Read Thado Chin Thutanho 6 Bible Online

Thutanho 6 - Thado Chin bible

Thutanho 6

¹Chule Israel chaten Pakai mitmun thilse jeng abolun ahile; Pakaiyin amaho chu Midia te khutna kum sagi apedoh tan ahi.

²Chuin Midia te khut chun Israelte chu ajoutan: chule Midia mite jehchun Israel chaten molsang ho-a kokhuh, leikoho, chule kuldet akisem taovin ahi.

³Chuin ahitin ahi, Israel ten muchi atu tengule Midia miho ahung tou jiuvin, chule Amalek miho le solam chateho jongchu amaho doudin ahung tou jiuvin;

⁴Chule amaho dounan gebuh asong jiuvin, Gaza geijin leisetna kon muchi jouse chu asuse jiuvin, chule Israelte dingin nehding himhim akhenji pouvin, kelngoiho, bongho, sanganho jong akhenji pouvin ahi.

⁵Ajehchu amaho aganchahou le aponbuh-u toh hungtou jiuva, mihonpi chu khaokho banga hung kitol jiuva ahi; ajehchu amahole asangongsang hou chu simjou lou ahiuvin, gamsung sumang dinga hunglut jiu ahi.

⁶Chule Midia mite jeh chun Israelte chu nasatah-in avaicha taovin; chuin Israel chate Pakai henga apeng taovin ahi.

⁷Chuin ahung hitin ahi, Midia mite jeh-a Israel chaten Pakai asap phatnun,

⁸Pakaiyin Israel chate dingin themgao khat ahinsol peh-in, ama chun ahenguva hitihin thu aseijin, Israel Pakai Pathen'in hitihin aseije, Keiman Egypt'a kona kahinpuidoh uva, nabul putnaova kona kahinpuidoh nahiuvin;

⁹Chule Egypt mite khutna konle, nabol gentheihou khutna kona kahuhdoh uva, namasanguva kona kadeldoh-a, agamu nangho kapeh nahiuve;

¹⁰Chule keiman naheng uva, Keimahi Pakai na-Pathen'u kahi; nanghon agamuva nachennao Amor mite pathenho chu ging hih-un, kanatin: ahinla nanghon kathu nanit pouvin ahi, ati.

¹¹Chuin Pakai vantil khat ahungin, Ophrah kho-a um Abiezer mi Joash gangpi phung noija atouvin; chule achapa Gideon chun Midia mite-a kona sel dingin lengpiga chilna-a suhlou chang achilin ahi.

¹²Chuin Pakai vantil chu ahenga akilah-in, ajah-a, Nangma mihang gal hatpa, Pakaiyin naumpi, ati.

¹³Chuin Gideon'in ama henga, Vo ka Pakai, Pakaiyin eiumpiuva ahileh, hichengpihi ibola kachunguva chu-a ham? Chule kapu kapateuvin keiho henga Pakaiyin keiho Egypt'a kona eihin puidoh-u hilouham, tia anaseiju athilbol kidangho chu hoilamba hija hitam? Ahinla tun Pakaiyin eida lhaovin, Midia mite khutna eipedoh taove, ati.

¹⁴Chuin Pakaiyin amapa aven, hitin aseije, Hiche nathahatna-a hin konin, chule nangman Midia te khutna konin Israel nahuhdoh ding ahi, keiman kasol nahi hilouham? ati.

¹⁵Chuin aman ahenga, Vo ka Pakai, iti dana keiman Israel kahuhdoh dingham? Ven, ka-insung hi Manasseh sunga dinga alhasampen ahin, chule keimahi kapa insunga dinga alhumpen kahi, ati.

¹⁶Chuin Pakaiyin ahenga, Thonlouva keiman nangma kaumpi ding nahin, chule nangman Midia mite chu mikhat tha-a natha ding ahi, ati.

¹⁷Chuin aman ahenga, Tu-a namitmu-a lungsetna kachana ahile, nangman nei kihoupina melchihna neimusah-in.

¹⁸Nahenga katao ahi, nahenga kahunga thilpeh kahin choidoh-a na anga kakoi kahsen, hiche mun'a konin chedoh hih-in, ati. Chuin aman, Nahung kahse-a kana ngading nahi, ati.

¹⁹Chuin Gideon alutnin, kelnou khat athatnin, chule changbong chol solou ephah khat aga kangin; saphe chu pocha sunga ahengin, atwi chu bel sunga asunglutnin, gangpi phung noija aumna-a chun ahinchoijin, amapa chu apen ahi.

²⁰Chuin Pathen vantil chun ahenga, Saphe le chol solou changlhah chu lanlang songpi chungahin koijin lang, atuichu sunglhan ati. Chuin hitichun aboltai.

²¹Chuin Pakai vantil'in akhutna um tenggol muh-a chun saphe le cholsolou changlhah chu agah tongkhan ahileh, songpi-a konchun mei ahung kongdoh-in, saphe le cholsolou changlhah chu akamangtan ahi. Chujouvin Pakai vantil chu amitmua konin achemang tai.

²²Chuin Gideon'in ama chu Pakai vantil ahi ahet phatnin, Gideon'in, Ohe Pakai Pathen! ajehchu keiman Pakai vantil chu kimaito tah-in kakimupi tai, ati.

²³Chuin Pakaiyin ahenga, Lung mongin umin, kicha hih-in; nathi louding ahi, ati.

²⁴Chuin Gideon'in Pakai dingin chua chun maicham khat atungdoh-in, hichu Jehovah-shalom [2] asahtai. Tuni geijin Abiezer mite umna Ophrah'a aum jingin ahi.

²⁵Chuin hiche jan mama chun ahitin ahi, Pakaiyin ahenga aseijin, Napa bongchal gol, kum sagi lhing bongchal gol nina ngei chu lanlang, napa Baal maicham chu suchimin, chule akoma um thingbom [3] chu phuhlhun;

²⁶Chule hiche songpi chunga hin Pakai na Pathen dingin maicham khat sanlang, hoitah-in goltupmin, chule bongchal nina chu lanlang, naphuh ding thingbom thinga chun halvam thilpeh chu toh-in, ati.

²⁷Chujouvin Gideon'in asohte mi som apuijin, Pakaiyin ahenga aseibang chun aboltan ahi. Chule ahitin ahi, apa insung mihole khopi-a miho aginjeh chun sunnin abolngam pon, jannin abolin ahi.

²⁸Chuin khopi miho chu jingpi tah-a ahungthodoh phatnun, veuvin Baal maicham chu ana kisulhun, chule akoma um thingbom jong chu ana kiphuh lhutan, chule Maicham kisa chunga chun bongchal nina chu ganlhaijin ana kitoh-in ahi.

²⁹Chuin amaho khatle khat, Hichehi koibolham? tin akidong touvin ahi. Chule amahon akholuva adoh phatnun, Hichehi Joash chapa Gideon bol ahi, tin adonbutnun ahi.

³⁰Chujouvin khopi sunga mihon Joash henga, Nachapa hinpuidoh in, thitei tei ding ahi. Ajehchu aman Baal maicham asuchimin, chule akoma um thingbom chu aphuh lhun ahi, atiuve.

³¹Chuin Joash'in akidin tepiho jouse henga, Nanghon Baal dinga thu naseipeh dingu ham? Nanghon ama nahuhhing dingu ham? Koihile ama-a dinga thusei chanchu tu jingkah ahipet hin kithat jenghen; ama pathen ahile achungthu kisei hen, ajehchu mikhatnin amaicham asuhchim pehtai, ati.

³²Hijeh chun aman, Baal'in amapa dounan achungthu kiseihen, ajehchu aman a-maicham asuhchim pehtai, atin, amapa chu Jerubbaal asahtai.

³³Chujouvin Midia te jousele Amalek mite chule solama chateho akikhomun, agalkaijun, Jezreel phaichama pon in asong taovin ahi.

³⁴Ahivangin Pakai lhagao chu Gideon chunga ahung chun, chule aman sumkon amutnin; Abiezer miho anunga ahung kikhomun ahi.

³⁵Chuin aman Manasseh mite umna jouse-a thusep asolin, amaho anunga ahung kikhomun ahi. Chule Asher henga jong, Zebulun henga jong, Naphtali henga jong thusep asolin; chuin amaho ama kimutopi din ahung touvun ahi.

³⁶Chuin Gideon'in Pathen henga, Nangman nasei banga kakhutna Israel nahuhdoh dinga ahile,

³⁷Ven, keiman tollhanga kelngoi mul kakoi ding; daitwi chu kelngoimul chungabou alhah-a, akivela leiset chungchu agotseh-a ahile, nasei banga chu kakhutna Israel nahuhdoh ding ahi tichu kahet ding ahi, ati.

³⁸Chuin chutichu ahitai. Ajehchu ajing jingkah matah-in athouvin, kelngoimul ho chu achom khomin, atuichu kelngoi mula kona chu ahehlhan ahile, kongkhat adimsetnin ahi.

³⁹Chuin Gideon'in Pathen henga, Kachunga lunghang hih beh-in, khatvei sehseh bou seikit inge: katao ahi, hiche kelngoi mula hin khatvei patep kit inge; tun kelngoimul chung bouchu gotsah inlang, leiset chung vang daitwi kotsah-in, ati.

⁴⁰Chuin Pathen'in hiche janchun hitichun aboltai. Ajehchu kelngoi mul chung bouchu ago-in, leiset chung jouse chu dai akotnin ahi.