Read Thado Chin Thutanho 21 Bible Online

Thutanho 21 - Thado Chin bible

Thutanho 21

¹Tun Israel mihon chu Mizpeh'a akihahselun, Ilah uva khatchan achanu Benjamin mi ji dinga apehthei louding ahi, atiuve.

²Chuin mipi chu Pathen in'a ahungun, Pathen anga nilhah geijin aumun, aw sangtah-in asamuvin, hakan akapmun;

³Vo Israelte Pakai Pathen, hitobang pihi ipi jeh-a Israel lah-a soh-a, tunikho-a Israel lah-a kona phungkhat lhasam ding hitam? atiuve.

⁴Chuin ajingin ahung hitin ahi, miho chu jingpi tah in athouvun, maicham khat asaovin, govam thilto le chamna thilto atoh-un ahi.

⁵Chuin Israel chaten, Israel phung jouse lah-a kona Pakai henga dinga mipi houkhom ho toh lhontou lou koi umam? atiuve. Ajehchu amahon Mizpeh mun'a Pakai henga hunglou tapou chungchanga kihahselna lentah aneijuva, Amachu thatei tei ding ahi, atiu ahi.

⁶Chuin Israel chate chu asopipao Benjamin dingin alung hesoh-un, Tuni hin Israel'a konin phung khat akipai dohtai.

⁷Tu-a amoh umnalai ho ji ding chungchanga hi ipi ibol dingu hitam? Eihola Ichanuteu ajidiuvin pepouhite tin Pakai anga kihahselna ineitaovin, atiuve.

⁸Chuin amahon, Pakai henga dinga Mizpeh'a hungtou lou Israel phung khat tou umam? atiuvin ahi. Chuin veovin, Jabesh Gilead'a konin akikhomho umna gebuh'a chun koimacha ahungpouve.

⁹Ajehchu mipi chu akisima ahile, veuvin, Jabesh Gilead'a cheng miho chu khatcha jong aumpon ahi.

¹⁰Chuin mipi kikhom chun ahangsan dehset cheh mi sangsom le sangni asolun, chule thupeh aneijun, ahenguva, Cheovinlang Jabesh Gilead'a chengho chu numei leh achateuse toh chemhemin gathatnun.

¹¹Chule hichehi nabolding dolu chu ahi: nanghon pasal takip, chule pasal toh lumkhomsa numei takip chu natha gamheldiu ahi, atiuve.

¹²Chuin amahon Jabesh Gilead'a kon chun pasal hekhalou nungah theng jali amudoh-un ahi. Chuin amahon amaho chu Canaan gama Shiloh gebuh-a ahin puijun ahi.

¹³Chuin houkhom pumpi chun Rimmon songpi-a um Benjamin chatetoh kihou dingle, amaho lungmong tah-a kou dingin mi phabep asolun ahi.

¹⁴Hijeh chun Benjamin chu ahungkit tan; chule amahon amaho chu Jabesh Gilead miho-a kona ahinghoiju numei ho chu ajidingun apeuvin; ahinla hicheho chun atohjou pon ahi.

¹⁵Chuin Pakaiyin Israel phungho sunga chun kikhenna aumsah jehchun, mipi ho chu Benjamin jeh-in alunghemun ahi.

¹⁶Chujouvin mipi kikhomho lah-a upaho chun, Benjamin'a konin numei ho akisumang tai ti imu utoh lhona, ahing nalaiho ji dinga hi ipi ibol dingu hitam? atiuve.

¹⁷Chuin amahon, Israel lah-a kona phungkhat suhmanga aumlou nadinga, Benjamin miho lah-a kona ahingdoh hohin goulo aneitei dingu ahi.

¹⁸Ahinla eihon amaho chu aji dinguva ichanuteu ipehthei loudingu ahi: ajehchu Israel chate chun kihahselna ananeijuva, Benjamin mi jidinga achanu pechan chu sapset changhen anatiu ahi, atiuve.

¹⁹Chujouchun amahon, Veuvin Bethel sahlam, Bethel'a kona Sheshem jotna lamlhong solam, chule Lebonah lhanglam Shilloh mun'a khun kumseh le Pakai golvah akiboljin ahi.

²⁰Hichejeh chun amahon Benjamin chate chu athupeh-un, ahenguva, Cheovin lang lengpi leija khun gachang pangun;

²¹Chule ana veuvin lang, veuvin, Shiloh kho-a nungah ho chu lamna-a lamdinga ahungule, lengpi leija konchun hungpot unlang, amitakipmin Shiloh chanute-a konchun naji ding cheh-u kimatnun lang, chule Benjamin gam lama chepiovin.

²²Chule hung hitiding ahi, apatehou ahiloule asopitehou kehenguva kiphinna thu seidinga ahung tengule, keihon amaho henga, Keiho jal-in amaho chunga khun khohsahna neijun, ajehchu gal kisatna-a chu eihon amitakip ajidingu ikhendoh peh pouvin, chule nanghon tu-a jonghi amaho napeh-u ahilou jeh-in, themmo chang pouvin nate, tin seinao vinge, atiuve.

²³Chuin Benjamin chate chun hitichun aboltauvin, amahon amijat dungjuijun alama hungdohho aji dinga akimat hou chu akipuijun; chule agoulonao gama akileuvin, khopi ho chu asaphaovin, acheng taovin ahi.

²⁴Chuin hichephat chun Israel chate chu hiche mun'a konchun akipat doh-un, amijouse ama phungle insung, chule agou lona mun cheh-a achedoh taovin ahi.

²⁵ Hichelai chun Israelte lah-a leng aumpon: amijousen ama mitmu-a pha asah chu abol jengu ahi.