Read Thado Chin Thuphon 16 Bible Online

Thuphon 16 - Thado Chin bible

Thuphon 16

¹Chujouvin houin sunga kon chun vantil sagiho jah-a, Nangho cheovinlang Pathen lunghanna sumlheng sagi chu vannoi leiset chungah gabung lha uvin, tia hasaptah-a kisam aw kajan ahi.

² Hichun vantil amasapen chu achen vannoi leiset chunga asumlheng chu abunglhatan ahi; hichun sahem melchihna neile alim houva chibai boh miho tichunga chun anat hoisetah tina achutan ahi.

³Chuin vantil anina chun twikhanglen'a asumlheng abunglhan ahile; hichu mithi thisan bangin thisan asohtan ahi; chule ganhing jouse abonchan athigamtan ahi.

⁴ Chuin vantil athumna chun luidungle twinahho jouse-a asumlheng abunglhan ahile; hichun hichu thisan asohtan ahi.

⁵Chuphat chun twi vantil chun hitia asei kajai, Vo Pakai, Nang Auma, Aumsa, chule Thengtah, Dihtah nahi; hicheng jeh-a chu nangman hitia hi thu natan ahitai;

⁶Ajeh chu amaho mithenghole themgaoho thisan anasou ahi; hijeh-a chu nangman jong amahon adon dinguva thisan napeh ahitai; hichu amaho chandia lomtah ahi, ati.

⁷Chujou chun maichama kona hitia kisei chomkhat kajan ahi, Ahi, Pakai Pathen, Hat chungnung, nangma thutan vaihom chengse hi akitah-in chule adihsoh keije, ati.

⁸Chuin vantil alina chun nisa chunga asumlheng abunglhan ahile; hichun miho chu meija asahgop dingin thuneina apetaovin ahi.

⁹Chuin miho chu asajapjappi chun asanggoptan ahile, hiche suhgentheina sagi chunga thunei Pathen min chu ataitomun, aloupina chu vahchoi dingin alungu aheipouvin ahi.

¹⁰ Chuin vantil angana chun sahem laltouna chunga asumlheng abunglhan ahile; hichun agamsung mu athimsohtan; chule amaho chun anat thohlel jeh-un alei apettaovin ahi;

¹¹chule anat thohgim ule atina thohlel jeh-u chun van'a Pathen ataitomun, achonnau athilbol uva konin alung aheipouvin ahi.

¹² Chuin vantil agupna chun Euphrates luipi-a asumlheng abunglhan ahile; hichun nisona lama kona hung ding lengho dinga lampi gotsa aum theina dingin, chuche luipi dung twi chu akangtan ahi.

¹³Chuphat chun dragon kam sunga konle sahem kam sunga kon chun, chule themgao lhem kam sunga kon chun uphoh tobang lhagao boh thum ahungdoh kamun ahi.

¹⁴Hitiho chu thilhaho lhagao ahiuvin, melchihna kidang dang, vetsah ahiuve; amaho chun imajouse bolthei Hat chungnung Pathen, nikho loupi chungnung ni-a galsat dinga vannoi leiset pumpi-a lengho kikhopsah dinga, amaho henga chu chea ahiuve.

¹⁵ Veuvin, keima gucha bangin kahunge. Koi hile kihong jinga sagoh-a auma ajachat kiphon louna dinga aponsil kivetphat jing mi chu anunnom ahi.

¹⁶ Chuin amaho chun Hebrai paova Armageddon atiu mun laija chun amaho chu akikhopsah taovin ahi.

¹⁷Chuin vantil asagina chun vanlaijola asumlheng abunglhan ahile, hichun van houin'a konle laltouna-a konin, Akichaitai, tin aw sangtah ahung soh-in ahi.

¹⁸Hichun kol aphen, aw agingin, van agingin ahitai, chule vannoi leiset chunga mihem umtilla patna chutobang lingpi kihotkha louhel, hitobangtah chun ling akihottan ahi.

¹⁹Hichun khopi chung nung chu hop thum akisotai, chule chidang namdangte khopi chengse chu achim lhagamtan ahi; chule Pathen lunghan chung nungna lengpiga ju khon chu peh dingin, Babylon khopi chungnung chu Pathen anga geldoh jingin aumtan ahi.

²⁰ Chule twikol gam jouse ajam manggam tan, molle lhangho jong akiholmotan ahi.

²¹ Chuin mihemte chunga, van'a konin agih talent khat toh kikot gel len nasatah alhan; hiche gelpi chun asuhgam jeh-u chun mihem ten Pathen ataitom taovin ahi; ijeh ham itile hichu nasa behseh jenga ahi.