Read Thado Chin Ruth 1 Bible Online

Ruth 1 - Thado Chin bible

Ruth 1

¹Tun thutan ho vaihomho nikho laijin, gamsunga kel analhan ahi. Chuin Judah gam Bethlehem'a pasal khat a-inneipi le achapa teni toh Moab gama phat chomkhat cheng dingin anacheuvin ahi.

²Pasalpa minchu Elimelech ahin, a-inneipi minchu Naomi ahi, chule achapa teni minchu Mahlon chule Chilion ahin, Judah gam Bethlehem kho-a um Ephrath mi ahiuve. Amaho Moab gama acheuvin agaum taove.

³Chuin Naomi inneipu Elimelech chu athitan; amanu le achapateni adalhatan ahi.

⁴Chuin achapa tenin Moab numei ji-in akipui lhonin; Khatnu minchu Orpah ahin, khajonu minchu Ruth ahi. Chutichun hiche gama chun kumsom tobang anachengun ahi.

⁵Chuin Mahlon le Chilion jong ani lhonin athi lhontan; hitichun Naomi chu a-inneipu le achapa tenin adalhatan ahi.

⁶Chujouvin Naomi Moab gama kona kilekit dingin amou tenitoh akipat dohtan ahi. Ajehchu Pakaiyin amite nehding apen aviltai ti Moab gama konin ajan ahi.

⁷Hijeh chun amanu amou teni toh aumna-a konin akipatdoh-in; Judah gam kilekit nading lampi-a chun achetauve.

⁸Chuin Naomi in amouteni jah-a, chelhonin, nanuteni incheh-a kinungle lhontan; nangnin athiho le keima neibolna lhon bangin Pakaiyin lungsetna-in nabol lhonhen.

⁹Na-inneipu teni incheh-a lung kicholdona namulhon nadingin, Pakaiyin phatthei nape lhonhen, ati. Chujouvin abenglhon chu achopmin, athummun aw sangtah-in akap taove.

¹⁰Chuin amanin amanu jah-a, keini namite henga nangma toh kakile tei lhonding ahi, atilhon tai.

¹¹Ahin Naomi'in, kachanu teni kinungle lhontan; Ibola keima toh nakilhon hon dingham? Kanaobua ji-a nanei theilhon ding chapa um nalaija ham?

¹²Kinungle lhonin, kachanu teni, chelhontan; ajehchu ji neikit dingin kateh behsehtai. Keiman kinepna kaneije tin seijing ting, tujan mamahin ji neijingting, chapate hingkit jongleng;

¹³Nangnin amaho kikhan lhit gei nangajou lhonding hinam? jineilouva amaho nangalhon dingham? Hitheiponte, kachanu teni; ajehchu Pakaiyin akhut keima douna-a alapjeh hin, nangni-a ding gelnan kalung ana tangeije, ati.

¹⁴Chutichun amaho aw sangtah-in akap kit taove. Chuin Orpah in atehpi lhahnan achopmin; Ruth vang chun akolchahtan ahi.

¹⁵Chuin Naomi in hitin aseije, ven na-unu amitele a-pathenho henga akilekit tai. Nangjong na-unu nung juijin kiletan, ati.

¹⁶Ahinla Ruth'in, nangma dalha dingle nanung kajuina-a kona kinungle kit dingin neijol hih-in: ajehchu nache che na-a kache ding, nachen chenna-a kachen ding; namite chu kamite hia, na Pathen chu ka Pathen hiding;

¹⁷Nathi thi na-a kathi-a, hiche munna chu eikivui ding ahi. Thina tilouvin thil dangin eikhen lhonna ahile, Pakaiyin kachungah abolnom nom bolhen, achungnung jo cheh-in jong chuhsah jenghen, tin aseitai.

¹⁸Naomi'in amounu amatoh kilhon dinga dettah-a apan amu phatchun, ajah-a imacha aseitapon ahi.

¹⁹Hitichun amani Bethlehem alhunlhon kahsen achepeh lhontan ahi. Chuin ahitin ahi, Bethlehem alhunlhon phatchun, khosung pumpi chu amani jeh-in akiling soh jengin; chule numei hon, hichehi Naomi hilouham? atiuve.

²⁰Chuin amanun ajah uva, Naomi [1] neiti hih-un, Mara [2] neitijouvin; ajehchu Hatchung nungin nasatah in eisugenthei tan ahi.

²¹Ninglhinga potdoh-a kahin, Pakaiyin ahomkeovin in eihin lepui kit tai. Pakaiyin keima douna ahet tohsah-a, Hatchung nungin kachungah gentheina achuhsah namu nunguva, ipi dinga Naomi neiti nahlaiju ham?

²²Hitichun Naomi chu ahung kile kitnin, Moab numei amounu Ruth toh Moab gama konin ahung kile lhontan ahi. Chuin sakol chang ki-at patlaijin Bethlehem ahunglhung lhontai.