Read Thado Chin Ruth 2 Bible Online

Ruth 2 - Thado Chin bible

Ruth 2

¹Tun, Naomi'in a-inneipu sopi mihaotah khat aneijin; ama chu Elimelech insunga kon ahin, amin chu Boaz ahi.

² Chuin Moab numei Ruth'in Naomi jah-a, tun keima louva cheng kating, koihile amitmua lungset eichan penpen louva changkhai gaholinge, ati. Chuin Naomi'in ajah-a, kontan kachanu, ati.

³Chuin amanu apotdoh-in, achen, louva chang at-ho nunga changkhai aholtan ahi. Chule amanu chu Elimelech insungmi Boaz loulaija avahlut khatan ahi.

⁴Chuin veuvin, Bethlehem'a konin Boaz ahungin, chang at-ho jah-a, Pakaiyin na-umpiu hen, ati. Chuin amahon jong Pakai;in nangma phatthei naboh hen, tin adonbutnuve.

⁵Chuin Boaz in chang at-ho vesuija pang sohpa jah-a, hichenu hi hoi koi nungah ham? ati.

⁶Chuin chang at-ho vesuija pang sohpa chun adonbutnin, amanu hi Moab gama kon Naomi toh hung kinungle khangdong Moab nungahnu chu ahi.

⁷Amanun, katao ahi, chang at-hon adalhah-u changphal lah-a changkhai neihol khom sah-in, atin; hitichun amanu ahungin, in'a chomcha akicholdo tilouvin, jingpi-a pat tuchan geihin achomkhom peh-in ahi, tin adonbutne.

⁸Chujouvin Boaz chun Ruth jah-a hitin aseije, kachanu, kathusei nangai nah louding ham? Midang louva changkhai holdin chehih-in, hikoma konin jong potdoh hih'in, ahin ka numei ho toh kikhen louvin kivop jingin.

⁹Amahon a-atnao loulai chu velhin lang, anungu juijin. Gollhang hon nangma natohkhah louna dinga thu kapeh louva nabol ham? nadang achah teng twibel phunga chenlang, gollhang hon ahinkhaiju twi chu donjin.

¹⁰Chuin amanu tollah aboh khupmin, amapa jah-a, keima gamdang mi kahi munasa-a, ipijeh-a neihet thema, namitmu-a hibanga lungsetna kachan ham? ati.

¹¹Chuin Boaz'in adonbutnin, amanu jah-a, na-inneipu thinunga natehpi najennaho; nanule napa, napenna gam nahin dalhah-a, masanga nahet khahlou miho lah-a nahung thu kichentah-a eikihetsah ahitai.

¹²Pakaiyin natohna chunga lethuhna napehen lang, chule kicholdo nadinga alhaving noi nahinjot Pakai Israel Pathen chun, kipaman lhingsetnin napehen, ati.

¹³Chuin amanun, ka Pakai, na mitmu-a lungsetna changjing inge; ajehchu nasoh numei ho lah-a khatbeh hihih jongleng, nangman neilhamon in, nasohnu hi lungset tah in nei kihoulim pitai, ati.

¹⁴Chuin an aneh phatnun, Boaz'in amanu jah-a, hungin lang an hungnen, chule nachanglhah halchu lengpitwi thuh-a hin hung kide-in, ati. Chuin amanu chu chang at-ho koma atoutan; amapa chun amanu chu changkanpoh apen, amanun ane vasetnin, amoh phabep akhenin ahi.

¹⁵Chuin amanu changkhaiho lohkhom dingin akipatdoh phatnin, Boaz'in asoh pasal ho athupeh-in, ajah uva, hichenu hi changphal ho lah jenga jong kilokhom sah-un, phohsal hih-un.

¹⁶Chule changphal loma konin jong amanu kilokhom dingin phabep lhahsahthu jiuvin lang, phoh hih-un, ati.

¹⁷Chuti chun amanun nilhah geijin loulaija chun changkhai aholin, chule changkhai alokhom chengse chu avolhan ahileh, hichu sakol chang ephah khat tobang ahi.

¹⁸Chuin amanun hichu apon khopi sungah alutnin; atehpin achangkhai hinpoh chu amutan ahi. Chuin amanun anehvaset jouva anehval akhen chu atehpi apetan ahi.

¹⁹Chuin atehpin ajah-a, tunia hoilama changkhai nahol em? hoija na nagatoh em? Nangma nahin hethempa chu nunnom hen, ati. Chuin Ruth'in aloukona mipa chu atehpi jah-a aseipeh-in, ajah-a, tunia kakonna louneipa chu Boaz ahi, ati.

²⁰ Chuin Naomi'in amounu jah-a, Athiho le ahing nalaiho chungah lungsetna nungsun lou Pakai chu nunnom hen ati. Chuin Naomi'in ajah-a, hiche mipa chu eiho dinga isopiu, inko ikinaipi penhou lah-a khat ahi, ati.

²¹Chuin Moab numeinu Ruth'in, amapa chun kahengah, kachang a-at jou kahseovin, ka gollhangho toh kikhen louvin ummin, tin aseije ati.

²²Chuin Naom'in amounu Ruth jah-ah, kachanu, amapa numei ho toh nakon khomchu aphai. Ajehchu midang louva kon le chun hitabang chu namu louding ahi, ati.

²³Hitichun amanu Sakol chang le suhlou chang ki-atchai kahsen changkhai holdingin Boaz numei ho toh kikhen louvin aumkhomin; chule atehpi toh achengkhom lhontan ahi.