Read Thado Chin Thuphon 2 Bible Online

Thuphon 2 - Thado Chin bible

Thuphon 2

¹Ephesia'a um houbung solchah hengah hiti hin sunin: Akhut jet lama ahsi sagi choija sana meivah khomho lah-a vahlea chun hitin aseije:

²Keiman nanatoh ho jouse, chule nathohgimle nathohhat chu kahei; chule, Solchah kahi, tia solchahla hilou, amaho jong chu napatep-in, nakholjin ajou namandoh jengin ahi;

³chule thohhat tah-a kamin jala thoh thoh-a lhadah lou nahi.

⁴Ahivangin nachunga demna kaneije: nangman nangailut masa chu nalhatai.

⁵Hiche jeh chun nangma hoija kona nalhuh ham; hichu geldoh-in, chule nalung heijin, nanatoh masah ho chu tongin; achuti louva nalung nahei loule, nahenga gangtah-a kahunga nameivah khom chu aumna-a kona kachon mang ding ahi.

⁶Ahinla Nicolaitan ho chon keiman kahot chu, hicheho chu nangman jong nahon ahi, hiche phatna chu naneije.

⁷ Nakhang nei chanin houbung ho jah-a Lhagao thusei hi ngaihen. Ajouva chu keiman Pathen ollim daija um hin thingga kanehsah ding ahi.

⁸ Chule Smyrna-a um houbung solchah hengah hitin sunin: Amasale anukhah, thitasa hing kit chun hitin aseije:

⁹Keiman na natoh nagenthei, nahesoh chule navaichat kahenai (ahin nangma nahaonai), Juda mi kahi, tia Juda mi hilou, Satan vaipi kikhopnajoh ahiuva, hou thu ataitomu jong chu kahenai.

¹⁰Thil nahinthoh dingho hi kicha hihhelin; ven, napatep na-a nalah uva mi abang bang chu diabolin songkul'a akhum ding koncha ahi; chule hesoh genthei ni som nathoh dingu ahi. Nangman nathi geijin tahsanin; chule keiman nangma hinna lallukhuh kapeh ding ahi.

¹¹ Nakhang nei chanin houbung ho jah-a Lhagao thusei hi ngaihen. Ajouva chu thi nina chun asuhnat lou ding ahi.

¹²Chule Pergamos'a um houbung solchah henga hitin sunin: Hemto chemjam ahema hem nei Pan thu hicheng hi aseije:

¹³Nangma na natoh chule hoi laija cheng nahi kahenai, Satan laltouna muntah chu ahi; chule nangman kamin natuh det jinga, chule Satan chenna nangho lah-a ginchat umtah, kathu hettohsah Antipas, atha laiju sana jong keima tahsana seilep lou nahi.

¹⁴ Ahivangin nachunga demna thil themkhat kaneije, ajeh chu Israel chate masanga kipal lhuhna koija, milim houna sa nehsah dingle jonsahna dinga, Baalak lungthim pe-a hila, Baalam thuhil choija hikoma chun naneijui.

¹⁵Chutobangma chun kathil ki-dah pen Nicolaitan ho thuhil choija jong naneijui.

¹⁶Hijeh chun nalung heijin; achuti loule nahenga gangtah-a hung ding kahi; chule kakam sung chamjama amaho chu gala kasat ding ahi.

¹⁷ Nakhang nei chanin houbung ho jah-a Lhagao thusei hi ngaihen. Ajouva chu guhthim manna kapeh ding ahi; chule songkang khat jong kapeh ding; hiche songa chu min thah khat kisuna ahi; asangpa tailou koimacha dangin hiche min chu ahepoi.

¹⁸Thyatira-a um houbung solchah hengah hitin sunin: Amit meikong tobanga, akhophang sum-eng kinotval bangah Pathen Chapa chun hitin aseije:

¹⁹Nathilbol jousele, nangailut chule natahsanje, chule nalhacha natoh hole, nathoh hatje, chule nathilbol masah sanga nathilbol nunung anasatjoh chu kahenai.

²⁰ Ahivangin nachungah demna kaneije, nangman Jezebel kithemgaosahnu chu navethim in naum sah-in ahi, ama chun jonthanhoi dingle milim houna sa neh din thu ahilin, kasohte alhemlhan asulamvaijin ahi.

²¹Keiman hinu chu alung heina ding phat kapeh ahi; ahinla aman ajon thanhoija konin alung ahei nompoi.

²²Veuvin, keiman amanu chu ajalkhuna kajamhel ding ahi; chule ajonpiho chengsen jong amanu chonna-a kona atanuva alung ahei louvule, hesoh gentheina chungnung tah-a kalelut ding ahi.

²³Chule thi gamna-a achateho katha gam ding ahi; chuteng chule houbung jousen keima lungthim gille lungsung kholtoh soh kahi, hi ahet dingu ahi; chule keiman nangho nathilbol dungjui uva kapeh cheh ding nahiuve.

²⁴Ahivangin Thyatira-a amoh nalah uva um, hiche thuhil chu jop lou aumin, mi abanghon thugil atiu, Satan thugil chu helouho chengse chu, najah uva kasei ahi, nangho chunga pohgih imacha dang belap ponge.

²⁵Ahin nanei sun-u chu kahung kahsen tuh det jingun.

²⁶Chule ajouva akhon ni geija kathilbol chengse nit chu, keima pa-a kona kamu banga, ama chu namtin vaipiho chunga thuneina kapeh ding ahi;

²⁷Chutengle ama chun thih tenggola vai ahoma beldengho bel akea ahal hala aum banga, abolding ahi;

²⁸Chule keiman ama chu Jing Valpa kapeh ding ahi.

²⁹Nakhang nei chanin houbung ho jah-a Lhagao thusei hi ngaihen.