Read Thado Chin Thutanho 7 Bible Online

Thutanho 7 - Thado Chin bible

Thutanho 7

¹Chujouvin Jerubbaal, (hichu Gideon ahi,) le aumpi miho jouse chu jingpi tah-in athoudoh-un, Harod twikul panga chun ponbuh asongun; hitichun Midia sepai janel chu asahlam uva Moreh lhang chin phaichama aumun ahi.

²Chuin Pakaiyin Gideon henga, Akhutnuva Midia mite kapehdohna din nalhonpi miho chu atam behseh uve, achuti loule Israelte kei dounan hoithou vintin, kakhut tah-in eihuhdoh ahi tigetnunte, ati.

³ Hijeh chun tun chenlang mipi ho jahdin gaseiphongin, Koitobang akicha le atijachan chu, Gilead molsanga konhin kinungle loihen, tin ati. Chuin mipi-a konchun mi sangsomni le ni akinunglen, sangsom aum denun ahi.

⁴Chuin Pakaiyin Gideon henga, Mipi hohi atam behseh nalaijui; Amaho hi twiphunga puilhan, chukoma chu keiman nangma-a dingin kapatep ding ahi. Chule hitiding ahi, keiman, Amahi nangma toh lhonkhom ding ahi katichan chu nangma toh lhonkhom ding; chule koi hijongle nahenga, Amahi nangma toh lhonkhom louding ahi kati chanchun, nangma toh lhonkhom louding ahi, ati.

⁵Hitichun aman mipi ho chu twiphunga apuilhan ahi. Chuin Pakaiyin Gideon henga, Koihile uicha banga twi chu aleija letho chanchu achoma nakhendoh ding, chutobang ma-a chu akhupma bohkhupma donho jong nakhendoh ding ahi, ati.

⁶Chuin akama akhut koija letho ho jouse chu jathum ahiuvin; mipi adangse vangchu akhupma dilsua dontho ho ahiuve.

⁷Chuin Pakaiyin Gideon henga, Ale-tho mi jathum hochu mangcha-a nangma kahuh hinga, Midia te chu nakhutna kapehdoh ding ahi. Adangse vangchu ama ama muncheh-a chetaohen,

⁸Hitichun mihon aneh dingu le asumkon cheh-u akhutnuva akichoijun ahi. Chuin aman Israel dangse chu amitakip aponbuh cheh-a asolin, hiche mi jathum ho chu aumdensah-in ahi: chule Midia mipi janel chu ama noija phaichama chun aumun ahi.

⁹Chuin hiche jan mama chun ahung hitin ahi, Pakaiyin ahengah, Thoudoh-in, mipi janel lah-a khun chesuh-in; ajehchu nakhutna kapehdoh

¹⁰Amavang chesuh ding nakichatle, nasohpa Purah kilhonpin lang janel lah-a chun chesuh-in;

¹¹Chule amahon ipi aseijiu nagajah ding ahin, chutengle mipi janel henga chesuhna dinga nakhut chu suhhatna umding ahitai, ati. Chujouvin ama asohpa Purah toh mipi janelho lah-a sepai manchah choiho umna china chun aga chesuh lhonin ahi.

¹²Chule Midia miho, Amalek miho, chule solam chate mipi ho chu khaokhote banga tamin phaicham lhonlhunga aumun; chule asangongsao houchu simsenglou, twikhanglen panga neldi banga tam ahi.

¹³Chuin Gideon ahung phatnin, veuvin, chukoma chun mikhatnin agolpa koma amang aseijin, hitin ati, Ngaijin, keiman mang khat kamatnin, ven, Midia mipi janel lah-a butunna kisem changlhah pheng ahung kilih lutnin, ponbuh geijin ahung lutnin, hichun ahinse-a ahileh asuchimtan, akilehkhup min, athalin akijamtai, ati.

¹⁴Chuin aloipan adonbutnin, Hichu Israel mikhat Joash chapa Gideon chemjam tilou imadang hiponte. Ajehchu Pathen'in akhutna Midia te le mipi janel hi apehdoh ahitai ati.

¹⁵Chuin ahitin ahi, Gideon'in mang kisei le aledohna kisei chu ajah phatnin, Pathen ahouvin, Israel mipi ho lah-a akinunglen, hitin aseije, Thouvun, ajehchu Pakaiyin nakhut uva Midia mipi janel chu apedohtai, ati.

¹⁶Chuin aman mi jathum chu loithumin akhenin, akhutcheh uva sumkon khatcheh apen, chule leibel keu khatcheh, asunga thaomei kikoi leibel keu khatcheh toh apen ahi.

¹⁷Chuin aman ahenguva, keima neiveuvin lang, kabol bang bangin bollun. Chule veuvin, keima ngahmun pam kahung lhun tengle hung hitiding ahi, keima bol bangbang chu nabol cheh dingu ahi.

¹⁸Keima le kaumpi jousen sumkon kamut tengule, nanghon jong ngahmun jouse pang tinna sumkon namut uva, Pakai le Gideon chemjam, nati diu ahi, ati.

¹⁹Hitichun jan khangkim kipat tah-in Gideon le aumpi mi jakhat chu gebuh pam chu ahung lhungun, amaho chu ngahtup ana kikhel jou pettah-u ahin; chuin amahon sumkon amutnun, akhutnuva leibel keuho chu avokeh uvin ahi.

²⁰Chule loithumho chun asumkonnu chu amutnun, bel homho jong chu asukeh un, akhut veijun meivah ho chu adomun, akhut jetna sumkon tuh in amutnun, chuin Pakai le Gideon chemjam tin a-ao taovin, ahi.

²¹Chuin ngahphol kimvella chun amitakip adinna cheh uva adingun ahi. Chuin janel chu alhaijun, hatah in apengun ajammang taovin ahi.

²²Chuin loithumho chun asumkonu amutnun ahile, Pakaiyin mitin chemjam chu aloipa chunga achuhsah-in, mipi janel pumpi lah ngeija chun; chuin mipi janel chu Zererath'a mun'a um Beth-shittah lama le, Tabbath lama Abel-meholah gamgi geijin ajamtaovin ahi.

²³Chuin Israel mijouse chu Naphtali'a kon, Asher akon, Manasseh'a konin akikhomun, Midia miho chu anung delun ahi.

²⁴Chuin Gideon'in Ephraim molsang jouse-a thusep asolin, ahenguva, Midia mite doudin hungsuh un, chule amaho masanga konin Bethbarah le Jordan geijin atwi neh-u chu lahpeh-un, atin ahi. Chujouvin Ephraim mijouse chu akikhom khomun, Bethbarah le Jordan geijin amaho-a konin atwi neh-u chu alah peh-un ahi.

²⁵Chule amahon Midia mite leng chapa ni Oreb le Zeeb chu amanun; chuin amahon Oreb chu Oreb song chunga athatnun, chule Zeeb chu Zeeb lengpiga chilna-a athatnun, Midia te chu anungdelun, Oreb le Zeeb luchang chu Jordan gallanga Gideon henga ahinpouvin ahi.