Read Thado Chin Thuphon 19 Bible Online

Thuphon 19 - Thado Chin bible

Thuphon 19

¹Hicheng jou chun van'ah mipi atama tam aw gin lheh lheh nasatah kajan, Halleluijah; huhhingnale loupina chule thahat thuneina Pakai i-Pathen'uva ahi;

² ama thutan vaihom akitah jehle adih jeh ahi; ajeh chu ajon thanhoija leiset suchavaija noti lennu chu aman athu atanin, amanu khutna atanin, amanu khutna kon asohte phu chu alatan ahi, atiuve.

³ Chuin avel velin, halleluijah, atiuve. Chule amanu khu chu tonsot geija kitungdoh jing jeng ding ahitai.

⁴Chujou chun upa somni le liho chule ganhing liho chun laltouna-a tou Pathen chu ahouvun, Amen, Halleluijah, atiuvin ahi.

⁵ Chuin laltouna-a kon chun aw khat ahung sohdoh-in, Vo Pathen sohteho, ama ginga nangho chengse alen aneo nabonchaovin, Pathen chibaijun vahchoijun, ati.

⁶ Chujou chun mipi atama tam aw gin tobangle twi tamtah lon gin tobang, chule van gin tobangin kajan, Halleluijah; I-Pakaiyu Pathen, Hatchung nungin, vai apohtah jeh hin.

⁷Hungun, kipa thanop boluhitin, aloupina vahchoi uhite; ajeh chu Kelngoinou chu ajineina ding aphat ahitai; aji dingnu chu kigosa dema uma ahitai.

⁸Chule aji dingnu chu akijepna ding tonjih ponbang, ngimsel val lailai, kipe-a ahitai; hiche tonjih ponnem chu mithengho chonphatna ahi.

⁹ Chuin ama chun kajah-a Kelngoinou ji kipuina golvahna-a kikouho chu anunnom ahiuve, tin sunin, eiti. Chuin ama mama chun kajah-a, Hicheng hi Pathen thu dihtah ahi, ati.

¹⁰Hichun keima ama chu hou dingin akho bulah kaboh khuptan ahi. Chuin aman, Chingtheijin, hitobang chu bol hih-in; keima nasoh chanpi chule Jesu thu hettohsah nasopiteho soh chanpi kahibouve; Pathen jengbou nahou ding ahi, ajeh chu Jesu thu hettohsah chu gao thu seidoh lhagao ahi, ati.

¹¹ Chuin keiman van kot kihon kamun ahi; chule, veuvin, achunga toupa chu amin Tahsan umle Dihtah akitin ahi; ama chu chon dihtah-a thutan vaihoma chule galsat ahi.

¹² Ama chu amit meikong ahin, alua lallukhuh tamtah kikhuh ahi, chule amin khat akisunin, amin chu ama tailou koimacha dangin ahepoi.

¹³Chule aponsil chu thisan kithe khuma ahi; chule amin chu Pathen Thu kitia ahi.

¹⁴Chule van sepaiho chengse tonjih ponneljet vamleng le ngimsel akisilun, sakol kang chunga anung ajuijun ahi.

¹⁵ Chuin namtin vaipi asatna dingin akam sunga konin chemjam hemtah khat ahungdohtan ahi; ama chun achunguva thih tenggola vai apoh ding ahi; chule Hat chungnung, Pathen lunghanna kichat umtah lengpiga hehna-a jong chu aman achilji ahi.

¹⁶Chule aponsil chungle amalbuh laija, LENGHO LENGLE PAKAI HO PAKAI, tia min kisun khat aume.

¹⁷ Chuin keiman nisa chunga dinga vantil khat kamun; chule ama chun vanlaijola lengle-a vachate jouse jah-a,

¹⁸Hungun, nanghon lengho sa, sepai lamkaiho sa, ahat apaoho sa, sakolhole achunga touho sa, chamlenle soh ho sa, aneole alenho jouse sa, nedingin Pathen golvahna chungnungah hung kikhomun, tin asamin ahi.

¹⁹Chuin sakol chunga toupale asepaiho chutoh kisat dingin, sahem chule leiset lengho chule asepaite chengseutoh akikhomun kamui.

²⁰ Chuin sahem chu amantaovin; chule themgao lhem, amitmua melchihna kidang dang bola sahem melchihna kilahhole alim chibai bohho lhemlha-a sulamvaija chutoh amattha taovin ahi; chuin kath meika al-lenglung jing jeng mei dilah ahingin alehlut taovin ahi.

²¹Chule adang amoh chengse chu sakol chunga toupa kam sunga kona hung potdoh chemjam chun athat gamtan ahi; chuin vachate jouse ahungun asao chu ahung neuvin avaset taovin ahi.