Read Thado Chin Thutanho 3 Bible Online

Thutanho 3 - Thado Chin bible

Thutanho 3

¹Pakaiyin Israelte, Canaan gamsunga galkisat hekha loulai Israel mi tampiho patep nadia akhen namtin vaipiho chu hichenghi ahiuvin;

²Israel chate khangguihon galsat dan ahetna dingu leh, tumasanga ima anahe loulaihon ahetna dinguva kikhena ahiuve;

³Hiche ho chu, Philistinte leng nga ho, Canaan miho jouse, Sidon miho, Baal-hermon molsanga patna Hamath lutna geija Lebanon molsanga cheng Hiv miho ahiuve.

⁴Chule Israel ten Pakai thupeh, Mosi khutna kona apu apateu henga ana thupeh chu angainah uvem ti photchetna dinga amaho chu kikhendoh ahiuve.

⁵Chuin Israel chate chu Canaan miho, Hit miho, Amor miho, Perizz miho, Hiv miho, Jebus miho lah-a achengun;

⁶Chule amahon achanuteu ajidingun alauvin, achanuteu amaho chapate dingin apeuvin, chule a-pathen hou jong ajenun ahi.

⁷Chule Israel chate chun Pakai mitmun thilse abolun, Pakai a-Pathen'u asumilun, Baal le Asherah ajenun ahi.

⁸Hichejeh chun Pakai lunghana chu Israelte chunga asoudoh tan, hijeh chun Mesopotamia lengpa Chushan-rishathaim khutna amaho ajohdoh tan; hitichun Israel ten Chushan-rishathaim chu kumget ajenun ahi.

⁹Chuin Israel chate Pakai henga apen phat uvin, Pakaiyin Israelte huhdoh ding khat, Caleb naopa Kanez chapa Othniel ngeichu atungdoh-in, amachun amaho ahuhdoh-in ahi.

¹⁰Chuin Pakai lhagao chu achunga achun, aman Israelte thu atanin, galsat din akondoh-in: chule Pakaiyin Mesopotamia lengpa Chushan-rishathaim chu akhutna apedoh-in; chule akhutnin Chushan-rishathaim chu ajoutan ahi.

¹¹Chuin gamsung chu kum somli akicholdon ahi. Chuin Kenaz chapa Othniel chu athitai.

¹²Chuin Israel chaten Pakai mitmun thilse abolkit taovin; chule amaho Pakai mitmu-a thilse jeng abol jeh-u chun, Pakaiyin Israelte dounan Moab lengpa Eglon chu athahatsah tan ahi.

¹³Chuin aman Ammon le Amalek chate ahenga akhomin, akondoh-in Israelte agajouvin, tumthing khopi chu alotan ahi.

¹⁴Hitichun Israel chaten Moab lengpa Eglon chu kum somleget ajenun ahi.

¹⁵Ahivangin Israel chate Pakai henga aka phatnun, Pakaiyin Benjamin mi Gera chapa Ehud, mi veikolong pa chu ahuhdoh dingun atundohpeh-in; chule ama khutna chun Israel chaten Moab lengpa Eglon henga thilpeh athotnun ahi.

¹⁶Ahinla Ehud'in hemto chemjam tongkhatna sao akisemin, ajetlam malpi chunga avonnoija akigah-in ahi.

¹⁷Chuin aman thilpeh chu Moab lengpa Eglon henga ahin choijin: chule Eglon chu mithaotah ahi.

¹⁸Chuin aman thilpeh apeh jou phatnin, thilpeh hinpoho chu asolmangtai.

¹⁹Ahivangin amatah Gilgal'a song kikhena mun'a konchun akileheijin, ahenga, Vo lengpa keiman nahenga dingin guhthim thusei ding kaneije atile, aman thipmin atin ahi. Chuin akoma ding jouse chu ama-a konin achemang taovin ahi.

²⁰Chuin Ehud ahenga ahungin; chule ama chu amachang dingabou anei nipilai touna indan-a chun atouvin ahi. Chuin Ehud'in ahenga, Nahenga seiding Pathen'a kon thukhat kaneije ati. Hichun ama atouna-a konchun akipatdoh-in ahi.

²¹Chuin Ehud'in akhut veilam ahin lhang doh-in, ajetlam pheichunga chem chu alan, a-oija adotlut tai.

²²Chule achem nunga chun achemkung jong alutthan; chem chu athaovin atomin ahile aman chem chu a-oija konin asatdoh joutapon; chule a-eh ahungdoh-in ahi.

²³Chujouvin Ehud hongcha lama apotdoh-in, touna danho kotho chu akha khumin, akam khumtan ahi.

²⁴Ama achedoh phatnin asohteho ahungun, chule touna danho kot kikam chu amuphatnun, Amahin thonlouva nipilai indan sunga akeng akikhu hinte atiuvin ahi.

²⁵Chuin amahon jachat umleuvin angah-un; chule veuvin, aman indan kot chu ahongtapon ahi. Hijeh chun amahon aheh hongna alauvin, ahongdoh-un; chule veuvin a pakaiyu chu tolla athisan analumin ahi.

²⁶Chule amaho khongai kahchun Ehud ahoidohtan, song kikhetna mun akhelin, Seirah geijin ajamdoh tan ahi.

²⁷Chuin ahitin ahi, ama ahung phatnin, Ephraim molchunga chun sumkon ahin mutnin, chule Israel chate chu amatoh mola konin ahungsuh-un, ama amasan ahi.

²⁸Chuin aman amaho henga, Kanung hinjuijun: ajehchu Pakaiyin namelmao Moab mite chu nakhut nuva apehdohtai, ati. Chule amahon anung ajui suh-un, Moab mai naija um Jordan gal kulho chu alauvin, koimacha agalkaisah pouvin ahi.

²⁹Chuin amahon hiche pettah chun Moab mite sangsom tobang athat uvin, amaho chu mihat cheh le mihangsan cheh ahiuve; koimacha ahoidoh aumpon ahi.

³⁰Hitichun hiche nikho chun Moab chu Israel khutnoija suhnemin aumin ahi. Chuin gamsung chu kum somget acholngan ahi.

³¹Chule amanungin Anath chapa Shamgar ahin, amapan bong sutna tengcha-in Philistine te mi jagup athatnin: chule Israelte jong ahuhdoh-in ahi.