Read Thado Chin Thutanho 19 Bible Online

Thutanho 19 - Thado Chin bible

Thutanho 19

¹Chuin hiche nikho laichun ahung hitin ahi, Israelte lah-a leng aumlou laichun, Ephraim molsang panga chun Levi mikhat ana khopemin, ama chun Juda gam Bethlehem'a konin thaikem khat akipuijin ahi.

²Chuin ama thaikemnu chu ama dounan noti'n apangin, chule ama-a konin achedoh-in Juda gam Bethlehem'a apa in'a chun achen, chua chun lhali aga umin ahi.

³Chuin a-inneipu chu amanu kamdama kihoupi ding le hin nungpui kit dingin akipat doh-in, asoh khat le sangan kopto akipuijin, anung ajuijin ahi. Chuin amanun amapa chu apa in'a ahin puijin; chule nungahnu pa chun amapa amuphatnin kipah tah-in alamton ahi.

⁴Chuin anupa-pa, nungahnu pachun, amapa chu a-umsah-in; chule amapa jong ama chutoh nithum aumkhomin ahi. Hitichun mahon aneuvin, adonun, chule chu-a chun ageh-un ahi.

⁵Chuin nili chanin ahung hitin ahi, jingkah matah-a ahung thodoh doh-un, amapa che dingin akipatdoh tan ahi. Hichun nungahnu pa chun achanu jipa henga, Changlhah themkhat beh nenlang nalung suhal photnin, chujou tengle chenan nate, ati.

⁶Chuin amani atou lhonin, anekhom, adonkhom lhonin ahi. Ajehchu nungahnu pa chun mipa henga chu, Katao ahi, lunglhai selin umin, tujan khongaijin lang, nalungthim kipasah-in, atin ahi.

⁷Chuin mipa chu chedinga akipatdoh phatnin, anupa-pa chun alho lhon ahile, amapa aumkit tai.

⁸Chuin ani nga ni jingpi tah-in amapa chedingin ahung thoudoh-in ahile, nungahnu pa'n ahenga, Katao ahi, nalung suhal tadin, ati. Chuin amani nisa akihei geijin akhongai lhonin, chule amanin anekhom kit lhonin ahi.

⁹Chule mipa chu ama, athaikem, chule asohpa toh chedinga ahung kipatdoh phatnin, anungahnu pa chun ahenga, Ven, tuhi nilhah hiding ahitan, kangeh nahi, tujan khongai nalaijun: ven, nikho kichai ding ahitai, nalungthim kipana dingin hilaija hin geh maijun; chule jingle in nalhun theina dingin, jingpitah le najotna ding jonnan nate, ati.

¹⁰Ahinla mipa chu khongai ding anompon, hijeh chun akipat doh-in achen, Jebus maijon ahung lhungtan, hichu Jerusalem ahi. Chule akoma sangan ni apho lhingset toh, athaikemnu aumin ahi.

¹¹Chuin amaho Jebus kom ahung lhunun, nikho chu beiding ahitan; asohpa chun apu henga, Katao ahi, hungin, Jebus miho khopi-a hin lutnu hitin, gehtao hite, ati.

¹²Chuin apupan ahenga, Eiho Israel chate-a hilou, hetkhahlou miho khopi-a ilut loudingu ahi; Gibeah kho geija cheu hite, ati.

¹³Chuin asohpa henga, Hungin, Gibeah ahiloule Ramah khatjoh joh naiju hitin, jan geh-u hite ati.

¹⁴Chuin amaho acheuvin, alamjot ajomun; chule Benjamin mite kho Gibeah kom alhunun, nisa alhumtan ahi.

¹⁵Chuin amaho hilama chu lutding le Gibeah'a chu geh dingin akihei lutnun ahi. Chuin ama alutphatnin, khopisung lamlen khatna atoutan ahi. Ajehchu amaho puiding le a-in'a lhunsah ding koimacha umlouva ahi.

¹⁶Chuin veuvin nilhah ahiphatnin, tehsepu khat alou kona-a konin ahungin, ama jong chu Ephraim molsanga kon ahin; Gibeah'a khopem ahi: ahivangin chuche mun'a cheng miho chu Benjamin mi ahiuve.

¹⁷Chuin ama agah khodah-in ahile, khopi lampi-a tou kholjin mipa chu amun; chuin tehsepun ajah-a, Hoija cheding nahiuva? chule hoilama hungkon nahiuvem? ati.

¹⁸Chuin aman amapa henga, Keiho Juda gam Bethlehem'a kon Ephraim molsang jonding kahiuvin, keima chu mun'a kon kahi. Keima Juda gam Bethlehem'a gache-a kahin, ahin tu-a hi Pakai in'a cheding kahi; chule koiman a-in'a eilhunsah ding aumpoi.

¹⁹Ahin hikoma hin changpol le ka sangan hou dinga ngaikhoh ho aumin, chule keima ding le kasohnu ding, chule nasohpan alhonpi gollhangpa dingin lengpitwi le changlhah jong aumin ahi, imacha alhasam beihela uma ahi, ati.

²⁰Chuin tehsepun, Lungmong tah-in umun; hijongle nadei jouseu keima chunga ngamun lang, lamlhonga vang geh hih beh-un, ati.

²¹Hitichun tehsepu chun amapa chu a-in'a apuilutnin, a-sangan teni chu nehding apen; chule amahon akengu akisilun, aneovin adonun ahi.

²² Chuin amaho alungsungu akipa laitah-un, veuvin, khopi miho phabep, Belial chapa phabep chun aumnao in chu aum kimvelun, akot chu achumun, chule a-inneipa tehsepu henga chun, Na in'a lhungpa chu kaki timatpi dingun hinpui doh-in, atiuvin ahi.

²³Chuin mipa, a-inneipa chu ahenguva achedoh-in, ajah uva, Ahipoi, kasopiho, ahipoi, naheng uva katao ahi, hitilom hin khangse hih-un; hiche mipa hi ka in'a hung ahi namu jeh uvin, hiche ngol hoitah hi bolhih-un.

²⁴Veovin, hikomahin kachanu nungah khat le thaikemnu aume; keiman amani hinpui doh ingting, nanghon amanichu noinep munlang, achung lhona pha nasah sah-u chu boljeng uvin: hichepa chunga vang chutobang thilse chu bol hih-un, ati.

²⁵Ahinla miho chun ama thusei chu ngaisah-in aneipeh pouve. Hitichun mipa chun athaikemnu chu apuijin, amaho henga chun ahin puilut tan ahi; chuin amahon amanu aluppiuvin, jan khovah jingkah geijin akichep naovin ahi. Chuin jingkho ahung vah phatnin, amanu asolmang taove.

²⁶Chuin thingjang ahungvah phatnin numeinu chu ahungin, apupa umna mipa kotphunga chun alhun, khovah lhah kahsen hia chun aumtan ahi.

²⁷Chuin jingkah-in a-pakaipa athouvin, inkot chu ahongin, achena ding lampia chu che dingin apotdoh-in ahile; veuvin, athaikem numeinu chu kotbula chun analhun, chule akhut teni chu kotbula ana kingamin ahi.

²⁸Chuin amapan ahenga, Thouvin, chetaohite ati. Ahin adonbut tapoi. Hichun mipan amanu chu a-sangan chunga adomdoh-in, amajong atoudoh-in, achena dinga achetai.

²⁹ Chuin amapa a-in alhun phatnin, chemcha khat alan, athaikemnu chu atuh-in, agutoh pumin a-at khen khenin, tum somleni ason, chuin Israel gam pumpi-a athot tai.

³⁰Chuin ahitin ahi, hiche mujouse chun, Israel chate Egypt gama kona ahung potdoh uva pat tuni chan geihin hitobanghi akibol khapon, mujong akimu khapoi. Hichehi ngaitouvin, thuhilna lauvin lang, nalungthimun thu seijun, atiuve.