Read Thado Chin Thuphon 7 Bible Online

Thuphon 7 - Thado Chin bible

Thuphon 7

¹ Chujou chun vannoi leiset ning li-a vantil li dinga, vannoi leiset chungle twikhanglen chunga chule thing chunga hui anun louna dinga, vannoi leiset hui li tuhtanga kamun ahi.

²Chuin Pathen hing melchihna choija, niso lama kona hung kaltou vantil chomdang khat kamun; ama chun hatah-in asamin, leisetle twikhanglen suhsetna ding thu kipe-a vantil liho jah-a chun,

³ I-Pathen sohteho chala melchihna kanam masangseuvin, nanghon leisetle twikhanglen chule thingho suse hihtadiuvin, ati.

⁴Chuin melchihna kinama chu amijat kajan; Israel phung chengsea melchihna kinama sang ja khatle sangsomli le sangli ahi;

⁵Juda phunga melchihna kinam sangsom le sangni; Reuben phunga melchihna kinam sangsom le sangni; Gad phunga melchihna kinam sangsom le sangni;

⁶Asher phunga melchihna kinam sangsom le sangni; Naphtali phunga melchihna kinam sangsom le sangni; Manasseh phunga melchihna kinam sangsom le sangni;

⁷Simeon phunga melchihna kinam sangsom le sangni; Levi phunga melchihna kinam sangsom le sangni; Issachar phunga melchihna kinam sangsom le sangni;

⁸Zebulun phunga melchihna kinam sangsom le sangni; Benjamin phunga melchihna kinam sangsom le sangni; Joseph phunga melchihna kinam sangsom le sangni ahin;

⁹Hicheng jou chun kavetle, chitin namtina kon, phungtina kon, chule mite tinchenga konle paotin paotanga kon, koima simsen lou mipi atama tam abang jenga kivon, lusuna kichoija laltouna angle Kelngoinou anga dinga kamun;

¹⁰chule amaho chun, Huhhingna chu laltouna-a tou i-Pathen'ule, Kelngoinouva ahi, tin aw sangtah-in asamui.

¹¹Chule vantil jouse chu, laltounale upaho, chule ganhing liho kimvela chu ding jinga ahiuve; amaho chu laltouna anga aboh khupmun Pathen alhaijun,

¹²Amen: pachatna, loupina, hetna, chihna, thangvahna, choi-atle thuneina, chule thahat atonsot atonsot geijin i-Pathen'uva hi jinghen. Amen, atiuvin ahi.

¹³Chuin upaho lah-a khat chun eihin houvin kajah-a, Hiche ponbang jenga kivonho hi koi hiuva chule hoija hung kon hiuvam, ti eidongin ahi.

¹⁴ Keiman ama jah-a, Ka pakai, nangman bou nahei, kati. Hichun aman kajah-a, Hiteho hi bolgim hesoh genthei chungnunga kona chu hung ahiuve; amahon Kelngoinou thisana chu avonu akisop bangu ahitai.

¹⁵Hijeh-a chu amahohi Pathen laltouna anga umuva, asun ajana a-houin'a chu ama lhachale-a panga ahiuve: chule laltouna-a toupa khu amaho lah-a cheng ding ahi;

¹⁶ amaho hi itihchan hijongle gilkel, dangchah kit talou ding ahiuve; nisan jong sangta lou ding, sat jong thohta louhel ding ahiuve;

¹⁷ ajeh chu laltouna lailunga um Kelngoinou khun avah diu, chule hin twinah dunga chu apuihoile ding ahi; chule Pathen'in amitlhi jouseu athehhul ding ahi, ati.