Read Thado Chin Ruth 3 Bible Online

Ruth 3 - Thado Chin bible

Ruth 3

¹Chuin atehpi Naomi'in amanu jah-a, kachanu, nangdia thilpha asotheina dinga, nakicholdo nading kangaito peh louding ham?

²Chule nangman anumeiho nakivop piji Boaz khu i-inkopau hilouham? Ven, tujan tengle phola sakolchang ajapchil ding ahi.

³Hijeh chun kisilngimin lang, thao kinun, navon phapen kivonin lang, pholla chesuh-in: ahin amapan neh le don achai masangsen akoma chun kiphong hih-in.

⁴Chule hitiding ahi, alupna ding munchu melchih inlang, ama aluptengleh, chu-a chun lutnin, chule akeng hohdoh inlang chu-a chun lumin; chutengle aman nabolding nahil nante, ati.

⁵Chuin Ruth'in amanu jah-a, kahenga nasei jouse kabolding ahi, ati.

⁶Chuin amanu pholla achesuh-in, atehpin asei bangin agaboltai.

⁷Chuin Boaz'in nehle don achai phatnin, lung kipah tah-in chang kisevum banna chun lum dingin achetan ahi; chuin amanu kangchan ahungin, amapa kengchu ahohdoh-in, chu-a chun alumtai.

⁸Chuin khangkimin ahitin ahi, amapa chu akinin, agah kiheileh; ven, numei khat akeng todopmah alumin ahi.

⁹Chuin amapan koi nahim? ati. Amanun adonbutnin, nasohnu Ruth kahi; hijeh chun nasohnu hi naponmong neisilpeh in; ajehchu nangma kasopi kinaipi nahi, ati.

¹⁰Chuin aman, kachanu, Pakaiyin phatthei naboh hen; ajehchu gollhang ahao hihen, avai hijongle anungu najuilou hin, amasalama sangin ajona lamah khotona namusah cheh-in ahi.

¹¹Chule tun, kachanu, kicha hih-in; keiman na-ngeh jouse kabolpeh ding nahi: ajehchu kakhopi sunga kamite jousen numei chondihtah nahi ahesoh keijuve.

¹² Tun keima nakinaipi nasopi kahichu adih-e; ahin keima sanga sopi kinaipi aumnalaije.

¹³Tujan gehden tan, jingkah tengle hitiding ahi, amapa chun sopi khat boldingdol kinchu nangma chunga abola ahile, aphai; sopi boldingdol kinchu bolhen. Amavang aman hiche sopi boldingdol kinchu nangma chunga abol louva ahile, Pakai ahinjing bangin, keiman sopi boldingdol kinchu nangma chunga bolnange. Jing khovah kahsen gehdentan, ati.

¹⁴Chutichun amanu chu amapa kengdopmah jingkah geijin alumtan; jingkah phalvah then masangin athoudohtan ahi. Chuin amapan, pholla numei ahunge ti koiman hetdahen, ati.

¹⁵Aman amanu jah-a, naponsil chu hinchoijin lang, do-in, ati. Chuin aman ponchu adon ahile sakol chang tena gup atepeh-in, apohsahtai. Chuin amanu khopi sunglama aluttan ahi.

¹⁶Chuin amanu atehpi kom agalhun phat chun, atehpin, kachanu, ito nahungbah hinam? ati. Chuin amanun mipa chun ama dinga abolpeh jouse chu aseipehtan ahi.

¹⁷Chule amanun, hiche sakol chang tena gup hi amapan eipeh ahi; ajehchu amapan kajah-a, natehpi henga khut gohkeovin chehih-in eiti, ati.

¹⁸Chuin amanun, kachanu, hiche thua hi ipi ahungso nahetchet kah-in khongaijin; ajehchu tunia hiche thuhi asuhchet masangse-a amapa kicholdo louding ahi, ati.