Read Thado Chin 1 Samuel 13 Bible Online

1 Samuel 13 - Thado Chin bible

1 Samuel 13

¹Saul kumkhat aleng changin; chuin Israelte chunga kumni alengchan phatnin;

²Saul'in ama dingin Israelte lah-a konin pasal sangthum alhengdoh-in; sangni chu Saul'in Michmash le Bethel molsanga aumpin; sangkhat chu Jonathan toh Benjamin gam Gibeah'a aumun: chule mipi amohho chu apon in cheh uvah asoltan ahi.

³Chuin Jonathan'in Gebah'a Philistine sepai touho chu asatnin, hichu Philistine ten ajataove. Chuin Saul'in, Hebrew miten anajaohen atin, gamsung jouse-a chun sumkon amutnin ahi.

⁴Chuin Israelte jousen Saul'in Philistine sepai honkhat abulu-in, chule Israelte chu Philistine te hot ahung hitaove ti ajataovin ahi. Chuin mipi ho chu Saul lengpa henga Gilgal'a akikhom taove.

⁵Chuin Philistine te chu Israelte toh kisatdin akikhom khomun, sakol kangtalai sangsomthum, sakol sepai sanggup, chule mipi chu twikhanglen kama neldi jat helin atamun ahi. Chuin amaho ahung kondoh-un, Beth-aven'a pat solama um Michmash'a pannun asemun ahi.

⁶Chutia Israel miten nochinto-a aumu amuphatnun, (ajehchu mipi chu lungdong lheh jenguva ahi,) mipi chu songko sung, hambohlah, songpiho-a, munsang ho-a, chule kotong dunga akisel gamtaove.

⁷Chule Hebrew mi phabep Jordan agalkai jun, Gad le Gilead gama acheuvin ahi. Saul vangchu Gilgal'a aum nalaijin, mipihon kihotpum pummin anung ajuijun ahi.

⁸ Chuin Samuel'in phat ateppeh dungjuijin, nisagi aumin: ahin Samuel chu Gilgal'a ahunglou phatnin; mipi ho chu ama-a konin akithecheh taovin ahi.

⁹Chuin Saul'in, Hikoma hin kahenga govam thilto le chamna thilto hinchoijun, ati. Chuin aman govam thilto aboltai.

¹⁰Chuin ahitin ahi, aman govam thilto atojou jouvin, veuvin, Samuel ahung lhung paijin; chule Saul chu amatoh kimuto-a chibai bohdin apotdoh-in ahi.

¹¹Chuin Samuel'in, Ipi bola nahim? ati. Chuin Saul'in, Mipi ho keija kona akithe cheh uva, nangla nikho kitep sunga nahung da-a, chule Philistine te Michmash'a akichop khomu kamuphatna;

¹²Hichejeh-a keiman, Tu-a hi Philistine te keima doudinga Gilgal'a hungdiu ahitan, keimanla Pakai henga ngehna kanei louding ahi katin: hijeh-a chu keile kei kachamlouva kakibola, govam thilto kanato ahi, ati.

¹³Chuin Samuel'in Saul henga, Nangin ngol hoitah thil nabol ahitai: nangman thupeh nape-a Pakai na Pathen'in nathupeh chu nanit tapoi: ajehchu tuahi Pakaiyin nalenggam chu Israel chunga a-itih-a dinga phudet ding agot ahin;

¹⁴ Amavang tun nalenggam hi chejom louding ahitai: ajehchu nangman Pakaiyin nathupeh chu nanit lou jeh-a, Pakaiyin ama lungput tobang pumi akihol ahitai, chule Pakaiyin ama chu amite chunga lamkai dinga athupeh ahitai, ati.

¹⁵Chuin Samuel akipat doh-in Gilgal'a konin Benjamin gam Gibeah'a achetoutai. Chuin Saul'in amatoh umkhom miho chu pasal jagup tobang asimdohtai.

¹⁶Chuin Saul le achapate Jonathan, chule amanito umkhom miho chu Benjamin gam Gibeah'a chun aumtaove; ahinla Philistine mihon Michmash'a panmun asemun ahi.

¹⁷Chuin Philistine te pan mun'a konchun michom dingho chu loithumin ahung potdoh-un: loikhat chun Shual gam Ophrah jotna lampi chu ajotnun;

¹⁸Chule loikhat chun Beth-horon jotna lampi ajotnun; chule loikhat chun gamthip Zeboiim phaicham ngatna gamgi chin jotna lampi ajotnun ahi.

¹⁹Tun Israel gampumpia chun thihkheng khatcha anaumpon ahi: ajehchu Philistine ten, Achuti loule Hebrew miten chemjam le tengcha kikhen getnunte, atiu ahi.

²⁰Chule Israelte jouse chu amitakip alangkon thih-u, alou kalnao, aheichao, chule atuphenghou khenghem dinga Philistinte henga chesuhji ahiuve.

²¹Achutijeng vangin amahon tupheng, langkon thih, thihka, heicha, chule gancha hoina thihmol suhhemna aneijun ahi.

²²Chutichun chuche ni-a kidouna-a chun ahitin ahi, Saul le Jonathan toh kiloi miho khutna chun chemjam le tengcha khatcha muding aumpon ahi. Ahinla Saul le achapa Jonathan'in vang aneijin ahi.

²³Chuin Philistine sepaihon ho chu Michmash lampi lama achedoh-un ahi.