Read Thado Chin Thuphon 3 Bible Online

Thuphon 3 - Thado Chin bible

Thuphon 3

¹Chule Sardis'a um houbung solchah henga hitin sunin: Pathen Lhagao sagile ahsi sagi neija chun hitin thu aseije: Keiman nathilbol kahenai, nangma amina ahinga nahin, hinla athisa nahibouve.

²Khangin lang hah jingin umin; chule adang athikonho chengse chu suhalin din detsah-in; ajeh chu Pathen mitmu-a nathilbol achamkimsa imacha kamupoi.

³ Hijeh chun nangman atila iti natahsana, iti najah ham, hichu geldoh-in, hichu nitphan, chule nalung heijin. Hah jinga naum louva ahile, gucha banga nahenga kahung ding ahi, chule itih phatle naheng kahinsuh nahet louhel ding ahi.

⁴Ahinla apon kisuhnen lou mi phabep khat Sardis'a aumui; amaho chu ponbang vamleh silla keimatoh kavale dingu ahi; ajeh chu amaho hiche dinga chu kilomtah ahiuve.

⁵ Ajouva chu ama jong chutia chu ponbanga kijem ding ahi; chule keiman ahing lekhabua kona ama min chu kathaimang louhel ding ahi; ahin ka Pa angsungle avantil chengse angsunga ama min chu kaseidoh ding ahi.

⁶Nakhang nei chanin houbung ho jah-a Lhagao thusei hi ngaihen.

⁷ Chule Philadelphia'a um houbung solchah henga hitin sunin: Athengale adihtah, David kanglong heh neija, aman ahonle koiman khah thei lou, chule aman akhale koiman hong thei lou, ama chun hitin thu aseije:

⁸Keiman nathilbol chu kahenai; ven, koiman akha thei lou kot honsan na-anga kakoije; natha vang alhome, chule kathu nanit jingin kamin naseilep poi.

⁹ Ven, Satan loi kihou khomna-a miho chu, Juda mi kahi tia Juda mi hilou, thu jou sei ahiuve; ven, chutobang miho chu abang bang nakhophang bula kalhuhsah-a chibai kabohsah dingu ahi; chutile keiman nangma kangailut chu amahon ahetdoh thei dingu ahi.

¹⁰Nangman keima thohhat thu chu natuh det jeh-a hi, vannoi leiset chung cheng miho patep kholchilna-a vannoi leiset chunga hung lhung dingkon, hiche phatna kona chu keiman jong nangma kahuhdoh ding ahi.

¹¹Ven, Hung vahjet ding kahi; nalal lukhuh chu koiman nalahpeh louna dingin nanei sun chu tuh det jingin.

¹² Ajouva chu ka Pathen houin khoma kasem ding, chule chua kona chu potdohta louhel ding ahi; chule achunga, ka Pathen min, chule ka Pathen khopi Jerusalem khopi thah, van'a kona ka Pathen koma kona hung kumlha ding, hiche min chutoh keima min thah kasut ding ahi.

¹³Nakhang nei chanin houbung ho jah-a Lhagao thusei hi ngaihen.

¹⁴ Chule Laodicea-a um houbung solchah henga hitin sunin: Amen, tahsan umtah chule hettohsah dihtah, Pathen thilsemho bul chun hitin thu aseije:

¹⁵Keiman nathilbol kahenai, nangma votla navotpon, sala nasapoi; navotle votngalin, nasatle sangal lechun pha kasah ahi.

¹⁶Hiti chun sala nasapon, votla navotpon, alum dapdap bep nahi, hiche jeh-a chu kakama kona kakhondoh dingkon nahi.

¹⁷Nangman, Kahaove, sum kakholle, imachan kalhasampoi, natin ahi; ahinla nangmatah ada pen, khoto umtah, vaichatah, mitcho chule sagohkeu nahi chu nakihetpoi.

¹⁸Hijeh chun nahaona dingin, meija kisong jola kilhatheng sana, chule sagohkeu nahi najachat kiphon louna dingin, ponbang sil ding nanei theina dingin, mit nu ding mitlou, hicheng chu keija konin kichoh-in, tia kathu mop nahi.

¹⁹ Keiman kangailut chan chu kaphosala kasehgimji ahi; hijeh chun nangma tompanin lung heijin.

²⁰Ven, keima kotkhah bulah kadingin kot kakiu jinge, mi khattouvin ka-awgin ajah-a kot ahona ahile, keima kasunglhah-a ama chu an kaneh khompi ding ahi; chule aman jong keima an eineh khompi ding ahi.

²¹Keiman kajo-a ka Pa koma alaltouna-a katou banga hi ajouva chu kakoma kalaltouna-a katousah ding ahi, ati.

²²Nakhang nei chanin houbung ho jah-a Lhagao thusei hi ngaihen.