Read Thado Chin Thuphon 22 Bible Online

Thuphon 22 - Thado Chin bible

Thuphon 22

¹ Chuin ama chun Pathen le Kelngoinou laltouna-a kona put hintwi theng luidung crystal songvala val, khosung lamlen lailunga chu eivetsah tan ahi.

² Chule luidung chu apang langto-a hinthing keh ahin aga jat chom chom somleni ga-a, alha seh-a ga jing jeng ahi; chule thingnaho chu namtin vaipi boldamna ahi.

³ Chule sapset umta louhel ding ahi. Chule Pathen le Kelngoinou laltouna chu asunga chu umding ahin, chule asohten ama chu ajen dingu;

⁴Chule amahon amai amu dingu, chule achaluva amin umding ahi.

⁵ Chule jan umta louhel ding ahi; chule amahon thaomei vahle nisa vah ngaita louhel ahiuve; Pakai Pathen'in amaho asalvah ding ahi jeh chun; chule amaho chun atonsot atonsot geija vai apoh dingu ahi.

⁶Chuin aman kajah-a, Thu hicheng hi tahsan umle dihtah ahi; chomkhat joule hung soh ding hichengse chu themgao thengho Pakai Pathen'in asohte vetsah dinga avantil asol ahi.

⁷Chule, ven, kahungvah ding ahi; hiche lekhabua lhagao thuseidoh ho chengse nitpa chu anunnom ahi, ati.

⁸Kei John tah-in hichengse hi kajah chule kamu ahi. Kajah-a chule kamu phat chun hichengsepi eivetsahpa vantil anga chun, ama chu chibai boh dingin kaboh khuptan ahi.

⁹Hichun aman kajah-a, Chingtheijin, hitobang chu bol hih-in, keima nangma soh chanpile nasopi themgaoho sohchanpi chule hiche lekhabua thu nit teho sohchanpi kahibouve; Pathen joh chibai bohtan, ati.

¹⁰Chuin aman kajah-a, hiche lekhabua lhagao thu kiseidohho hi imchah hihhelin; phat anaitah jeh hin.

¹¹ Achonpha lou chun chonphat lou bol jinghen; aboh chu boh jinghen; chule achonpha chun chonphat bol jinghen; athenga chu athengin umjing hen.

¹² Veuvin, keima kahungvah ding ahi; chule athilbol achonna dungjui cheh-a lethuhna kapeh ding tohman kakoma aume.

¹³ Keima Alphale Omega kahin, amasale anukhah kahi, chule abul leh aleh kahi.

¹⁴ Hinthing chu lo theina dingle kotpi-a lutna khopi sunga lut theina dinga, athupeh nit ho chu anunnom ahiuve.

¹⁵Uicha hole doi choiho, chule jon thanhoi panhole tolthat teho, chule milim houho, chule thujou sei ngailu-a semdoh ho pamah aumui.

¹⁶ Kei, Jesu'n, houbung ho-a dinga hicheng thuhi nangho hettohsah dinga kavantil kahinsol ahi. Keima David jungpile achilhah, Jing Valpa vahtah chu kahi.

¹⁷ Lhagao le mouvin, Hungin, ati lhone; ajachanin, hungin, tihen; chule adangchah chan hunghen; ago chanin manbeijin hintwi chu kilahhen.

¹⁸ Hiche lekhabua lhagao thuseidoh hi ajachan kahet tohsah-a kaseipeh ahi, Koi hile hicheng hi abelap aumle, Pathen'in hiche lekhabua kisun suhgam naho chengse hi achunga abelap ding ahi.

¹⁹Chule koi hile lhagao thuseidoh hiche lekhabua thuho lamanga aumle, Pathen'in hiche hinna lekhabua kisun hinthinga konle khopi thenga kona chule hiche lekhabu sunga kisun thilho-a kona hi achan alahmang ding ahi.

²⁰Hicheng thu hettohsah chun, Ahi, kahungvah ding ahi, ati. Amen, hitichun Pakai Jesu, hungin.

²¹I-Pakaiyu Jesu Christa milungset nachun, mithengte nabon chaovin umpiuvin, Amen.