Read Thado Chin Thuphon 14 Bible Online

Thuphon 14 - Thado Chin bible

Thuphon 14

¹ Chujou chun, veuvin, Kelngoinou chu Sion mol chunga chu adin kamun, mi sang ja khatle sangsomli le sangli toh ahi; amaho chu achaluva ama minle a-Pa min kisuna ahi.

²Chuin van'a konin twi tamtah gin lheh lheh le van gin lheh lheh aw kajan; ka-aw jah chu selangdah tumhon aselangdah cheh atumu gingtoh abangin ahi.

³Chule amaho chun laltouna ang le ganhing liho chule upaho anga chun la thah khat asauvin ahi; chule vannoi leisetna kona achohdoh mi sang ja khatle sangsomli le sang liho tailou chu, adang koimacha hiche la chu kichuh them thei lou ahi.

⁴Amaho chu numei chunga kisuboh louhel ahiuve; amaho chu suhkhah loulaihel nungah thengsel ahiuve. Amaho chu kelngoinou chena chana anung nung juileho chu ahiuve. Pathen'a dingle Kelngoinou dinga aga masa tia, amaho chu mihemte lah-a kona kichodoh ahitaove;

⁵ chule amaho chu akam sunguva thujou pot kihekha louhel ahiuvin; Pathen laltouna anga monabei ahiuve.

⁶Chujouvin keiman vanlaijola vantil leng lele khat kamui; ama chun leiset chunga cheng, chitin namtinle, phungtin, chule paotin paotangle, miteho henga seiphongle dinga tantih neilou Kipana Thupha anei ahin,

⁷ama chun aw nasatah-in asamin, Pathen gingun, aloupije chu vahchoijun; ajeh chu athutan avaihom phat ahung lhungtan ahi; chule vanle, lei, twikhanglen, twinah jouse, hichengse sema chu houvun chibaijun, ati.

⁸ Chuin vantil anina achom khat ama nung nunga chun achelen, Ajonthanhoi jeh-a lunghanna lengpi ju chitin namtinle phungtin donsah-a Babylon khopi chungnung tah chu achimtai, achimtai, ati.

⁹Chuche jou chun vantil thumna chun amani nung nung chu ajuijin hatah-in asamin, Koi hile sahem chule alim chu houva chibai boh-a, chule achala ahim, akhut ahima, amelchihna kinamdoh chu kilah-ah aumle,

¹⁰ ama jong chun Pathen lunghanna khona chu alunghana lengpi ju imatoh hal louhel gotsa kikoi chu adon tei ding ahi; chule vantil thengho mitmule Kelngoinou mitmu-a chu meile kath kah nat athoh gim dingu ahi;

¹¹ amaho nat thohgim meikhu chu a-imatih chana kitungdoh jing jenga ahi; chule chuche sahem chule alim chu houva chibai boh-a chule koi hile amin melchihna kilah chan chu, asun ajana oltih nei louhel ahiuve.

¹²Hichea hin Pathen thupeh hole Jesu tahsan thu nit mithengho thohhatje thu akilangin ahi.

¹³Chuin van'a aw ahung gingin, Sunin, tukala Pakai mina thiho chengse chu anunnoma ahiuve; ahi, amaho chu atohgim naova kona cholnga ding ahiuvin, anatoh chengun anungu ajui ahi jeh chun, tia Lhagaovin kajah-a asei chu kajan ahi.

¹⁴ Chuin kavetle, veuvin, meibang khat chule achunga chu mihem chapa lheh lheh, alua sana lukhuh kikhuh-a, akhutna koite hemtah khat kichoija tou kamun ahi.

¹⁵ Chuin houin sunga kon chun vantil chom dang khat ahung potdoh-in meibang chunga toupa jah-a chun aw sangtah-in asamin, Nakoite paninlang chang attan, nang dingin a-at phat ahitai; vannoi leiset chang aminin akoitai, ati.

¹⁶Chuin meibang chunga toupa chun vannoi leiset chungah akoite alamtan ahile, hichun vannoi leiset chang aki-at tan ahi.

¹⁷Chuin van'a houin sunga kon chun vantil chom khat ahung potdoh kitleuvin; ama jong chun koite hemtah khat aneijin ahi.

¹⁸Chuin vantil chomdang khat mei chunga thuneija chu maichama konin ahung potdoh-in, koite hemtah choipa jah-a chun aw sangtah-in asamin, Nakoite hemtah chu paninlang vannoi leiset lengpiga abohho at khomtan; aminsoh ahitah jeh khun, ati.

¹⁹Chuphat chun vantil chun akoite apanin vannoi leiset lengpiga abohho chu a-at khomin, Pathen lunghanna lengpiga hehna len chungnung khuh sunga chun asep luttan ahi.

²⁰ Chule khopi polama lengpiga hehna khuh sunga chun achilun ahile, lengpiga hehna khuh sunga kon chun thisan ahung sohdoh-in, ching sang khatle ching ja gup geijin sakol kamdal chan gei aphan ahi.