Read Thado Chin Thuphon 9 Bible Online

Thuphon 9 - Thado Chin bible

Thuphon 9

¹Chujouvin vantil ngana chun amutle, ahsi khat van'a kona lha-a leija chua kamun ahi; chule ama chu lei-ong kokhuh hehna chu kipe-a ahi.

² Chuin aman lei-ong kokhuh chu aheh hongin ahile, kokhuh sunga kon chun pummei nasatah-a bangin meikhu ahung khudohtan ahi; chule kokhuh sunga kona hung khudoh meikhu chun nisale van athimsahtan ahi.

³ Chule meikhu-a kon chun khaokhote lei chunga ahung sohdohtaovin ahi; amaho chu leiset chunga aipi thanei tobang thaneina kipe-a ahiuve.

⁴ Chule leiset chunga hampa louhing, anche dong chule thing khatcha suse louhela, achala Pathen mi melchihna kinamlou mihobou chu nasuhset dingu ahi, tia kiseipeh ahiuve.

⁵Chule amahon hiteho chu tha chu atha lou dingu, lha nga geija agenthei agentheija agimbol dinguva bou kipe-a ahiuve; chule amibolgimu chu aipin mi ape tenga bolgimna tobang bolgimna ahi.

⁶ Hiche lai teng chule mihon thina ahol dingu, chule iti hol jongleu amu lou dingu ahi; chule thi alung ngai dingu chule thina chu amaho-a kona jammang ding ahi.

⁷ Hiche khaokhoho limso chu galsat dinga gotsadem sakol abangin ahi, chule alu chunguva chu sana tobang lukhuh aumin, chule amaiju chu mihem maitoh abangin ahi.

⁸ Chule asamu chu numei samtoh abangin; chule ahau chu keipi hatoh abange.

⁹ Chule a-omphou chu thih ompho tobang ahin, alhaiju gin galsat dinga lhaija sakol kangtalai tamtah lhai gintoh abangin ahi.

¹⁰Aipi mei bangin ameiju aumin, amidena ajang jong aumin ahi; chule amaijuva chu lha nga geija mihemte agenthei theija gimbolna athao uma ahi.

¹¹Lei-ong solchah chu alengpao ahi; amin chu Hebrai paovin Abaddon ahin, Greek paovin Apollyuon ahi.

¹²Dana masa kichaija ahitai; veuvin, tu nunga hi dana ni hung lhung ding ahina laije.

¹³ Chuin vantil gupna chun amutle, Pathen anga um sana maicham saki ho-a kon chun aw kajan ahi;

¹⁴khat chun sumkon choija vantil gupna pa jah-a chun, Euphrates luipi-a vantil li kihenho chu lhan, ati.

¹⁵Hichun mihem hop thuma hop khat that dinga, anidan, anikho, alha, akum phasadema kigotpeh vantil liho chu akilhadoh taovin ahi.

¹⁶Chule sakol chungchong galmiho chu ami jat sangsom jat ni sangsom jat ahiuve; ami jat chu kajan ahi.

¹⁷Chule kathil mu-a chun, sakol chengsele achunga chongho chu hiti hin kamui; a-omphou chu kamsan sung abangin, a-engdumin, chule sakol ho chu alu keipi lutoh abangin ahi; amaho kamsunga kon chun mei, meikhu, chule kath ahung sohdohjin ahi.

¹⁸Chuteho kamsunga sohdoh mei, meikhu, chule kath chucheng thum chun mihem hop thuma hop khat akithat gamtan ahi.

¹⁹Akam sungule ameijuva chu athaneinao uma ahi; ameiju chu gul lheh lheh abangin, alu aumin; hichea chu mi agimbolu ahi.

²⁰ Suhgamna chuchenga kithat moh ho chengse chu akhut tham athilbol uva konin alungu aheipouvin ahi; hichu amahon thilhahole khomu theilou, khoja theilou, vahle theilou, sana, dangka, sum-eng, song chule thinga asemu milimho hou atang pouvin ahi.

²¹Chule amahon toltha mitphel doi choi, jon thanhoi, guchat, hichenga kon chun alungu aheipouvin ahi.