Read Thado Chin Thutanho 20 Bible Online

Thutanho 20 - Thado Chin bible

Thutanho 20

¹Chujouvin Israel chate jouse chu Dan'a pat Beersheba changei, chule Gilead gamsunga konin jong achedoh-un, mihonpi chu mikhat bangin Pakai ansung Mizpeh mun'a akikhom khomun ahi.

²Chuin mipi jouse lamkaiho, Israel phungho chu Pathen mite kikhopna-a chun apangun, chemjam lamthei cheh kenga kalsong sepai sangjali ahiuvin ahi.

³(Hichun Benjamin chaten Israel chate chu Mizpeh'a achetou uve ti ajataovin ahi.) Chuin Israel chaten, Iti dana hitobang gitlouna natoh hi sohdoh-a ham? neisei peh-un, atiuve.

⁴Chuin Levi mipa, akithat numeinu jipa chun amaho adonbutnin, ahenguva, Benjamin miho khopi Gibeah'a chun keima le kathaikemnu jan gehdingin kahung lhonin ahi.

⁵Hichun Gibeah miho keima dounan ahung kipat doh-un, jan-in kaumna in aum kimvelun, thadingin eigouvin: kathaikemnu hunamin abolun ahile, athilotan ahi.

⁶Chuin keiman kathaikemnu chu kahin pon, kasat tel telin, chule Israelte chenna gamtina kathot kimvel tai. Ajehchu amahon Israel sunga thet umtah jonthanhoi le ngol hoitah na atong doh-un ahi.

⁷Veovin, nangho nabonun Israel chate ngen nahiuve: hikoma hin nathuhilu le nathumop mu neipeuvin, ati.

⁸Chuin mipi jouse chu mikhat bangin akipat doh-un, Eiho khatcha iponbuh uva ichelouhel diu, khatcha i-in'uva iche louhel dingu ahi.

⁹Ahin eihon tu-a hi Gibeah chunga ibol dingu chu hiche hi ahi: vang kivet dungjuija amaho doudinga ikon tou dingu;

¹⁰Chule amaho Benjamin te khopi Gibeah'a alhun tengule, amahon Israel sunga ngol hoitah aboldoh banguva chu achunguva na atoh theina dinguvin, eihon Israel phung jouse-a kona mipite an thah dinga, mi jakhat lah-a kon som, sangkhat lah-a kona jakhat, chule sangsom lah-a kon sangkhat ilhendoh dingu ahi, atiuvin ahi.

¹¹Hitichun Israel mite jouse khopi douna chun mikhatseh bangin akipunkhom taovin ahi.

¹²Chuin Israel phungho chun Benjamin phungho jouse henga mi asolun, Nalah uva kibol hitobang khangitlouna hi ipi hitam?

¹³Hichejeh chun tun keihon amaho chu katha uva, Israel lah-a kona gitlounahi kasuhmang nadingun hiche miho, Gibeah'a um Belial chate chu neipedoh-un, atiuve. Ahinla Benjamin chaten asopiho Israel chate thusei chu ngaisah-in aneipeh pouvin:

¹⁴Amavang Benjamin chate chu Israel chate satdingin, akhopi houva konin Gibeah khopi-a chun akikhom khomun ahi.

¹⁵Chule hiche pettah-a chun Gibeah a chengho lhentum cheh jasagi tilouvin, Benjamin chate chu akhopihou jouse-a konin chemjam lamthei mi sangsomni le sanggup aumin ahi.

¹⁶Hicheho lah-a chun lhentum cheh veikolong mi jasagi aumun; chule amaho chun samjangte geija khel louhela sepkha thei cheh ahiuve.

¹⁷Chule Israel mite chu Benjamin simlouvin chemjam lamthei cheh mi sangjali ahiuvin; amaho hi abonuva galhang cheh ahiuve.

¹⁸Chuin Israel chate chu akipat doh-un, Pathen in lama chun ache touvun, Pathen'a konin thumop angeh-un, Keiho lah-a Benjamin chateho toh kisat dinga koipen kachetou masah ding ham? atiuve. Chuin Pakaiyin, Judah chetou masa ding ahi, ati.

¹⁹Hitichun Israel chate chu jingkah-in athou doh-un, Gibeah dounan gebuh asong taovin ahi.

²⁰Chuin Israel miho chu Benjamin to kisatdin akondoh uvin; chule Israel chate chu amaho toh kisat dingin Gibeah'a chun akigoltoh taovin ahi.

²¹Chuin Benjamin chate chu Gibeah'a konin ahung potdoh-un, hiche nikho chun Israel mite sangsomni le sangni jen tolla asat chapmun ahi.

²²Chuin Israel mite chu akitil khouvun, amasani-a akigolna mun mama uva chun galsat dingin akigolkit taovin ahi.

²³(Chuin Israel chate achetouvun, nilhah geijin Pakai angsunga akapmun, Pakaiya kon thumop angeh-un, Kasopipa Benjamin chate douva kisatpi dinga kachetoukit ding ham? atiuve. Chuin Pakaiyin, Agakisatpi din kontouvin, ati.)

²⁴Chuin anikho ni channin Israel chate chu Benjamin chate dounan ahung nailut kit taovin ahi.

²⁵Chuin anikho ni chanin Gibeah'a konin Benjamin amaho doudingin ahungdoh-in, Israel chate sangsom le sang get chu tolla asat chapmun ahi; amaho chu abonchauva chemjam lamthei cheh ahiuve.

²⁶Hiche phatchun Israel chate, chule mi jouse chu ache touvun, Pathen in'a ahungun, akapmun, chule Pakai angsunga atouvun, hiche nikho chun nilhah geijin an angolun, chule Pakai angsunga chun govam thilto le chamna thilto atoh-un ahi.

²⁷Chuin Israel chaten Pakai adongun, (ajehchu hiche nikho laija chu Pathen thulhun thingkhong chu hikoma chu uma ahin,

²⁸Chule hiche nikho laichun Aaron chapa Eleazar chapa Phinehas chu a-angsunga chun adingjin ahi), Kasopipa Benjamin chate douva kisatpi dinga kachekit ding ham? atiuve. Chuin Pakaiyin, Kontouvin, ajehchu jingle amaho khu nakhutna kapehdoh ding ahi, ati.

²⁹Chuin Israel ten Gibeah kimvela changpang ding akoigu taovin ahi.

³⁰Chule anithum channin Benjamin chate sat dingin Israel chate akontouvun, nidanga bangin Gibeah'a kidou dingin akigolkit taovin ahi.

³¹Chuin Benjamin chate chu mipi ho dou dingchun ahungdoh-un ahile, khopi-a konchun agamlha taovin ahi. Chule nidang bangin miho chu asatnun, Pathen in chetouna lamlhong le Gibeah jotna loujao lah-a chun Israelte mi somthum tobang athatpan kit taovin ahi.

³²Chuin Benjamin chaten, Amasa bangin imasanguva tha-in aumkit taove, atiuve. Ahinla Israel chate chun, Eiho jamuhitin, khopi-a konin lamlhonga puidoh uhite, atiu ahi.

³³Chuin Israel miho jouse chu apanmun cheh uva konin ahung kipatdoh uvin, amaho le amaho Baal-tamar'a akigolun; chule Israel chate changpanga pangho chu aumnao Gibeah phaichama konin ahungdoh-un ahi.

³⁴Chuin Israel mipi lah-a konin kilhengdoh mi sangsom ho chu Gibeah dou dingin ahungdoh-un, chule gal kisat chu anasa lheh-in ahi. Ahivangin Benjamin miho chun achunguva manthah na akomchaova aume ti ahepouve.

³⁵Chuin Pakaiyin Benjamin chu Israel masanga agal lel sahtan; chule hiche nikho chun Israel chaten Benjamin mite chu sangsomni le sangnga le jakhat athatnun; amaho chu chemjam lamthei cheh ahiuve.

³⁶Hitichun Benjamin chaten agal lel'u chu amutaovin ahi. Ajehchu Israel miho chun Gibeah pama changpang akoihou chu atahsan jeh uva, Benjamin miho dinga chu mun a-otnu ahi.

³⁷Chuin changpangho chun kinotah-in Gibeah chu adel khumun; chule changpangho chu akihom khenun, khopi sunga chengho jouse chu chemjamin athat gamtaovin ahi.

³⁸Tun Israel miho leh changpangho chun akah uva melchihna khat aneiju ahin, hichu khopi-a kona meikong nasatah le meikhu ajamdohsah dingu ahi.

³⁹Chutichun Israel mite chu agalsat naova kona akicholnga kahlah-un, Benjamin miho chun ahin nokhumun, Israel mi somthum tobang athatnun ahi. Ajehchu amahon, Amahohi kisatna masa-a banga imasanguva gallel kit ahi taove atiu ahi.

⁴⁰Ahinla khopi-a kona meikong leh meikhu khompi banga ahung kitundoh phatnin, Benjamin miho chu akinung heijun aveovin ahile, veuvin, khopi-a kon meikong chu van geijin akikho touvin ahi.

⁴¹Chuin Israel miho ahung kinunghei kitnun ahile, Benjamin mihon kidang asaovin ahi; ajehchu amahon achunguva manthah na ahung lhungtai ti amuvin ahi.

⁴²Hijeh chun amaho Israelte masang chun akinung heijun, gamthip lama ajam taove; ahinla gal kisatchun apha paovin, khopi-a kona hungdoh hochun alah tah uva konin asumangun ahi.

⁴³Hitichun Benjamin miho chu aumkolun, adelun, Gibeah maijon nisona lam geijin bailam tah-in kengin achilun ahi.

⁴⁴Chuin Benjamin miho chu sangsom le sangget athiuvin; abonchauvin mihangsan jeng ahiuve.

⁴⁵Chuin amaho akiheijun gamthip Rimmon songpi lama ajam taovin ahi. Chuin amahon lamlhonga chun mi sanga athatnun, chule Gidom geijin hatah-in anung adelun, mi sangni athatnun ahi.

⁴⁶Hitichun chuche nikho-a Benjamin mite athi jat chu chemjam lamthei cheh mi sangsomni le sangnga ahin; amaho abonchauva mihangsan cheh ahiuve.

⁴⁷Ahin mi jagup hochu akiheijun gamthip Rimmon songpi lama chun ajamun, chule Rimmon songpi-a chun lhali aumun ahi.

⁴⁸Chuin Israel miho Benjamin miho chunga achukit uvin, chemjamin athatnun, khopi jouse-a konin amu jouseu mihem hihen, sahem hijongle athat gamun ahi. Chule amahon ahung lhunnao khopi jouse jongchu meijin ahalun ahi.