Read Thado Chin Thuphon 5 Bible Online

Thuphon 5 - Thado Chin bible

Thuphon 5

¹ Chujouvin laltouna-a toupa khut jet lama chun, asunglam apolam alangtoa kisuna, sinkhana sagi-a kisinkha lekhabu khat kamun ahi.

²Chuin vantil hattah khat kamun ama chun, Hiche lekhabu hi phonga asinkhana lhamlha dinga lom koiham, tin hasap tah-in asamlen ahi.

³Ahin van'ah, leijah, lei noijah lekhabu chu aphong theile ave theija koimacha aumtapon ahi.

⁴Chuin lekhabu chu aphong dingle asim dinga khatcha jong akiholmo jeh chun hakan kakaptan ahi.

⁵ Hichun upaho lah-a khat chun, Nangma kap hih-in; ven, Juda phung Keipi chule David Jung chu hiche lekhabu phong dingle asinkhana sagi chu honglha dinga ajosohsa ahitai, ati.

⁶ Chuin keiman kaven ahile, veuvin, laltounale ganhing liho lailung-ah chule upaho lailunga chun Kelngoinou kithatsa lheh lheh khat adin kamui; ama chu aki sagile amit sagi ahi; hichu vannoi leiset pumpi-a kisol Pathen Lhagao sagi ahi.

⁷Ama chu ahungin laltouna-a toupa khut jet lama lekhabu chu alan ahi.

⁸ Hichu alah phat chun ganhing liho chule upa somni le liho chu Kelngoinou anga chun abohkhup taovin ahi; amaho chun akhutna selangdah khat chehle sana sumlheng, mithengho taona, gimnam twi dimset akichoi cheh-un ahi.

⁹ Amaho chun la thah khat asauvin, Lekhabu chu ala dingle asinkhana lhamlha dinga lom nangma bou nahi; ajeh chu nangma kithattasa nahi; phungtin leh chitin namtina mi, paotin paotanga mi, gamvaipi nam jouse-a mi Pathen'a dinga nangman nathisana nachoh doh ahitai.

¹⁰ Pathen dinga amaho chu gamsung mile thempu-a napansah ahitai; chutia chu amaho chun vannoi leiset chunga vai apoh dingu ahi, atiuvin ahi.

¹¹ Chujouvin kagahvetle, chuche laltounale ganhingho chule upaho kimvela chun vantil asang aja aw kajan ahi; amaho chu sangsom tamtah jat sangsom, sang tamtah jat sang tamtah ahiuve.

¹²Amaho chun aw sangtah-in, Akithatsa Kelngoinou chu thahatna, haona, chihna, thaneina, choi-atna, loupina, chule pachatna chang dinga lom ahi, atiuve.

¹³Chuin van'a, leija, lei noija, chule twikhanglen'a thilsem jousen, chule chucheho lah-a um chengsen ahiti seiju aw hi kajai, Laltouna-a toupale Kelngoinou chu pachatle choiat, chule loupinale thunei vaipoh atonsot atonsot geijin chang jinghen, atiuve.

¹⁴Chuin ganhing liho chun, Amen, atiuvin ahi. Chule li ho le upa somni ho chengse chu aboh khupmun a-itih-a hingjing chu chibai abohtauvin ahi.