milim kilhah le, milim kisoltho aume ti nahet uvem? Hijeh chun tun ipi nabol dingu ham ngaitouvin, atiuve.

¹⁵Chuin amaho chulama chun akiheijun, Levi gollhangpa umna in, Micah in geija chun ahungun, ama chu chibai aboh-un ahi.

¹⁶Chule Dan insungmi galvon kivona mi jagupho chu kotpi-a chun adinguvin ahi.

¹⁷Chuin gam velhia mi nga chu ache touvun, hilama chun ahung lutnun, milim kisemthu, boitong sangkhol, milimho, milim kilhajolho chu alauvin, chule thempupa chu galvonna kivon mi jagup ho toh kotpi phunga chun adingun ahi.

¹⁸Chuin amaho Micah in'a acheuva, milim kisemthu ho, thempu boitong sangkhol, milimho, akisoltho milim ahin lah-u chun, thempupan amaho henga , Ipi bola nahiuvem? ati.

¹⁹Chuin amahon ahenga, Thipbeh-in, nakhutnin nakam kihupmin lang, kanungu hinjuijin, chule keiho dingin pa le thempu-in pangin. Nangma dinga mi khatseh insunga thempu-a panding phajo-am, ahiloule phung khat le Israel insung khat chunga thempu-a pan phajo-am? atiuve.

²⁰Chuin thempupa lungsung chu akipah lheh-in, thempu boitong sangkhol, milimho, chule akilhahtho milim chu alan, mipi lailunga chun achetan ahi.

²¹Hitichun amaho akiheijun, akipat doh-un, chule amasanguva chapangho le ganchaho achesah-un ahi.

²²Chule Micah in'a kona gamla thimtah agei phatnun, Micah invela miho chu akikhom khomun, Dan miho chu adelpha taovin ahi.

²³Chuin amahon Dan chate chu agah samun ahi. Chuin amaho Micah heng lama chun akiheijun, ahenga, Ipin nabola hitobang mihonpi toh nahung ham, atiuve.

²⁴Chuin aman, Nanghon keiman kakisem ka-pathen le kathempu nakilah uvin nachemang taove. Chule ken idang kanei nahlai ham? chule nanghon kahenga, ipin nabol ham, natiu chu ipi nasei nao ham? ati.

²⁵Chuin Dan chate chun ahenga, Kalah uva na awgin kijah sah hih-in, achuti loule alunghangho nachunga hung chuntin, nahinkho le na-insung pumpi manlo ding ahi, atiuve.

²⁶Chuin Dan chate chu alampiuva achemang taove, chule Micah'in amaho chu ama dinga ahatvalu chu amu phatnin, akinunglen a-in lama achetai.

²⁷Chuin amahon Micah thilsemho le athempupa chu ahin laovin, mongtah le bitkeija cheng mite umna Laish kho chu ahunglhung taove. Chuin amahon amaho chu chemhemin athatnun, khopi chu ahallha taove.

²⁸Amaho Zidon'a kona gamlatah ahijeh ule, koimatoh kiguijop lou ahi jeh-u chun ahuhdoh dingu koima aumpon ahi. Hichu Beth-rehob koma phaichama uma ahi. Chuin amahon khopi khat asaovin, chua chun acheng taove.

²⁹Chuin akhopi semu chu Israel'a dinga hungpenga apau Dan min aput sah-un, Dan asah taove. Ahivangin khopi minchu amasa Laish anahin ahi.

³⁰Chuin Dan chate chun semthu milim atungdoh-un; agamu chu sohchanga ache kahseuvin Manasseh chapa, Gershom chapa, Jonathan le achateho chu Dan phunga thempun apanguvin ahi.

³¹Chuin amahon Micah'in asemthu milim chu atungdoh-un, hiche phatsungse chu Pathen in chu Shiloh-a aumin ahi.