Read Thado Chin 3 John 1 Bible Online

3 John 1 - Thado Chin bible

3 John 1

¹ Upa keiman thutah-a kangailut, kangai Gaius hengah.

²Ngai, thildang jouse sangin, nalhagao akhantou banga nakhantouva chule nadam nadingin kataovin ahi.

³Sopiteho ahunguva nanga um thutah ahung hettohsah-u chun nasatah-in kakipah-in ahi.

⁴Kachate thutah-a achon thu kajah-a kakipa sanga chungnungjo kakipana dang aumpoi.

⁵Ngai, nangman sopiho le hetphahlou maljin chunga nabol jouse chu kitah tah-in nabolin ahi;

⁶Amahon nangma ngailutna thudol chu houbung-ah ahetsah-un ahi. Nangman amaho chu akholjin naova Pathen'a doltah-a nanathah ji-a ahile, nabol phat lheh ding ahi.

⁷Ijeh-inem itile amaho chidang namdang ho-a kona imacha kilah louva, ama min jala chu kalsongdoh ahiuve.

⁸Hijeh-a chu thutah-a dinga kithopi ho ihi theina dinguva, hiteho tobang mi chu eihotah-in ilhunsah dingu thu ahi.

⁹Keiman houbung henga kahin sutsa ahitai: ahinla alah uva piput ngailu-a Diotrephes chun kaseiju alapon ahi.

¹⁰Hiche jeh-a chu keima kahunga ahile, thu gilou tamtah kachunguva aseija eiseisetnao athilbol achonna chengse kageldohsah ding ahi: chua jong chu lunglhai loulaijin, sopiho chu amanla alhunsahpon, lhunsah dinga goho jong ajahdan, houbung'a konin anodoh jengin ahi.

¹¹Ngai, nangma vangin ase chu jom louvin, apha chu jomin. Apha bola chu Pathen'a kon ahi; ase bola vang chun Pathen amu loulai ahi.

¹²Demetrius chu mijousen aseiphan, thutah-a konin hettohsahna pha achangin, henge, keihon jong kahettohsah uvin; chule keiho hettohsah chu thutah ahi ti nangman nahei.

¹³Nangma henga hinsut ding thil tamtah kaneije, ahinla lekha twi le lekha mola hinsut ding kanompoi:

¹⁴Ahin chomkhat joule nangma kamua chule kimaito-a ikihoulim ding kakineme.

¹⁵Nachungah lungmon umhen. Golle paihon nasalamui. Golle paiho chu amin cheh phan salam'in.