Read Thado Chin Thutanho 2 Bible Online

Thutanho 2 - Thado Chin bible

Thutanho 2

¹Chuin Pakai vantil khat Gilgal'a konin Bochim'a ahungtouvin, hitin aseije, Keiman Egypt'a konin kapotdoh sah-in, napu napateu kahahselna gamsunga kahin puilutnin; chule keiman kanaseijin, Nang hotoh kakitepna imatih-a jong kasukeh louding ahi.

² Chule nangho hiche gama cheng miho toh kijop matna naneilou diu; amaicham nasuhchim pehdiu ahi kanati. Ahinla nanghon ka aw nangaipouve. Ibola hiche hi nabolu hitam?

³Hijeh chun hiti jonghin kaseije, Namasanguva kona amaho kadeldoh louding; amavang amaho chu naveluva ling banga umdiu, chule a-pathen houchu nangho dinga thang hiding ahiuve, ati.

⁴Chuin ahitin ahi, Pakai vantil chun Israel chate jouse henga hiche thu asei pet chun, amaho awsang tah-in akap taovin ahi.

⁵Chuin amahon hiche mun minchu Bochim asah-un; chule chukoma chun Pakai henga kilhaina abolun ahi.

⁶Chuin Joshua'n mipi ho chu alhadoh phatnin, Israel mite amichangcheh chu agamu lodin a-inlam cheh uva ache taovin ahi.

⁷Chuin miho chun Joshua hinlaise le, Israelte dinga Pakai natoh loupitahho anamu-a Joshua sanga hingsot upaho hinlaise chun Pakai chu ajenun ahi.

⁸Chuin Pakai lhacha Nun chapa Joshua chu kum jakhatle somkhat alhin phatnin athitan ahi.

⁹ Chuin amahon Gaash sahlam Ephraim molsanga um agoulo Timnath-heres gamgi-a chun avuitaovin ahi.

¹⁰Chuin chuche khang miho jouse jong chu apu apateu toh gopkhomin aumgam taovin; chule amaho nungin Pakai helou, chule Israelte dinga anatohho hephalou khangchom ahung umdoh tan ahi.

¹¹Chuin Israel chate chun Pakai mitmun thilse abolun, Baal ajenun ahi.

¹²Chule amahon Egypt gama kona hinpuidoh-a apu apateu Pakai Pathen chu adalhaovin, aveluva um mihemho pathenho lah-a pathen dangho chu ajuijun, hicheho anga chun aboh khupmun, Pakai chu alunghansah taovin ahi.

¹³Chule amahon Pakai adalhaovin, Baal le Astaroth chu ajen taovin ahi.

¹⁴Hichun Pakai lunghanna chu Israelte chunga ahung soudohtan, amaho achomgam hou khutna chun achomgam dingun apedohtan; chule amaho agal miteu masanga adin joulou nadingun, aveluva um agal miteu khutna ajohdoh tan ahi.

¹⁵Pakaiyin aseibang le amaho chunga akihahselna bangchun, achedohna chanuva Pakai khut chu amaho dounan aphalou lama achun; amaho nasatah-in agenthei taovin ahi.

¹⁶Ahivangin Pakaiyin thutan ho atundoh peh-in, amaho chun achomgam hou khutna konin ahuhdoh jiuvin ahi.

¹⁷Ahijeng vangin amahon athutanhou thu chu angai pouvin, pathen dangho nung juijun noti'n apangun, a-anguva aboh khupmun ahi. Amaho apu apa teovin Pakai thupeh angaijuva achenau lampia konchun gangtah-in akihei mangun, hibang chun abolpouvin ahi.

¹⁸Chuin Pakaiyin thutan ho atundohpeh phatnin, Pakaiyin thutan ho aumpin, thutan ho nikholaisen agalteu khutna konin ahuhhingin ahi. Ajehchu amaho suhgenthei le bol hesoh-a aum uva apen pennao jehchun Pakaiyin alung aheitan ahi.

¹⁹Chule ahitin ahi, thutanpa athi phat phatle amaho akilehei jiuvin, pathen dangho chu jending le a-anga bohkhup dingin apu apateu sangin abohjo jiuvin; acham tah uva anatoh uva konle, alouchal uva konin atang deh pouvin ahi.

²⁰Chuin Pakai lunghana chu Israelte chunga ahung soudoh-in, hitin aseije, Hiche mite hin apu apateu henga thupeh kanapeh kakitepna asuhkeh uva, chule kathu angailou jeh-un,

²¹Keiman jong Joshua athia adalhah namhohi amasanguva kona khatcha kadeldoh louding ahi.

²²Chutia chu amaho-a kona hi, apu apa teovin anajui banguva Israel ten Pakai lampi chu ajuijuvem ajuihih uvem kaphotchet ding ahi, ati.

²³Hichejeh-a chu Pakaiyin hiche namho chu mangang tah-a delmang louva akoija, chule Joshua khutna jong ana pehdoh lou ahi.