Read Thado Chin Thuphon 12 Bible Online

Thuphon 12 - Thado Chin bible

Thuphon 12

¹Chuin van'ah melchihna chungnung khat akimun ahi; numei khat nisa-a kijema, akengto noija lhathah uma, chule alu chunga ahsi somle ni-a kijem lallukhuh kikhuh ahi:

²chule amanu chu naovop ahi; chule naoso nat thohgima ham hama ahi.

³ Chuin van'ah melchihna kidangtah achom khat akimu kittan ahi; veuvin, dragon san lentah, alu sagi, chule aki som chule aluho-a chu lallukhuh sagi kikhuh, khat ahung umin ahi.

⁴ Chule amei chun van'a ahsi ho hop thuma hop khat aloilhan leiset chunga aseplhan ahi; chule dragon chu asoh dingkon numeinu anga chun asolhah tihtih acha chu aval lhum jeng theina dingin ading jing jengin ahi.

⁵ Chuin amanun chapa khat ahingtan ahi; ama chun namtin vaipi jouse chunga thih tenggola vai apoh ding ahi; chuin acha chu Pathen hengle alaltouna-ah lahtouvin aumtan ahi.

⁶Chuin numeinu chu gamthip lama ajam mangtan ahi; hikoma chu ni sang khatle ni jani leh ni somgup geija akivahna dinga, amanu chu Pathen'in mun agotpehsa ahi.

⁷ Chuin van'ah gal akisattan ahi; Michael le avantil ho chengsen dragon chu asat taovin ahi; hi chun dragon le asolchah ho jong chun asat thuhtaove;

⁸ahivangin ajoutapouve; chujongle van'ah amaho mun akimu kittapon ahi.

⁹ Chuin dragon len chu gul lui, Diabol le Satan kiti vannoi pumpi lhemlha-a chu, ama chu leijah lelhah-in aumtan ahi; chule asolchahho jong chu amatoh lelhah than aumtaove.

¹⁰ Hichun keiman van'ah aw nasatah khat kajan ahi; Hichun, Tun huhhing, thahat lenggam i-Pathen'uva, chule thuneina chu a-Christa-a ahitai; ajeh chu isopiteu hehsea chu akilehlha-a ahitai, ama chun i-Pathen henguva amaho chu asun ajana ahehset jingji ahi.

¹¹Chule amahon Kelngoinou thisan vangle ahettohsah thu-u vanga ama chu ajokhup dingu ahitai; chule amahon thi geija ahinkho itcha louhel ahiuve.

¹²Hijeh chun, Vo vanho chule asunga cheng chengse, kipah thanomun; leisetle twikhanglen chu ada naove; ajeh chu diabol nahengu hung geisuh ahitai, phat chom chabou anei chu ahen, lunghan chungnunga lunghanga ahi, ati.

¹³Chuin dragon chun leija akilelhah chu amun, hichun acha soh-a chapa khat hinga numeinu chu abolsetan ahi.

¹⁴Chuin numeinu chu ama mun gamthip lama chu gul chun amu phah louna-a alenmang theina dingin, mulaopi lhaving ni akipen ahi; hikoma chu phat khat, phat ni chule phat keh khat geija kivahdoh ahi.

¹⁵Hichun gul chun twi lhohsah theina dingin akamsunga konin numeinu nungsanga chun luipidung tobang leuvin twi aphidoh tan ahi.

¹⁶Ahinla vannoi leisetnin numeinu chu anahun, chuleh leiset in akam anakahomin, gul'in akamsunga kona aphidoh twi luipidung chu anaval jouhel tan ahi.

¹⁷Chutah chun gul chu numeinu chunga chun alunghangin, amanu chilhah ho Pathen thupeh nitle Jesu Christa thu hettohsah jop amoh chengse chutoh kisat dingin akondohtan ahi.

¹⁸Chule achen twikhanglen nel chunga agading tan ahi.