Read Thado Chin 1 Samuel 11 Bible Online

1 Samuel 11 - Thado Chin bible

1 Samuel 11

¹Chujouvin Ammon mi Nahasah chu ahung konin, Jabesh-Gilead dounan gebuh asongin ahi. Chuin Jabesh mijouse chun Nahash jah-a, Keihotoh kitepna khat semin, chule keihon nangma kajen dingu ahi, atiuve.

²Chuin Ammon mi Nahash chun adonbutnin, Hitia hi nang hotoh kitepna kasem ding ahi, namit jetlam jouseu kakaldoh-a, Israel jouse-a dinga jum na hiding ahi, ati.

³Chuin Jabesh upahon ajah-a, Israel gamkai jouse thangkou kasolthei nadiuvin, ni sagi neikhongai jun; chujouteng eihuhdoh dingu mi aumlouva ahile nahenga kahung kipehlut dingu ahi, atiuve.

⁴Hichun thupole ho chu Saul chenna Gibeah ahung lhungun, thuchu miho jah-a aseitaovin ahi. Chuin mijouse awgingin akaptaove.

⁵Chuin veuvin, Saul chu louva konin ganchahon nunga ahungin ahi; chuin Saul'in, Ipi hahsatna uma mipi ho khu kapma hiuvam? ati. Chuin amahon Gibeah miho thupoh chu aseipeh taove.

⁶Chuin Saul'in chuche thuho chu ajah phatnin Pathen lhagao achunga ahungchun, alunghana chu nasatah-in akoujah jengtan ahi.

⁷Chuin bongchal ni alan, achenbong bongin, Israel gamkai jouse-a thupole ho khutna athotnin, Saul le Samuel nung hinjuilou chanchu hitabonga hi abongchal chunga kibolding ahi, ati. Chuin mipi chunga chun Pakai ginna achutan, amaho lungkhat tah-in ahung kondoh taove.

⁸Chuin aman amahochu Bejek mun'a asimin ahile, Israel chate chu sangjathum ahin, Judah miho chu sangsomthum ahiuve.

⁹Chuin amahon thupole mi ahungho henga, Jabesh Gilead miho henga chun, Jing nikho nisasat laitahle kithopina namu dingu ahi, tin gaseipeh-un atiuve. Chuin thupole ho chu ahungun, Jabesh miho chu aseipeh-un ahile, amaho akipah lheh-un ahi.

¹⁰Hijeh chun Jabesh mihon, Jingle naheng uva kahungdoh dingu ahin, nanghon kilominte tia pha nasah bangun kachungu boltaovin, atiuve.

¹¹Chuin ajingin ahitin ahi, Saul'in mipi chu loithumin ahom khenin; jingpi phalvah-in amaho janel lailung tah-a chun alutnun, Ammon miho chu nisa asatdoh kahsen athatnun ahi. Chuin ahitin ahi, mi ni kidalha khoma aumlou kahsen, amoh chengse chu akithe cheh-un ahi.

¹²Chuin mipi chun Samuel henga, Saul chu ichunguva lengchang mongding ham tia seija chu koiham? keihon katha theina dinguvin, amaho chu hinpuijun atiuve.

¹³Chuin Saul'in, Tunia hi mi khatcha kithat theilou ding ahi; ajehchu tunia hi Pakaiyin Israel sunga huhhingna na atoh ahi, ati.

¹⁴Chujouvin Samuel'in mipi ho jah-a, Hungun, Gilgal'a cheohitin, chule chua chun lengam gasemthah-u hite, ati.

¹⁵Chuin mipi ho jouse chu Gilgal'a acheuvin; chule Gilgal'a chun Pakai masanga Saul chu lengin asemtaove. Chule hiche mun'a chun Pakai angsunga chamna thilto ganlhaina apeuvin; chuachun Saul le Israel mite jouse nasatah-in akipah-un ahi.