Read Thado Chin Thuphon 1 Bible Online

Thuphon 1 - Thado Chin bible

Thuphon 1

¹Jesu Christa thuphondoh, Pathen'in asohte hetsah dinga apeh, thil hung sohvah dingho chu; aman avantil asola asoh John ahetsah ahi.

²Ama chu Pathen thudol le Jesu Christa hettohsah thudola athil muho jouse thu umchan chu ahettohsah ahi.

³Hiche lhagao thuseidoh ho sima, chule ja-a, chule asunga kisun thuho chengse nitna chu anunnoma ahi; phat anai jeh hin.

⁴ John'in Asia gama um houbung sagiho hengah: Auma, Aumsa, chule Ahung umdinga konin; chule alal touna anga kona Lhagao sagi-a konin; chule athiho lah-a kona peng masapen, leiset lengho jouse vaipo;

⁵ athu hettohsah ginchat umtah Jesu Christa-a kon chun lungsetle lungmonin umpiuvin. Eiho eingailua athisana ichonset chengseova kona eisoptheng uva,

⁶ chule avaipohna gammi le a-Pathen le a-Pa thempu-a eisemuva chu, loupinale vaipoh thuneina atonsot atonsot geijin ama-a hi jinghen, Amen.

⁷ Veuvin, ama meihotoh kilhonin ahunge; chule mit jousen, asunhotah jong chun amu dingu ahi; chule leiset namtinle phungtin-in a-op achupchup dingu ahi. Chuti chu ahi, Amen.

⁸ Auma, Aumsa, chule Ahung umdinga, Hat chungnung Pakai chun, Keima Alpha le Omega, apatna le achaina kahi, ati.

⁹Jesu'a um thohhatle leng gam chule hesoh genthei nathoh khompiu nasopiu, John, keima Pathen thule Jesu Christa thu hettohsah jeh-a Patmos twi twikol'a chu um kanahi.

¹⁰Pakai nikho ni-a chu keima Lhagaova kaum ahi; chule sumkon gin tobang awgin nasatah khat kanung lama kajan,

¹¹Keima Alpha le Omega, amasa le anunung, kahi: Nathil mu chengse lekhabu-ah sunin lang, hichu Asia sunga um houbung sagi-a: Ephesia, Smyrna, Pergamos, Thyatira, Sardis, Philadelphia chule Laodicea-a gahthotnin, ati.

¹²Chuin kajah-a thuseija aw chu ve dingin, keima kakiheijin ahi. Chuin kakiheitan ahile, sana meivah khom sagi kamui;

¹³ chule meivah khomho lah-a chun khat mihem chapa tobang, aponsil akhophanga lenglha, sana konggah a-opkonga kigah;

¹⁴ aluchangle asam kelngoi mul banna banga, buhbang tobang ahin; amit meikong tobang ahi;

¹⁵akengho chu lhum sunga kigoujol sum-eng kinotval tobang jeng, chule a-awgin chu twi tamtah gin tobang jeng ahi.

¹⁶Chule akhut jet lama ahsi sagi achoijin, akam sunga konin hemto chemjam ahema hem ni ahungdoh-in ahi; chule ama melso chu nisa hasattah-a asat pettoh abangin ahi.

¹⁷Chuin ama kamu phat chun keima athitoh kabang jengin akhophang bulah kalhu jengin ahi. Hichun aman akhut jet lamin eithamin, kajah-a, Kicha hih-in; keima hi amasale anukhah kahi, ati.

¹⁸Chule ahing jinga chu kahi; keima athisa kahi; ahinla, ven, a-imatih chana dingin kahinge, amen; chule thinale damun kot-heh kaneije.

¹⁹Hijeh chun nathilmu chengsele aum chengse chule ahung umding chengse abonchan sunin;

²⁰kakhut jetna ahsi sagi namuho chule sana meivah khom thuguh hi sunin. Ahsi sagi chu houbung sagi solchah ahin, meivah khom sagi chu houbung sagi ahi, ati.