Read Thado Chin Thuphon 15 Bible Online

Thuphon 15 - Thado Chin bible

Thuphon 15

¹Chujou chun keiman van'ah melchihna thil kidang chungnung tah achom khat suhgentheina nukhah sagi neija vantil sagi kamun; hicheng chu suhgentheina kichaina ahi; ajeh chu Pathen lunghan hichenga chu kichaisoh ahi.

²Chuin meitoh kichoh hal phatvet twikhanglen tobang khat kamun; sahem chule alim chule amelchihna chule amin Number chu neh jouva, chuchenga kona kihuh dohho chengse chu Pathen selangdah akichoijuva, phatvet tobang twikhanglen panga chu adin jingu kamun ahi.

³ Amaho chun Pathen soh Mosi la chule Kelngoinou la chu asauvin, Vo ijakai, bol thei Pakai Pathen, nangma thilbol hi aloupin akidange; Vo mithengte Lengpa, nangma lampi adih-in akitah-e.

⁴ Pakai, koiham nakicha lou dinga? Chule nangma min vahchoi lou dinga koiham? Ajeh chu nangma jengbou atheng nahi; ajeh chu nangma chonphat thilbol kiphon jeh-a hi chitin namtin nangma anga hung kun cheh ding ahi, atiuve.

⁵ Hiche jou chun, veuvin, van'a hettohsahna houin dan sungnung Mun Theng chu akihon kamun;

⁶chule houin'a kon chun suhgentheina sagi chunga thuneija vantil sagi chu ahung potdoh-un, tonjih ponnem manlutah athena thengin akivonun, sana konggah a-om uvah akikouvin ahi.

⁷Chuin ganhing liho lah-a khat chun vantil sagiho chu a-imatih chana hing jing Pathen lunghanna dimset sana sumlheng sagi apetan ahi.

⁸ Hichun Pathen loupinale thunei na-a kon meikhu chu houin sung chu adimset jengtan ahi; chule vantil sagi chun suhgentheina sagi chu abulhit masangseu chun koimacha houin sunga chun alut theipon ahi.