Read Thado Chin Thutanho 9 Bible Online

Thutanho 9 - Thado Chin bible

Thutanho 9

¹Chuin Jerubbaal chapa Abimelech chu Shechem'a anu sopite henga achen, amaho akihoupin, anu pa le a-insungmi jouse henga hitin aseije,

²Katao ahi, Shechem'a cheng mijouse jah dingin seijun, Jerubbaal chapate somsagi chun nangho chunga vai ahom chu phajo-am, ahiloule mikhatnin nachung uva vai ahom chu phajo em? Keimahi nagu-u leh naphe-u kahi tijong geldoh-un, ati.

³Chuin anu sopiho jousen Shechem'a cheng mijouse jah-a ama chungchanga hiche thu jouse chu aseijun ahile; alungun Abimelech nung juidingin aumtaove; ajehchu amahon, Amahi isopiu ahi, atiuve.

⁴Chuin amahon Baal-berith in'a konin dangka somsagi apeuvin, hiche-a chun Abimelech'in pannabei le thulahlou miho agoijin, amahon anung ajuijun ahi.

⁵Chuin ama apa in Ophrah'ah achen, asopiho Jerubbaal chapate somsagi chu song khat chunga athatnin ahi. Jerubbaal chapa aneopen Jotham vangchu ahing hoijin ahi; ajehchu ama kisela ahi.

⁶Chuin Shechem miho jousele Millo insungmi jouse akikhomun, acheuvin, Abimelech chu Shechem'a um khompi phaichama chun lengin atungtaovin ahi.

⁷Chuin hichu Jotham aseipeh phatnun, ama achen Gerizim molvum'a adingin, aw sangtah-in asamin, amaho henga, Shechem'a um mihon, Pathen'in nathuseiju angainadin, keima thusei hi ngaijun.

⁸Khatvei chu thingphung ho achunguva leng changding thao nu dingin achedoh-un; Olive thingjeh-a, Kachung uvah vaipon pangin atiuvin ahi.

⁹Ahinla Olive thing chun ahenguva, Mihem le Pathen jabolna kineiji kathao hi kadalhah-a, thingphung ho chunga dopsanga umdinga kache dingham? ati.

¹⁰Chuin thingho chun theichang thing henga, Nangma hungin lang kachunguva vai hungpon atiuve.

¹¹Ahinla theichang thing chun ahenguvah, Keiman kalhum na leh kaga phatah hi kadalhah-a, thingphung ho chunga dopsanga umdinga kache dingham? ati.

¹²Chujou phatnin thingho chun lengpigui henga, Nangma hungin lang kachunguva vai hungpon atiuve.

¹³Chuin lengpigui chun ahenguva, Mihem le Pathen kipasah ka ju hi kadalhah-a, thingphung ho chunga dopsanga umdinga kache dingham? ati.

¹⁴Chujou phatnin thing jouse chun theimi koma, Nangma hungin lang kachunguva vai hungpon, atiuve.

¹⁵Chuin theimi chun thingho henga, Nanghon tahbeh-a nachung uva leng hidinga thao neinu uva ahileh, hungun lang natahsan naochu kalim'a hung ngam uvin: achuti louva ahile, theimi-a konhin mei hungpot doh henlang, Lebenon'a cedar thingho hi hung kavam hen, ati.

¹⁶Hiche jehchun tun, dihtahle lung thengsela Abimelech chu lenga nalhenu ahi-a, Jerubbaal le a-insung mite chunga phatecha nabolu ahi-a, chule akhutna achandinga kilom dungjuija achunga natong nahiuva ahile,

¹⁷(Ajehchu kapan nangho dinga gal asatna, ahinkho set toh dinga aphala, Midia miho khutna kona nahuh doh-u ahin;

¹⁸Ahinla nanghon tunin kapa le a-insung mite dounan nakipat doh-un, achapate mi somsagi chu song khat chunga nathatnun, chule asohnu chapa Abimelech chu nasopiu ahijeh-in Shechem miho chunga lengin nasemun ahi.)

¹⁹Tunia hi nanghon Jerubbaal le a-insung mite chunga kitah tahle lunggiltah-a natong nahi vangule, nangho Abimelech chunga kipah unlang, amajong nangho chunga kipahhen.

²⁰Amavang chuti ahi louva ahileh, Abimelech'a konin mei hungdoh henlang, Shechem miho le Millo insung chu kavamhen; chule Shechem mihole Millo insunga konin mei hungdoh henlang, Abimelech chu kavamhen, ati.

²¹Chuin Jotham alhaijin, ajam mangin, Beer kho-a achen, asopipa Abimelech agin jeh-in chuachun achengtai.

²²Israelte chunga Abimelech'in kumthum vai apoh jouvin,

²³Pathen'in Abimelech le Shechem miho kikah-a lhagao phalou ahinsolin; chule Shechem miho chun Abimelech chu lungthim kitahloutah-in abolun:

²⁴Hichu gilou tah-a anabolu Jerubbaal chate mi somsagi ho phu chu achunguva achuh theina dingle, athisannu phu chu athatnuva pang asopipau Abimelech chunga achuh-a; chule asopihou thana dinga kithopi-a Shechem miho chunga achuh theina dinga chuti ahi.

²⁵Chuin Shechem miho chun molchunga ama changlhi ding akoijun, chule amahon chuche lampia amaho hinhopa jouse chu achomun: chule hiche thu chu Abimelech henga akiseipeh tan ahi.

²⁶Chuin Ebed chapa Gaal chu asopihotoh ahungin, Shechem agalkaijun; chule Shechem miho chun ama chu atahsanun ahi.

²⁷Chuin amaho loujaova apotdoh-un, alengpi theihou chu alohkhomun, achilun, kipa golnop abolun, chule a-pathen'u in'a alutnun, aneuvin, adonnun, chule Abimelech chu agaosap uvin ahi.

²⁸Chuin Ebed chapa Gaal'in, Abimelech chu koi hija, chule Shechem chu koi hija, eihon ama ijendiu ham? Amachu Jerubbaal chapa hilouham? Chule avaipo chu Zebul hilou ham? Shechem pa Hamor miho chu jenuvin: ajehchu ipidinga ama ijendingu ham?

²⁹Chule amahohi Pathen'in kakhutnoija aumsah hile, keiman Abimelech kalahdoh ding ahi, ati. Chuin aman Abimelech henga, Nagalsat mi supungin lang, hung doh-in, ati.

³⁰Chuin khopi vaipo Zebul chun Ebed chapa Gaal thusei ajah phatnin, alunghan akongjah tan ahi.

³¹Chuin aman Abimelech henga guhthimin thupo asolin, ajah-a, Ven, Ebed chapa Gaal le asopiho Shechem'a ahungun; chule vetemin, amahon nangma dounan khopi kul akai taove.

³²Hijeh chun tun nangma naumpi nasopi ho toh jan-in kipat unlang, loujaova chang lhiuvin;

³³Chule hitiding ahi, jingkah-a nisa ahungso sole, nangma jingpitah-in thoudoh inlang, khopi chu nokhumin: chule ven, amale aumpiho nang douna ahung tengule, nangman aphat namu dungjuija achunguva na natohding ahi, ati.

³⁴Chuin Abimelech aumpiho toh jannin athouvun, chule loi li akiso-un Shechem douna-in achang pangun ahi.

³⁵Chuin Ebed chapa Gaal apotdoh-in, khopi lutna kotpi-a chun adingin; chule Abimelech le aumpiho chu akisel naova konin ahungpot doh-un ahi.

³⁶Chuin Gaal'in miho chu amuphatnin, Zebul henga, Ven mipikhu molsang chunga konin miho ahungsuh uve, ati. Chuin Zebul'in ahenga, Molsang le-lim ho chu nangin mi-a namu hinte, atin ahi.

³⁷Chuin Gaal'in aseikitnin, Ven, lampia gamsung kimlai tah-a konin miho ahung suh-in, chule loi dangjong Meonemin phaicham ahunge ati.

³⁸Hichun Zebul'in ahenga, Abimelech chu koi hija, amachu ijen diuham? tia nathuseina nakam chu tu-a hoilama um hitam? Hiche mihohi hilou ham nangin nataitom chu? Katao ahi, potdoh inlang, gakisatpin ati.

³⁹Chuin Gaal chu Shechem miho masanga achedoh-in, Abimelech akisatpi tai.

⁴⁰Chuin Abimelech'in ama chu adelin ahile, ama masanga ajamtan; kotpi lutna geijin mi tamtah alhun, akitongkhan ahi.

⁴¹Chuin Abimelech Arumah'a achengtai. Chule Zebul'in Gaal leh asopiho chu Shechem'a achen nalou diuvin anomangin ahi.

⁴²Chuin ajingin ahitin ahi, mipi chu lou jaova apotdoh-un; hichu Abimelech aseipeh taovin ahi.

⁴³Chuin aman mipi chu akipuijin, hopthum in ahomin, loujaova chun achang pangun, chule aveovin ahile, veuvin, mipi ho chu khopi-a kona ahungdoh-un; chuin amaho dounan akipatdoh-in, amaho chu athat tai.

⁴⁴Chuin Abimelech le aumpiho chu amasang lamuva alhaijun, khopi lutna kotpi-a chun adingun; adang loini chun loujaova umho chu anokhumun, athatgam taovin ahi.

⁴⁵Chuin Abimelech'in nilhum keijin khopi chu akisatpin; chule khopi chu alan, asunga cheng jouse chu athatnin, khopi chu asuchimin, asugoi selin ahi.

⁴⁶Chuin Shechem daivei insanga umhon hichu ajah phatnun, Berith pathen in'a kohomsung khatna alut taove.

⁴⁷Chuin Shechem daivei insanga um mijouse akikhom khomtai tichu Abimelech ahil taovin ahi.

⁴⁸Chuin Abimelech ama le aumpi mijousetoh Zalmon molsanga akaldoh-un; chule Abimelech'in akhutna heicha akichoijin, thinga konin abah alhamlhan, hichu alan, alenga apun, chule aumpiho henga chun, Ipi kabol namu bangun, kino uvin, kabol bang banghin bolun, ati.

⁴⁹Chuin mipi jouse chun Abimelech bol bang chun athingbah ding cheh-u alham lhaovin, Abimelech nung ajuijun, kohoma chun akoijun, achunguva kohom chu ahal khumun; hitichun Shechem daivei insanga umho jong chu athi taovin, amaho chu numei le pasal sangkhat tobang ahiuve.

⁵⁰Chujouvin Abimelech chu Thebez'ah achen, chule Thebez kho dounan gebuh agasongin, ahin latan ahi.

⁵¹Ahinla khopi sunga chun daivei insang dettah khat aumin, hiche sunga chun numei le pasal, chule khopi sunga um mijouse chu akikha khumun; kul chunga chun ahung kaldoh-un ahi.

⁵²Chuin Abimelech insanga chun ahungin, ahung satnin, meija hal dingin insang kotphung lama ahungin ahi.

⁵³ Chuin numei khatnin sumheisong halkhatnin Abimelech luchang ahinsepmin, alugu asepkeh tan ahi.

⁵⁴Hichun aman agalvonpo gollhangpa chu gangtah-in akouvin, ahenga, Mihon numei tha ahi eiti lounadin nachemjam satdoh inlang neithatnin ati. Chuin gollhangpa chun asunpaijin ama athitai.

⁵⁵Chuin Israel miho chun Abimelech athi amuphatnuvin, amitakip ama mun cheh-a achetauve.

⁵⁶Hitichun Pathen'in Abimelech'in asopi somsagi atha-a, apa chunga akhansetna jouse chu alethuh tan ahi.

⁵⁷Chule Shechem miho thilse bol jouse chu Pathen'in aluchung uva akhuhpeh-in; chule achunguva Jerubbaal chapa Jotham sapsetna chu ahung lhungtan ahi.