Read Thado Chin Thuphon 21 Bible Online

Thuphon 21 - Thado Chin bible

Thuphon 21

¹ Chujou chun keiman van thah lei thah kamun ahi; ajeh chu van masale lei masa chu kitol manga ahitai; twikhanglen jong aumtapoi.

² Chule a-inneipu henga dinga kijema kigosadem mounu banga khopi theng, Jerusalem thah chu, Pathen kom van'a kona ahung kumlhah keima John nin kamun ahi.

³ Chuin keiman van'a kon chun, aw sangtah-a thu kisei kajan, Veuvin, Pathen chenna chu mihem lah ahung hitai, chule ama amahotoh cheng khom ding; amaho chu ama mite hi ding ahiuve; chule Pathen amatah mongin aumpi dingu, chule a-Pathen'u hi ding ahi;

⁴ chule amit uva amitlhi chengseu atheh ngim ding; chule thina umta louhel ding; chule lhasetnale kana chule nat thohgim umtalou ahi; thil masaho chengse chu kitol mangsoh ahitai, ati.

⁵Chuin laltouna-a toupa chun, Veuvin, keiman ijakai kathahsem sohkeije, ati. Chuin ama chun, kajah-a, sunnin; ajeh chu hicheng hi tahsan umle thutah ahi, ati.

⁶ Chuin ama chun kajah-a, Hichengse chu kichaija ahitai! Keima Alpha leh Omega, akipatna leh akichaina kahi. Adangchah-a chu hinna twinah-a twi chu manbeijin penge.

⁷ Ajou chanin hicheng hi alo ding ahi; keima a-pathen hingting, ama kachapa hi ding ahi.

⁸Ahin mi kichaseho, tahsan neilouho, thet umho, tolthat teho, jon panho, doi choiho, milim houho, chule mijouho jouse meile kath meika al-lenglung jing jeng mei dila chu achan dingdol cheh chang ding ahiuve; hiche thi nina ahi, ati.

⁹Chuin suhgamna nukhah dimset sumlheng sagi nei vantil sagiho lah-a khat chu kahenga ahungin, kajah-a thu aseijin, Hilama hin hungin; keiman nangma Kelngoinou inneipi ding mou chu vetsah inge, ati.

¹⁰ Chuin ama chun keima Lhagaovin molsang lentah chungah eilhoh touvin, Pathen kom van'a kona hung kumlha-a, Pathen loupina nei khopi len, Jerusalem theng chu, eimusahtan ahi.

¹¹Avahje dan chu khisong man tamtah abangin, jasper song lheh lheh ahin, songval valin avalin;

¹² akul chu lentah chule sangtah ahin, akot somleni ahi; kot somle ni-a chun vantil somleni aumin; chule min phabep khat chua chun akisunin; hichu Israel chate phung somle phung ni min ahi.

¹³Akot chu thumin niso lam angan, thumin sah lam angan, thumin lhang lam angan chule thumin nilhum lam angan ahi.

¹⁴Chule khopi kul chu akhombul somleni ahin; hicheho chunga chu Kelngoinou solchah somleni ho min chu kisuna ahi.

¹⁵ Chule khopi chule akotle akul chu tena dingin, kajah-a thuseipa chun gamtena sana tenglhon achoijin ahi.

¹⁶Khopi chu aning li kitoh, adung avai kibang ahin ahi. Chuin gamtena tenglhona khopi chu atele, mail sang khatle mail ja nga ahi; adung, avai, atun kibang sohkei ahi.

¹⁷Chujouvin kul chu aten ahile, tong ja khatle tong som lile li ahi; vantil thiltena chu, mihem thil tena jong ahi.

¹⁸ Chule kul kiget chu jaspi songa kigen ahi, chule khopi chu phatvet thengtah tobang sana thenga kisa-a ahi.

¹⁹Khopi khombul song chu khisong mantam jat chom jat choma kijema ahi. Khombul masapen chu jasper khisonga kijem ahin, abana chu sapphir khisong ahin, athumna Chalcedon khisong ahin, alina emerald khisong ahin;

²⁰Angana sardonyx khisong ahin, agupna sardius khisong ahin, asagina chu chrysol khisong ahin, agetna beryl khisong ahin, akona chu topaz khisong ahin, asomna chu chrysopras khisong ahin, somlekhatna jacinth khisong ahin, somle nina chu amythyst khisong ahi.

²¹Akot somleni chu twikohchang khat khatna kisem ahi. Chule akho sung lamlen chu phatvet thengsel tobang sana theng ahi.

²²Chule asunga chun houin kamupoi; Pakai Pathen Hat chungnung chule Kelngoinou chu a-houin ahi jeng jeh chun.

²³ Chule khopi chun asalvah dinga nisa jong ngaita lou, lhathah jong ngaita lou ahi; ajeh chu Pathen loupi chun avahsah jeng ahin, chule Kelngoinou chu ameivah hi jenga ahi.

²⁴ Chule huhhingsa namtin vaipi avah-a chu vahle ding, chule leiset lenghon aloupinao asunga chu ahinpoh lut dingu ahi.

²⁵ Chule akotkhahho chu a-imatih chana suna kikhah lou ding ahi (chua jan umtalou ding ahi jeh chun);

²⁶chule namtin vaipin loupinale jabolna asunga chu apoh lut dingu ahi.

²⁷ Chule iti nama jongle thil aboh pou poule thet um thil bola chule jou pana lut louhel ahi: Kelngoinou hinna lekhabua amin kisunho chengsebou chu lut ding ahi.