Read Thado Chin Thutanho 8 Bible Online

Thutanho 8 - Thado Chin bible

Thutanho 8

¹Chule Ephraim mihon ahenga, ibola nangin keiho neihiti bol uva, Midia mite toh kisatna nacheuva chu neikou louvu ham? atiuvin amachu nasatah-in ahouseuvin ahi.

²Chuin aman amaho henga, Nang hotoh tekah dinga tu-a keiman ipi kabol em? Abiezer theichang ga lokhom sanga Ephraim lengpiga lokhom chu phajo louham?

³Pathen'in nakhut uva Midia leng chapa teni Oreb le Zeeb chu apedoh tan: keiman nang hotoh tekah dinga ipi katoh jouding ham? atin ahi. Chuin chuche aseiphatnin ama chunga lunghan nau chu adailhatan ahi.

⁴Chuin Gideon Jordan'a ahungin, apalgalkai paijin, amale alhonpi mi jathum chu amaho nungdel nan alhadah taovin ahi.

⁵Chuin aman Succoth miho henga, Naheng uva katao ahi, kanung juija miho hi changlhah peovin, ajehchu amaho alhadah taove, chule keiman Midia leng teni Zebah le Zalmunna nung kadel ahi, ati.

⁶Chuin Succoth leng chapate chun, Zebah le Zalmunna khutchu nakhutna umbeh hita-a, keihon nasepai ho chu changlhah kapeh dingu ham? atiuvin ahi.

⁷Chuin Gideon'in, Hiche jeh-a chu Pakaiyin Zebah le Zalmunna kakhutna eipehdoh phatle, keiman gamthipma lingho le khaogui lingneiho-a naphe-u kabotel ding ahi, ati.

⁸Chuin ama Penuel geijin achepeh-in, hitobangma chun ahenguva aseijin; chule Penuel'a um miho jongchun, Succoth mihon adonbutna bangu chun anadonbutnun ahi.

⁹Chuin aman Penuel miho henga aseijin, Lungmonga kahungkit tengle, hiche insanghi kasuhchim ding ahi, atin ahi.

¹⁰Tun Zebah le Zalmunna chu Karkor munna aumlhonin, chule aumpi miho chu sangsom le sangnga ahiuvin, abonuva chu solam chate janel hon lah-a amoh ngen ahiuve. Ajehchu chemjam lamthei cheh mi sangjakhat le sangsomni athiuvin ahi.

¹¹Chuin Gideon Nabah le Jogbehah solam sanga chengho ponbuh lampia chun achetouvin, chule janel chu aban tha gamin ahi: ajehchu amaho mongtah-a umuva ahi.

¹²Chuin Zebah le Zalmunna ajam phatnin, aman anung delin, chule Midia lengteni Zebah le Zalmunna chu amanin, janel pumpi chu amaimoh sahtan ahi.

¹³Chuin Joash chapa Gideon chu nisa sodoh masangin galmuna konin ahung kinungle tan ahi.

¹⁴Chuin Succoth mi golhang khat amanin, adongin ahile, amapan Succoth leng chapateho le, a-upahou mi somsagi le sagi geijin phatechan ahiltai.

¹⁵Chuin Succoth miho henga chun ahungin, chule ajah uva, Veuvin Zebah le Zalmunna, Tu-a hi nakhutna Zebah le Zalmunna khut chu umbeh hija, namite lhasamho chu changlhah kapeh diuham? tia neitaitom nao chu, atin ahi.

¹⁶Chuin aman khopi-a upaho chu amanin, gamthipma lingle khaogui lingnei chu alan, hicheho-a chun Succoth miho chu ahiltan ahi.

¹⁷Chule Penuel insang chu asuhchimin, khopi-a miho chu athatnin ahi.

¹⁸Chujouvin Zebah le Zalmunna henga, Tabor munna nathaho chu itobang mi hiuvem, atin ahi. Chuin amanin, Amaho chu nangma tobang ahiuvin, amitakip leng chapate tobang cheh ahiuve, tin adonbut lhone.

¹⁹Chuin aman, Amaho chu kasopite ahiuvin, kanu chapa ngen ahiuve: Pakai ahin jing bangin, nangman amaho chu nana hinghoi hile, keiman nangni hi kathalhon louding nahi, ati.

²⁰Chuin aman achapa masapen Jether henga, Kipatdoh inlang amani hi thatnin, ati. Ahinla gollhang chun achem adohdohpoi: ajehchu ama chapang nalai ahijeh-in akichan ahi.

²¹Chujouvin Zebah le Zalmunna'in, Nangma kipat inlang kachung lhonna hung chun; ajehchu mi ahi dungjuija, athahat jong umding ahi, atilhone. Chuin Gideon akipat doh-in, Zebah le Zalmunna chu athatnin, chule a-sangongsao ngonga um kijepnaho chu alan, ahi.

²²Chujouchun Israel mihon Gideon henga, Nangmale nachate, chule natute geijin kachunguva vaihomin. Ajehchu nangman Media miho-a konin neihuhdoh uvin ahi, atiuve.

²³Chuin Gideon'in amaho henga, Keima kahin, kachate ahiuvin jong nangho chunga vai kahomlou dingu ahi; Pakaiyin nangho chunga vai ahom ding ahi, ati.

²⁴Chuin Gideon amaho henga, Keiman nangho henga ngehnom khat kaneije, mijousen agalthil chomuva kona bilba ho jouse chu keima neipeuvin, ati (Ajehchu amahon sana bilba aneiju ahi; ajehchu amaho Ishmael mi hiuva ahi).

²⁵Chuin amahon adonbutnun, Keihon hicheho chu kipahtah-in peuvinge, atiuve. Chuin amahon pon aphaovin, ami takipmin gal thila kichomdoh bilba hochu asepkhom taovin ahi.

²⁶Chuin aman athum sana bilbaho chu sana shekel sangkhat toh jasagi in agih-in; hicheho lah-a chu Midia lengho kivon na ngong'o, ponsandup ho, chule sangongsao hon angonguva aki-o'u khivuiho kisimtha lou ahi.

²⁷Chuin Gideon'in thempu boitong sangkhol khat asemin, hichu ama khopi Ophrah ngeija akoijin ahi. Chuin Israelte jousen chukom mun'a chun acheuvin, noti'n apangun; hiche chu Gideon le a-insungmite dingin thang ahung sohtan ahi.

²⁸Hitichun Midia te chun kiletsahna-a aluchangu aputkit louna dingun Israel chate masanga suhnemin aumtan ahi. Chule Gideon nikho sungin gamsung chu kum somli mongtah-in aumtan ahi.

²⁹Chuin Joash chapa Jerubbaal achen, a-in'a agachengtan ahi.

³⁰Chule Gideon ama laigila kon chapa somsagi ahingin ahi. Ajehchu aman ji tamtah anei ahi.

³¹Chule Shechem'a cheng athaikemnu jongchun chapa khat ahinpeh-in, amin Abimelech asah-in ahi.

³²Chuin Joash chapa Gideon chu tehkem setnin athitan, Abiezer mite umna Ophrah mun'a um apa Joash vuikhuh-a chun avuitaovin ahi.

³³Chuin ahitin ahi, Gideon athi joujou chun, Israel chate chu akilehei kitnun, chule Baal henga noti chonin achon kitnun, Baal-berith chu a-pathen diuvin akisemuvin ahi.

³⁴Chule Israel chate amun jouse-a agaltehou khutna kona amaho huhdoh-a Pakai a-Pathen'u chu ageldoh tapouve.

³⁵Chule Israelte anamusah phatna jouse dungjuijin jong, Gideon kiti Jerubbaal insung miho henga jong khotona amusah pouvin ahi.