Read Thado Chin Thuphon 13 Bible Online

Thuphon 13 - Thado Chin bible

Thuphon 13

¹ Chutia keima twikhanglen neldi lah-a kadin chun twikhanglen'a kona sahem khat ahung kipatdoh kamui; ama chu aki som ahin, alu sagi ahi; akihoa chun lallukhuh som aume, chule aluho-a chun Pathen taitomna minho aume.

² Hiche sahem kamu chu lutnu toh abangin, akengho chu vompi kengtoh abangin, chule akam chu keipi kamtoh abange; chule dragon chun athahatle alaltouna chule athuneina chungnung ama chu apetan ahi.

³Chujou chun keiman kamui, chuche aluho lah-a khat chu thihela kisat lheh lheh ahi, ahin thihela akisatna chu kiledoh ahitai; chule vannoi pumpin kidangin amuvin ajuitaove;

⁴chule sahem chu athuneina apeh jeh chun mihon dragon chu ahouvun, Hiche sahem tobang koiham? Koiham amatoh kisat thei dinga, atiuvin ahi.

⁵ Hitichun hamhoithonale Pathen taitom na-a thuseina kam apeuvin; chule lha som lile lha ni geija thilbol dingin thahat thuneina apetaovin ahi.

⁶Chutah chun Pathen taitom na-in akamkatan ahi, aminle, achenna, chule van'a chengho jouse ataitomtan ahi.

⁷ Chule mithengho toh kisat dingle amaho chu jou dinga ama chu thahat kipe-a ahi; chule ama chu phungtin leh mite tincheng chule paotin paotangle chitin namtin chunga thuneina kipe-a ahitai.

⁸ Chule leiset chunga chenga mi jousen ama chu ahou dingu ahi; leiset bul kiphudoh tila patna akithatsa Kelngoinou hinna lekhabu sunga amin kisun louho chengse chun.

⁹Nakhang neija aumle ngaihen.

¹⁰ Gal hinga kaidol gal-hinga kikai ding; chemhema mithat aumle chemhema lou ding ahi. Hichea hi mithengho thohhatle tahsan kilanga ahi.

¹¹Chuin sahem chom khatma leisetna kona ahungdoh kamun ahi; ama chu kelngoinouva tobang aki ni ahin, chule dragon bang bangin thu aseije.

¹²Chule ama chun sahem masapa thuneina jouse chu ama angsunga amangchan ahi. Chule ama chun vannoi leisetle asunga chengho jouse, thihela akisat kiledoh kit sahem masa chu ahousah tan ahi.

¹³Chuin ama chun melchihna thil nasatahtah abolin, miho mitmun van'a kona leija mei lhahsah geijin abolin ahi.

¹⁴Chutia chu sahem mitmu-a chu melchihna tintang bolna ding thahat ama chu kipe-a ahi, hichea chu aman vannoi leiset chung chengho asuhlamvai ahi; ama chun leiset chung chengho jah-a, Chemjam'a kisat lem kiledoh kit sahem chu alim khat semun, ati.

¹⁵Chule sahem lim chun thu asei theina dinga, chule chuche sahem lim chu ahou lou jouse akitha theina dinga, ama chun sahem lim sunga chu hinna hu akhum ding, hichan geija chu thaneina kipe-a ahi.

¹⁶Chule ama chun aneo alen, ahao avai, chamlenle soh, hicheng jouse chu akhut jet lamu ahim, achaluva ahima, melchihna chu aban neisah ahi;

¹⁷chule chuche sahem melchihna, amin chu ahiloule, amin number neilou chun, cho theita lou, joh theita lou ahi.

¹⁸Hichea hin hetna chihna akilange; lungthim theman hiche sahem number chu simhen; ajeh chu hichu mihem number ahi; chule hiche number chu Ja gup le somgup le gup ahi.