Read Thado Chin Thuphon 11 Bible Online

Thuphon 11 - Thado Chin bible

Thuphon 11

¹ Hichun tenggol lheh lheh pengmol khat keima eipeuvin, vantil chu adingin kajah-a, hitin aseije, Kipat inlang nangman Pathen houin le, amaicham, chule asunga um ahouho chengse khu gaten.

² Houin polam aleitol chu khendoh-in te hih-in; ajeh chu chidang namdangte kipedoh ahitai; chule amahon lha somli le lhani geija khopi theng chu achotpha dingu ahi.

³Chule keiman kathu hettohsah ni thuneina kapeh ding, chule amani chun khaodip pon akisil lhona ni sangkhat le ni jani toh ni somgup sunga thu aseidoh lhon ding ahi.

⁴ Amani chu vannoi leiset Pathen anga dinga Olive thingphung ni chule meivah khom ni chu ahi lhone;

⁵hiteni chu mi khattouvin bolgim dinga agot jouse-a, akamsung lhona kona mei potna amelma chengseu chu akah vam jengji ahi; chule hitia chu koi hile amani chu bolset go-a chu kithat jeng ding ahi.

⁶ Amani chu athu seidoh lai lhona chu go ajuh louna dinga, van khahchah thei ahi lhone; chule amanin suhgamna tintanga leiset asuhgam lhona, twi thisan asosah nomchan lhona, asosah lhon dinga twi chunga thuneina anei lhon ahi.

⁷ Amani chun athu hettohsah achai lhon tengle, lei-onga kona hung pot sahem chun amani chu akisatpia amani chu ajoa atha ding ahi.

⁸ Chuteng Sodom le Egypt, hiche lhagao lam min umna khopi, a-pakaiyu thingpel'a akhetbehnao, khopi sung lamlena chu along lhon kijam ding ahi.

⁹Mitehon, chitin namtinle phungtina min, paotin paotanga min, chule namtin vaipin ni thumle akeh geija along lhon chu avet avet jeng dingu ahi, chule along lhon chu vuiding thu apeh lou dingu ahi.

¹⁰Chule vannoi leiset mite, amani chungchanga chu kipah thanom ding ahiuve, khatle khat kipaman kithotto ding ahiuve; ajeh chu hiche themgao teni chun leiset chung chengho agimbol lhon ahi.

¹¹ Chuin ni thumle akeh jou chun asung lhona Pathen'a kona hinna lhagao alut jeh chun, amani akengin ading gel lhontan ahi; chuphat chun ave veho chu akichata lheh jengtaovin ahi.

¹² Chuin, Hilama hung kaltou lhonin, tia van awgin nasatah aja lhonin ahi. Chutah chun amani chu mei kangtalai jin van'a akaltou lhontan ahi. Chule amelmateu chun amu jingu ahi lhone.

¹³ Hiche pettah chun ling nasatah ahung kihottan ahi, hichun khopi chu hop soma hop khat achimtan ahi; hiche ling kiho chun mi sangsagi athin, chule athimoh chengse chu atijatlot jeh-un van Pathen chu avahchoi taovin ahi.

¹⁴Dana nina chu kichaija ahitai; dana thumna chu hung lhung vahjet ding ahi.

¹⁵ Chuin vantil sagina chun amuttan ahi, chule van'ah aw nasatah atama tamin ahinjomin, Vannoi gamvaipoh hi I-Pakaiyu le a-Christa-a ahitai; chule aman atonsot atonsot geija vai apoh ding ahi, atiuve.

¹⁶Chuin upa somni le liho Pathen anga alaltouna cheh-a touho chu akhupbon alhuvin Pathen chibai aboh-un,

¹⁷Vo Pakai Pathen Hat chungnung, Auma, Aumsa, Ahungding nangma kathangvah-ui; ajeh chu nangman nathuneina chungnung chu nakilah-a vai napoh ahitai.

¹⁸ Namtin vaipi lunghanga ahiuvin, chuin nangma lunghanle, athiho thutan phat, chule nasoh themgaoho le, mithengho, nangma min gingho alen aneo, tohphat man peh phat, chule leiset sumangho suhmang phat chu, hung lhunga ahitai, atiuve.

¹⁹ Chuin van'a um Pathen houin mun theng chu akihongin, chule a-houin Mun Theng sunga chun kitepna thu thingkhong chu akimun ahi; chule kol aphen, aw agingin, van agingin, ling akihottan ahi, chule gel len nasatah alhan ahi.