Read Thado Chin Thuphon 4 Bible Online

Thuphon 4 - Thado Chin bible

Thuphon 4

¹Hiche jou chun keiman kaven ahile, veuvin, van'a kot khat akihon kamun ahi, chule keima eikihoupia sumkon gin tobang aw amasa kajah, aw khat chun, Hiche lama hin hung kaltouvin, tu nunga thil hung soh tei dingho chengse chu kavetsah ding nahi, ati.

² Hichetah chun Lhagaovin kaumtan ahi; chuin, veuvin, van'ah laltouna khat akidon ahi, chule hiche laltouna-a chun mi khat atouvin;

³Hiche-a toupa chu jasper songle sardion song bangin alange; chule laltouna kimvela chun lhagui aumin, emerald songtoh abangin ahi.

⁴Chule laltouna kimvela chun laltouna somnileli aumin; hiche laltounaho chunga chun ponbang kisila alua sana lukhuh kikhuh upa somnileli atouvui.

⁵ Chule chuche laltouna-a kon chun kolphe, aw, chule van gin ahung sohdohjin ahi; chule laltouna maija chun meija kong jing jeng meivah sagi aumin, hichu Pathen Lhagao sagi chu ahi;

⁶ chule laltouna maija chun crystal songvala val phatvet twikhanglen tobang khat akimui; chule hiche laltouna ningtin le laltouna kimvela chun ganhing li aume; amaho chu amalam anunglam amit jeng amit jeng dimset ahi.

⁷Ganhing amasapen chu keipitoh abangin, anina chu bongnou toh abangin, athumna chun mihem mai apui, alina chu alengle mulaopi tobang ahi.

⁸ Hiche ganhing liho chun lhaving gup cheh aneijui; akimvel le asunglam amit jeng amit jeng dimset ahi; chule amaho chun, Athenge, athenge, athenge, Pakai Pathen, hat chungnung, aumsa auma, chule ahung umdinga chu, tin asun ajanin cholnga louhelin, ati, atiuvin ahi.

⁹Chule hiche ganhingho chun a-imatih chana hing jing, laltouna-a toupa chu, avahchoi juva, ajaboluva, athangvah tengule,

¹⁰upa somni le liho chun laltouna-a toupa anga chu lhujiuva, a-imatih chana hing jingpa anga chu, alallukhuh aselhah jiuva chibai abohjiuva,

¹¹Vo Pakai, nangma bou vahchoile choi-at chule thilbol thei thahat changa lom nahi. Ajeh chu imajouse nangma sem ahi; chule nangma phatsah-a hicheng chu uma chule kisema ahi, atiji dingu ahi.