Read Thado Chin 1 Samuel 12 Bible Online

1 Samuel 12 - Thado Chin bible

1 Samuel 12

¹Chuin Samuel'in Israelte jouse jah-a, Veovin kahenga nasei jouseu chu kangaijin, nachung uva lengkhat kasempeh taove.

²Chule tun veuvin, lengpa chu namasanguva achei: chule keima tehse lukang kahitan; chule veuvin, kachapate nang hotoh aumui: chule keima kachapan laijapat tunigeija hi namasanguva chejing kahi.

³Veuvin, keima hikoma kaume; Pakai le athao nupa anga kachung chang thu hettoh sah-un: koi bongchal kalahpeh umkham? koi sangan kalahpeh umkham? koi kajoulhep umkham? koi kasuhgenthei umkham? ahiloule koi khutna kona kamit chotna dinga nehguh kalah umkham? Keiman hichu nangho kalepeh dingu ahi, ati.

⁴Chuin amahon, Nangman neijoulhep khapouve, nei sugenthei kha pouvin, chule koima khutna konin jong nala khapoi, atiuve.

⁵Chuin aman ajah uvah, Kakhutnahin adihlou ima namupouve tihi Pakai chu nachung uva ahetoh ahin, athao nupa hi tunia ahetoh ahi, ati. Chuin amahon, Amachu ahetoh ahi, atiuve.

⁶ Chuin Samuel'in mipi jah-a, Mosi le Aaron ana gonga, chule Egypt gama kona napu napateu hinpuidoh-a chu Pakai ahi.

⁷Hijeh chun tun nanghole napu napateu chunga anabol Pakai chonphatna natoh jouse chu, Pakai masanga nangho toh kagelkhom theina dingin dingdet nun.

⁸ Egypt'a Jacob alut nungin, napu napateu chun Pakai akouvun, chuin Pakaiyin Mosi le Aaron asolin, amanin napu napateu chu Egypt'a kona apuidoh lhona, hiche munahi achensah lhon ahi.

⁹ Chuin amahon Pakai a-Pathen'u chu asuhmil phatnun, aman Sisera Hazor janel gallamkai khut le Philistine te khutna, chule Moab lengpa khutna ajoh doh-in, chuin amahon amaho asatnun ahi.

¹⁰ Chuin amaho Pakai henga akapmun, ahenga, Keihon Pakai kadalhah uva Baal lim le Ashtaroth kajen jeh-un kachonse taove: ahinla tun kamelma teo khutna konin neihuhdoh uvin, chutile nangma kajen diu ahitai, atiuve.

¹¹ Chuin Pakaiyin Jerubbaal, Bedan, Jephthah chule Samuel asolin, ningtina namelmate hou khutna konin nahuhdoh-un, lung mongin nacheng taove.

¹² Chuin nanghon Ammon chate lengpa Nahash nangho douna-a ahung namu phatnun, Pakai na Pathen'u chu nalengpao ahilaijin, nanghon kahenga, Ahipoi; leng khatnin kachunguva vai ahomding ahibouve, nati uve.

¹³Hijeh chun tun veuvin, nanghon nalhen ule nangaichatnu lengpa chu hikoma aume; chule veuvin, Pakaiyin nachung uvah leng khat atungtai.

¹⁴Nanghon Pakai nagin uva, ama najen uva, a-aw nangai uva, chule Pakai thupeh chu nadou daova ahile, nangho le nachung uva vaipo lengpan jong Pakai Pathen chu najuijom jing dingu ahi.

¹⁵Ahinla Pakai awchu nangailou uva, Pakai thupeh chu nadou uva ahile, Pakai khutchu napu napateu chunga anachuh banga, nangho chunga hungchu ding ahi.

¹⁶Hijeh chun tun, dingun lang hiche thil loupitah Pakaiyin namitmuva namasanguva abol dinghi veuvin.

¹⁷Tunihi suhlou chang atni hilouham? leng nakithum jeh uva Pakai mitmu-a nathilbolu nagitlou nao chu lentah ahi ti nahetdoh uva chule namutheina diuva keiman Pakai kakou ding; aman van ginle go ahinsolding ahi, ati.

¹⁸Chutichun Samuel'in Pakai akouvin ahi; chuin hiche nikho chun Pakaiyin van ginle go ahinsolin: chuin mijousen Pakai le Samuel chu nasatah-in aging taovin ahi.

¹⁹Chuin mipi jouse chun Samuel henga, Kathi louna diuvin Pakai na Pathen henga nasohtedin neitao peh-un; ajehchu kachonsetnau jouse belapma hiche lenghi kaki thumu ahi, atiuve.

²⁰Chuin Samuel'in mipi ho henga, Kicha hih-un: nanghon hiche gitlouna jousehi nabolu ahitai: hitajongle Pakai juina-a konin kiheimang daovinlang, nalung pumpiuvin Pakai chu jenuvin;

²¹Chule kiheimang hih-un; phatchomnabei le huhhing theilou pannabei thilho najui louheldiu ahi; ajehchu hihochu ahomkeo ahiuve.

²²Chutile Pakaiyin amin loupina jala amite adalhah louding ahi: ajehchu nangho amite-a semdinghi Pakai kipana ahi.

²³Chukalvalin keiman vang, nangho dinga kataona man kangah-a Pakai chunga kachonset dingchu Pathen'in jahda hen; amavang keiman apha le lamdih chu kahil dingu ahi.

²⁴Pakai bou gingun lang, nalung pumpiuvin thutah-in ama jenun: itobang thil loupitah nanabolpeh-u hitam ngaitouvin.

²⁵Ahinla nangho gilou tah-a nachon jingule, nangho le nalengpau nagom uva namanthah dingu ahi, ati.