Read Thado Chin 1 Samuel 1 Bible Online

1 Samuel 1 - Thado Chin bible

1 Samuel 1

¹Tun Ephraim molsang Ramathiam Zophim mun'a Ephrath mi, Zuph chapa, Tohu chapa, Elihu chapa, Jeroham chapa, amin Elkanah kiti mikhat anaumin ahi.

²Chule aman ji ni aneijin, khatnu minchu Hannah ahin, achom khatjonu minchu Peninnah ahi. Chule Peninnah chun cha aneijin, ahinla Hannah'in vang cha aneipoi.

³Chule hiche mipahi akhopia konin kumsehle Shiloh'a janel Pakai houding le ganlhai boldin achetoujin ahi. Chule Pakai thempu Eli chapateni Hophni le Phinehas chu hia chu umji lhon ahi.

⁴Chuin Elkanah hin thilto aneiphat tengle a-inneipi Peninnah le achapate le achanute jouse chu chan apejin,

⁵Ahinla Hannah vang chun achanding doltah apejin ahi: ajehchu aman Hannah angailun, ahinla amanu chu Pakaiyin anaobu akhapeh ahi.

⁶Chule Pakaiyin anaobu akhapeh jehchun khatjonu chun alungnat nadingin nasatah-in alunghansah jin ahi.

⁷Chule chutia chu kumseh-a aboljing ahin, Pakai in'a amanu achetou tengle amanu aphinsejin; hijeh chun amanu akapmin anjong aneji tapoi.

⁸Chujouvin Elkanah'in a-inneipi Hannah hengah, Ibola naka ham? ebola an nelouva um nahim? chule ibola lungkhama uma nahim? Keima nang dinga chapa som sanga phajoa kahi louham? ati.

⁹Chutia amahon Shiloh'a an aneh uva, chule twi adonjou phatnun, Hannah akipatdoh tan ahi. Tun Eli thempu chu Pakai houin khom khat bula touna chunga touva ahi.

¹⁰Chuin amanu chu ahinna ahesoh lheh jengin, Pakai henga ataovin, chule laina tah-in akapmin ahi.

¹¹ Chuin amanu kitepna khatna akitepmin, Vo janel Pakai, nasohnu thohgimnahi neivet peh-a, neihet jinga, nasohnu hi nasuhmil louva, nasohnu hi chapa khat neipeh-a ahile, chuteng ahinkho lhumkeija Pakaiya kapeh ding, alua samchem kilamlou ding ahi, ati.

¹²Chuin ahitin ahi, amanu Pakai anga ataojom jing laihin, Eli'n amuh phunchu anaven ahi.

¹³Tun Hannah hin alungsunga asei ahijeh-in, amuh bouchu aphunin, ahin a-aw vang akijapoi. Hijeh chun Eli'n amanu jukhamin agelin ahi.

¹⁴Chuin Eli'n amanu jah-a, Itihchan nakham dingham? Naju chu nanga konin koimangin, ati.

¹⁵Chuin Hannah'in adonbutnin, Ahipoi, ka pakai, keima lungkham na-a dim numei kahi; keiman ju le khamnathei jong kadonpoi, amavang Pakai anga kahina kabuhlhah joh ahi.

¹⁶Nasohnu hi Belial [1] chanun neisim hih-in, ajehchu kakiphina le kahesohna tambehseh jenga tuchana hi thu kasei ahi, ati.

¹⁷Chuphatnin Eli'n adonbutnin, Lung mongin chetan: Israel Pathen'in nathilthum chu naphal pehtai ati.

¹⁸Chuin amanun, Nasohnu hi namitnun lungsetna neimusah-in, ati. Chutichun hiche numei chu achena ding lampia achen, an anen, chule lungkham mel aputapon ahi.

¹⁹Chuin amaho jingkah matah-in athouvun, Pakai ahouvun, akileuvin, a-in'u Ramah'ah ahung taove. Chuin Elkanah'in a-inneipi Hannah chu aluppin; chule Pakaiyin amanu chu ageldoh tan ahi.

²⁰Hijeh chun ahung hitin ahi, Hannah'in nao avopma, aphat ahunglhin tah-in chapa khat ahingin, Pakai henga kanathum ahi atin, amin Samuel asahtai.

²¹Chuin Elkanah kitipa le a-insung mijouse chu Pakaiya kumtin ganlhai le akitepna tohdohdin achetou taove.

²²Ahinla Hannah achetoupoi; ajehchu amanun a-inneipu henga, Naosen in noi abankahsea kachetou louding ahi, Pakai anga gaki lahthei ahi-a, chule chumuna a-itih-a aumden theiding teng kahinpui ding ahi, ati.

²³Chuin a-inneipu Elkanah'in ajah-a, Nangman phante nati bangchun boltan; noi aban kahsen khongai jengin; Pakaiyin bou athu chu phutdet hen, ati. Chutichun amanu aum denin, chule achapan noi aban kahsen avah-in ahi.

²⁴Chuin amanun noi abansah phatnin, ama chu alhontoupin; bongchal thumtoh, changbong ephah khat le lengpitwi haikhat toh Shiloh'a Pakai in'a ahinpuitai: chule chapang chu khangdong cha ahi nalaije.

²⁵Chuin bongchal khat athatnun, naosen chu Eli henga apuitaovin ahi.

²⁶Chuin amanun, Vo ka pakai, nangma nahinjing bangin, ka pakai, hilaimuna nangma koma ana dinga Pakai henga anataova numei chu keima kahi.

²⁷Hiche chapang dinga hi anataova kahin; Pakaiyin ahenga kanathum kataona chu eipetai.

²⁸Hijeh chun keiman jong amahi Pakai henga kapeh ahi; ama ahinlai chansea Pakaiya hiding ahi, ati. Chuin amapan chukoma chun Pakai ahoutan ahi.