Read Thado Chin Thuphon 6 Bible Online

Thuphon 6 - Thado Chin bible

Thuphon 6

¹Chuin Kelngoinou chun asinkhana sagi lah-a khat chu ahon kamui, chule ganhing liho lah-a khat chun van ginga bangin, Hungven, ati kajan ahi.

² Hijeh-a chu kagah vetle, veuvin, sakol kang khat ka mun, achunga toupa chun gophel achoije; ama chu lukhuh khat apeuvin ahi; chule ama chu ajoupehle ajoupeh dinga hung kondoh ahi.

³Chuin sinkhana anina ahonle, ganhing nina chun, Hungven, ati chu kajan ahi.

⁴ Hichun sakol chom khat ahungdoh-in, hichu asan ahi; chuin miho chu amahole amaho akithatona dinga, achunga toupa chu, leisetna kon chamna lah mangna kipe-a ahi; chule ama chu chemjam lentah khat jong kipe-a ahi.

⁵ Chuin aman sinkhana athumna ahon phat chun ganhing athumna chun, Hungven, ati kajan ahi. Chuin, veuvin, sakol vom khat kamun ahi; chule achunga toupa chun khaikot achoijin ahi.

⁶Chuin ganhing liho lah-a kon chun, suhlouchang khai khat man makhai, chule sakolchang khai thuma makhai ahi; chule nangman thaole lengpitwi vang chu sumang hih-in, ti aw kajan ahi.

⁷Chuin aman sinkhana alina ahon phat chun, Hungven, ti ganhing alina aw kajan ahi.

⁸ Hichun kavetle, veuvin, sakol engdang khat kamun; chule achunga toupa chu amin Thina ahi; chule damunin anungnung ajuijin ahi. Chule chemhema, gilkela, thina-a, chule gamsa-a atha dinguva amaho chu vannoi leiset hop li-a hop khat chunga thuneina kipe-a ahiuve.

⁹Chuin sinkhana angana chu ahon phat chun, Pathen thu jalle hettohsahna aneiju jala kithatteho lhagao hing chu maicham phung noijah kamun ahi.

¹⁰Amaho chun aw sangtah-in asamun, Vo Pakai thengle kitah, thu tanna chule leiset chung chengho chunga keiho thisan asou phulah ding chu itihchan nakhongai dingham, atiuvin ahi.

¹¹Hichun amaho chu ponbang ape chehtauvin ahi; chule amaho chu, asohchanpiho chengseole asopite chengseu amaho banga atha dingu chu akim masangse-a, chomkhat anga tahdi dingu ahi, tin ajah uva aseijun ahi.

¹² Chunin sinkhana gupna chu ahon phat chun, veuvin, ling nasatah ahung kiho kamun; chule nisa chu samul khaodip pon bangin adumtan, chule lhathah pumpi thisan abang jengtan ahi;

¹³ chule van'a ahsi ho chu hui hattah-in, theichang amut linga ahut apul lhah bangin, leijah apul lhagamtan ahi.

¹⁴ Chule van chu lekha kijel bangin akijelin amangheltan ahi; chule molle lhang jousele twikol gam jong ama ama mun'a konin akichon mang gamtan ahi.

¹⁵ Chule leiset lengho, milenho, sepai lamkai pipuiho, chule mihaoho, chule ahatteho, chule soh ho chengsele soh hilou ongthol chengse, kokhuh sunga le molsanga songpiho a chun akiselun;

¹⁶ chule molsang ho le songpiho jah-a chun, Kachung uvah hunglhun lang laltouna-a toupa maikoh-a konle Kelngoinou lunghan na-a konin neiselun;

¹⁷ ajeh chu alunghan nikho chungnung chu ahung lhungtai; koiham ading thei ding, atiuvin ahi.