Read Thado Chin 1 Samuel 10 Bible Online

1 Samuel 10 - Thado Chin bible

1 Samuel 10

¹Chujouvin Samuel'in thaothei khat alan, aluchunga asunglhan, amachu achopmin, ajah-a, Pakaiyin agoulote chunga gallamkai dinga thao nanu hilouham?

²Tunia hi nangma keima-a kona nachedoh tengle, Benjamin gamgi Zelzah'a Rachel lhan koma mini namu ding; chule amanin nangma henga, Ahol dinga nache lona sanganho chu akimutai: chule ven, napan sanganho khohsah ding anga-in, nangma dingin alungkhamin, Kachapa dinga hi ipi kabol dingham? atie, ati lhonding ahi.

³Chuteng chua konchun masanglama chebe lechun Tabor phaicham lhungin natin, chua chu Bethel'a Pathen henga chetou mi thum nakimuto piding, khatpan kelnou thum, khatpan changlhah thum, chule khatpan lengpitwi haikhat achoiding ahi.

⁴Chule amaho chun chibai naboh diu, changlhah ni napeh dingu; hichu akhutnuva kona nakisan ding ahi.

⁵Chujou tengle Philistine sepaiho umna Pathen lhang chu nahung ding; chule hitiding ahi, hiche khopi-a chu nahungtengle, tumging le khongcha, kuli, chule selangdah amasanguva hintho-a munsanga kona hung kumlha themgao honkhat nakitopi ding; amaho chun gaothu asei dingu ahi.

⁶Chule Pakai lhagao nachunga hungchu ding, amahoto gaothu nasei khomding, chule michombeh nakiso ding ahi.

⁷Chule hung hitihen, hiche melchihnahohi nachunga ahunglhun tengle, thil hungso dungjuija nabol jengding ahi; ajehchu Pathen'in na-umpinai.

⁸Chule nangma kamasanga Gilgal'a nachesuh ding; chule ven, govam thiltoho tohdingle chamna thilto ganlhaina toh dinga nahenga kahungsuh ding ahi. Nangman ipi nabolding musah dinga nahenga kahung kahse-a, nisagi nakhongai ding ahi, ati.

⁹Chuin ahitin ahi, ama Samuel'a kona kinungle dinga che akigotchun, Pathen'in ama lungchom khat apen; hicheni chun melchihna jouse chu aguilhung soh heltai.

¹⁰Chuin amani chuche lhang lama chu ahung lhona ahile, veuvin themgao honkhat toh akitoh lhonin; chule Pathen lhagao achunga ahung chutan, chuin aman alah uva chun gaothu aseitan ahi.

¹¹Chuin ahitin ahi, masanga ama anahesa jouse chun aman themgaoho lah-a gaothu asei chu amuphatnun, miho chu khatle khat akihouvun, Kish chapa chunga khu ipi hungsoh-a hitam? Saul jong themgaoho lah-a panga hitam? atiuve.

¹² Chuin chukoma mikhatnin adonbutnin, Ahin apao chu koiham? ati, hijeh chun Saul jong themgaoho lah-a panga ham? kitihi thuchih ahung hidohtan ahi.

¹³Chuin athemgao thusei kichai chaijin, ama munsang lama ahungtai.

¹⁴Chuin Saul pangahpa chun amale asohpa henga, Hoilama nache lhonham? ati. Chuin aman, Sangan hola che kahi lhonin: chule hoimacha kamu lhonlou phatnin, Samuel henga kahunglhone, ati.

¹⁵Chuin Saul pangah pan, Katao ahi, Samuel'in nahenga ipi aseijem neihilin, ati.

¹⁶Chuin Saul'in apangahpa henga, Aman sanganho chu akimutai tin kichentah-in eihil lhone, ati. Ahinla lenggam thudol Samuel'in aseivang chu ahilpoi.

¹⁷Chuin Samuel'in mipichu Mizpeh'a Pakai henga akoukhomin;

¹⁸Israel chate jah-a chun, Israel Pakai Pathen'in hitin aseije, keiman Egypt'a konin Israel kahin puidoh-in, Egypt mite khutna konle lenggam jouse-a kon, chule nasugenthei houva konin kahuh doh-in ahi.

¹⁹Ahin tunin nahesoh naole nagenthei nao jouse-a kona nahuhdoh uva Pathen nanotthap taovin; chule nanghon ama henga, Ahipoi, kachunguva leng khat neitun peh-un, nati uve. Hijeh chun tun nangho tah Pakai masanga aphung phungin, asang sangin hungkipe doh-un, ati.

²⁰Chuin Samuel'in Israel phung jouse aheng ahin naisah phatnun, Benjamin phungchu alhengtai.

²¹Benjamin phung chu a-inko kou-a aheng ahin nai phatnun, Matri insungchu lhen ahin, Kish chapa Saul chu lhendoh ahitai. Ahinla amachu aholule amujou pouve.

²²Hijeh chun amahon mi ahung be ding umnalai em, tin Pakai chu avelin adong kitnun ahi. Chuin Pakaiyin adonbutnin, Veuvin, ama thilkeu lah-a akisele, ati.

²³Chuin amaho alhaijun chua konin agapuidoh taovin ahi: chuin ama mipi lah-a adin phatnin, alengkouva pat chunglamse chu mijouse sangin asangjon ahi.

²⁴Chuin Samuel'in mijouse jah-a chun, Pakaiyin alhenpa, mijouse lah-a amatobang aumlou khu namu uvem? ati. Chuin mijouse chun hatah in asamun, Pathen'in lengpa huhhing hen, atiuve.

²⁵Chujouvin Samuel'in mipi chu lenggam thudol ahilin, lekhabu khatna asun lutnin, Pakai angsunga chun akoitai. Chuin Samuel'in mipi ho chu ama ama incheh-a asolmangtai.

²⁶Chuin Saul jong Gibeah'a a-in'a achetan; chule Pathen'in alungu atohkhah mi honkhatnin alhonpiuvin ahi.

²⁷Ahinla Belial [3] chate chun, Hiche pan iti eihuhdoh diuham? atiuve. Chuin amahon ama nahsahmon abolun, thilpeh imacha ahinchoipeh pouve. Ahinla ama athipbeh-in ahi.