Read Thado Chin Thuphon 17 Bible Online

Thuphon 17 - Thado Chin bible

Thuphon 17

¹ Chujouvin sumlheng sagi choija vantil sagiho lah-a khat chu kahenga ahungin, eikihoupin, kajah-a, Hungin, twi tamtah chunga tou notinu matding talen chu vetsah ingkate;

² Amanu chutoh leiset lengho ajong taovin, chule ajonthanhoina lengpiga ju-a vannoi leiset chung chengho akham ngolsah soh gamtan ahi.

³ Hiche chun ama chun, Lhagaovin gamthip lama eipuitan ahi. Hichun, Pathen taitomna min dimset, chule alu sagi, aki som nei, sahem santhip chunga tou numei khat kamun ahi.

⁴ Hiche numeinu chun pon sanduple ponsanthip asilin, sana, khisong mantam jengle twikohchangin akijemin; chule akhutna chun thil thet umtahle ajonthanhoina bohnen dimset sana khon khat akichoijin ahi;

⁵chule achala chun hiche min hi akisune, THUGIL, BABYLON KHOPI CHUNGNUNG, VANNOI LEISET NOTI HO LE THILTHET UMTAHHO NU.

⁶Chule numeinu chu mithengho thisanle Jesu thu hettohsah ho thisana kham ngolin kamun ahi. Amanu chu kamun kidang kasa behseh jengin ahi.

⁷Hichun vantil chun kajah-a, Ibola kidang nasah ham? Khuche numeinu le apuilea, alu sagi, aki som nei, sahem thuguh khu seipeh-inge.

⁸ Sahem namu khu aumsa ahin, umtalou ahi, ama lei-onga kona hung kaltouna manthah na-a che ding ahi. Chule vannoi leiset kisem tila patna hinna lekhabua amin kisun lou, leiset chung chenghon aumsa, tu-a umtalou, khonunga hung umding sahem chu amu tengule, ama chu adatmo lheh dingu ahi.

⁹Hichea hin chihna lungthim them thu aume. Alu sagi chu mol sagi ahi; hicheng chunga chu hiche numeinu chu touva ahi;

¹⁰chule hicheng chu leng sagi jong ahiuve; amaho lah-a nga chu alhusa ahitan, khat aumpet ahi, chule khat vang chu um loulai ahi; ama chu um jongle chomcha khatbou umding ahi.

¹¹Chule chuche sahem, aumsa, umtalou chu, amatah chu agetna ahi, chule sagiho loija mi mama khat ahi; ama chu manthah na lama che ding ahi.

¹² Chule nangman aki som namu chu leng som ahi; amaho chu tua gam nei loulaiho ahiuve; ahinla nidan kah khat sunga dinga sahem chutoh thakhat tah-a gam vaipohna thu anei khom dingu ahi.

¹³Amaho chu thu khat akisauvin athahat naole athuneinau hiche sahem chu apeuve.

¹⁴Amaho chu Kelngoinou chutoh kisat ding ahiuve; hintin Kelngoinou chun amaho chu ajo ding; ajeh chu ama pakaiho Pakai le lengho Leng ahi, chule aumpiho chengse jong akikoule lhenchom chule tahsantah cheh ahiuve, ati.

¹⁵Chuin ama mama chun kajah-a, Nangman namu twi tamtah notinu touna chu twiho chu mitehole mipi chule namtin vaipi, chule paotin paotangho ahiuve.

¹⁶Chule namu ki som chule sahem chun notinu chu ahot dingu, chule imacha nei louhel le sagohkeova alha dingu, chule meija agovam dingu ahi.

¹⁷Ajeh chu Pathen thu guilhun kahse-a alunggot suhbukimna dinga amaho chu lung khat ahiuve, agam cheh-u sahem chu apehna dinguva, Pathen'in alungu achothou ahi.

¹⁸Chule nangman namu numeinu chu, vannoi leiset leng jouse chunga vaipo, khopi chungnung chu ahi, ati.