Read Thado Chin Thutanho 4 Bible Online

Thutanho 4 - Thado Chin bible

Thutanho 4

¹Chuin Ehud athi phatnin, Israel chate chun Pakai mitmun thilse abolkit taovin ahi.

²Chuin Pakaiyin amaho chu Hazor mun'a vaihompa, Canaan lengpa Jabin khutnah ajohdoh tan ahi. Ajanel lamkai chu Sisera ahin, amachu Gentile ho umna Harosheth'a [1] cheng ahi.

³Chuin Israel chate chu Pakai henga atao taovin ahi. Ajehchu aman thih-a kisem sakol kangtalai jako aneijin; chule aman kum somni Israelte chu nasatah-a asuh genthei ahi.

⁴Chule Lapidoth jinu Deborah themgaonu chun hiche laija chu Israelte thu atan ahi.

⁵Chule amanu chu Ephraim molsanga um Ramah le Bethel kikah-a Deborah tumthing noija chu chenga ahin; chule Israel chate chu athu-u tansah dinga ahenga hungjiuva ahi.

⁶Chuin amanun Kadesh-napthtali'a kon Abinoam chapa Barak agakou sah-in, ajah-a, Israel Pakai Pathen'in, Tabor molsang lama chun chenlang, Naphtali chatele Zebulun chate sangsom kipuijin,

⁷Chule keiman Jabin gal lamkaipa Sisera chu asakol kangtalai le amihonpi to nangma heng Kidron vapidung lama kahin puiding; amachu nakhutna kapehdoh ding ahi, tia thu napeh hilouham? ati.

⁸Chuin Barak'in amanu henga, Nangman nei kilhonpi leh chenange; amavang nei kilhonpi lou dinga ahile kache louding ahi, ati.

⁹Chuin amanun, Keiman thonlouva kalhonpi ding nahi; ahivanga nakalsona lampia hi nangma dinga loupina umlou ding ahi; ajehchu Pakaiyin Sisera chu numei khat khutna ajohdoh ding ahi, ati. Chuin Deborah akipatnin Barak toh akilhonin Kadesh lama achelhontan ahi.

¹⁰Chuin Barak'in Zebulun le Naphtali chu Kadesh'a akouvin; mi sangsom toh alhon touvin: chule Deborah'in alhon toupin ahi.

¹¹Tun Mosi nupapa Hobab chate lah-a Ken mi Heber chu Ken miho-a konin akitumse-in, Kedesh koma um Zaanaim phaichama chun ponbuh akisontan ahi.

¹²Chule amahon Tabor molsanga chun Abinoam chapa Barak chu achetoutai ti Sisera henga aseipeh taovin ahi.

¹³Chuin Sisera'in akangtalai jouse, athih kangtalai jako geijin, chule Gentile ho umna Harosheth'a kon Kishon vapidung geija akoma um mijouse chu akhom khomin ahi.

¹⁴Chuin Deborah'in Barak henga, Kipat in, ajehchu tunihi Pakaiyin nakhutna Sisera apehdoh nikho ahi; Pakai chu namasanga che hilouham? ati. Hitichun Barak Tabor molsanga konin achesuh-in, mi sangsomin anung ajuijun ahi.

¹⁵Chuin Pakaiyin Barak masanga Sisera le akangtalai ho, chule aumpiho chu chemjam monghemin amaimoh sahtan; hitichun Sisera chu akangtalaija konchun akumlhan akengin ajammang tan ahi.

¹⁶Ahivangin Barak'in Gentile ho umna Harosheth geijin kangtalai ho le janelho chu anungdelin; Sisera sepai jouse chu chemjam monghemin alhusoh keijun, khatcha asohcha aumpouvin ahi.

¹⁷Ahivangin Sisera chu Ken mi Heber inneipi Jael ponbuh geijin akengin ajamlutnin ahi. Ajehchu Hazor lengpa Jabin le Ken mi Heber insung kikah-a chamna uma ahi.

¹⁸Chule Jael chu Sisera lamto dingin ahungdoh-in, Hunglutnin, ka pakai, kahenga hunglutnin, kicha hih-in ati. Chuin amapa amanu ponbuh sunga ahunglut phatnin, amanun ama chu pon akhu khumin ahi.

¹⁹Chuin amapan amanu jah-a, Nahenga katao ahi, dondingin twi themkhat neipen, ajehchu kadang achah lheh-e ati. Chuin amanun bongnoi hai ahongin, amapa adonsah-in, chule akhu khumtai.

²⁰Chule amanu koma aseikitnin, Pon in kotna dingin lang, chule hiti ding ahi, mikhattou nahenga ahunga, Hikoma hi mi umam? tia nadoh ule, aumpoi tin seijin, ati.

²¹Hiche jouchun Heber jinu Jael'in pon in kilna thingkil chu alan, akhutna sehtumkhat alan, ahenga kangchan achen, angeichanga chun akhenlutnin, toltoh akilmat jengin ahi; ajehchu ama acholjeh-a aihmumil hela ahi. Hitichun amapa athitai.

²²Chuin veuvin, Barak'in Sisera ahinjui laijin, Jael chu amapa kimutopi dingin apotdoh-in, chule ahenga, Hungin, keiman naholpa chu vetsah inge, ati. Chuin amapa amanu ponbuh-a ahung phatnin, veuvin Sisera chu athisan analumin, thingkil chu angeichanga ana kiphut in ahi.

²³Hitichun hiche nikho chun Pathen'in Canaan lengpa Jabin chu Israelte masanga asunemtai.

²⁴Chuin Israel chate khut akhangtou chehcheh-in, Canaan lengpa Jabin asuhmang kahseovin, Canaan lengpa Jabin chu ajoupeh-un ahi.