Read Thado Chin 1 Samuel 14 Bible Online

1 Samuel 14 - Thado Chin bible

1 Samuel 14

¹Tun nikhat chu ahitin ahi, Saul chapa Jonathan'in agalvon po-a pang gollhangpa jah-a, Hungin, Philistine sepaihon ho umna apang langkhatna khun gache galkai hite, ati. Ahinla apa henga anahet sahpon ahi.

²Chule Saul chu Gibeah khopam ningkoi Migron'a um kolbuthei phung noikhatna atouvin ahi. Chule ama umpi mihochu pasal jagup tobang ahiuve.

³Chuin Shiloh'a chun Pakai thempu Eli chapa, Phinehas chapa, Ichabod sopipa Ahitub chapa Ahiah chu boitong sangkhol akivonin ahi. Chule mipi chun Jonathan chelam chu ahepouve.

⁴Chuin Jonathan'in Philistine te sepaihon ho galkai agotna lampi kikah jetle veija chun songpihem ni aumin, khatpa minchu Bozez ahin, khatjopa min chu Seneh ahi.

⁵Tomasah pachun Michmash sahlam angan, khatjopa chun Gibeah jotna lhanglam angan ahi.

⁶Chuin Jonathan'in agalvon po-a pang golhangpa henga, Hungin, hiche cheptanlou sepaihon ho heng lama khun galkai hite: Pakaiyin eini dinga na eitoh pehlhon thei ahi. Ajehchu Pakaiya dingin huhdohna natohna-a hin tam le lhomin ima apopon ahi, ati.

⁷Chuin agalvon popan ajah-a, Nalungsunga umjouse chu bolin: kiheijin; ven, nalungdei banga umdingin keima nakoma kaume, ati.

⁸Chuphatnin Jonathan'in, Ven miho henga khun galkai hitin, amaho gakimusah hite.

⁹Amahon eini henga, Naheng lhona kahung kahseovin umtadi lhonin atiuva ahile, i-umna mun lhona idinden lhonding, ahenguva ichetou louding ahi.

¹⁰Ahinla amahon, Kahenguva hungtou lhonin, atiuva ahile ichetou ding ahi: ajehchu Pakaiyin ikhutna amahochu eipehdoh lhon ahitan: hiche hi amelchihna hiding ahi, ati.

¹¹Chuin anilhonin Philistine sepaihon ho aga kimusah lhontan ahi. Chuin Philistine ten, Veuvin, Hebrew ho khu akiselnao kohoma konin ahungdoh uve, atiuve.

¹²Chuin sepaiho chun Jonathan le agalvon popa chu ahin donbutnun, Kahenguva hungtou lhonin, thilkhat vetsah-unge atiuve. Chuin Jonathan'in agalvon popa jah-a, Neihin juitouvin: ajehchu Pakaiyin amahokhu Israelte khutna apehdoh ahitai, ati.

¹³Chuin Jonathan'in akhutle akeng tho-a akaltouva ahile, agalvon popan anung ajuitan ahi. Chuin amaho Jonathan masanga chu alhu taovin; anunga agalvon popa chun ahin that peh-in ahi.

¹⁴Chuin Jonathan le agalvon popa mitha masatpen hochu mi somni bang ahin, gamneocha bongchal tokhat khoijou theibep acre keh sungbou ahi.

¹⁵Chuin loujauva mipi janel lah leh mipi ho jouselah'a chun tijatna nasatah aumtan; sepaihon ho le thilchomho jong akihotnun: chule ling akihotnin, chutichun tijatna nasatah aumtan ahi.

¹⁶Chuin Benjamin gama Gibeah'a Saul'in khongah akoiho chun aveovin; chuin veuvin, mihopi chu achat melmulun, khat le khat akiphuto saosaovun ahi.

¹⁷Chuin Saul'in aumpi mipi ho jah-a, Tun kisim unlang ilah uva koi potdoh am veuvin, ati. Chuin amahon asimphatnun, veuvin Jonathan le agalvon popa anaum tapoi.

¹⁸Chuin Saul'in Ahiah jah-a, Pathen thingkhong chu hilama hinpon, ati. Ajehchu hichepetna chu Pathen thingkhong chu Israelte toh uma ahi.

¹⁹Chuin ahitin ahi, Saul'in thempu henga thu aseipet chun, Philistine te janel husa chu ahagincheh cheh jengtan: chuin Saul'in thempupa jah-a, Nakhut ladohtan, ati.

²⁰Chuin Saul le akoma um mijouse chu akikhom khomun, galmuna chun ahungtaove. Chule veuvin, mitin chemjam chu aloipa chunga achun, chule boina nasatah aumin ahi.

²¹Chukalvalin chuche masanga Hebrew miho Philistine te toh ana umkhomho, chuche gamkimvela kona agebuh uva amahotoh anachetouho chu, amaho jongchu Israelte toh apangkhomun, Saul le Jonathan to apangkhom taovin ahi.

²²Chubangma chun Ephraim molsanga anakisel Israel mite jouse chun, Philistine te ajam taove tithu ajah phatnun, amaho jong chun galsat na-a amaho chu hatah in anungdelun ahi.

²³Chutichun Pakaiyin chuche nikho chun Israel ahuhdoh-in, chule gal kisat chu Beth-aven geijin agalkaijun ahi.

²⁴Chule hiche nikho chun Israelte chu alung genthei lheh-un ahi: ajehchu Saul'in, Kamelmate phu kalahthei nadin, nilhah ahi kahse-a an ne-a chu sapset changhen, tia mipi chu ahahsel ahi. Chutichun koimachan an kiti atep pouvin ahi.

²⁵Chuin gamsung mi jouse chu gamlah ahunglhung taovin; chule leichunga chun khoiju anaumin ahi.

²⁶Chuin mipi ho jouse chu gamlah ahunglut phatnun, veuvin, khoiju anakaijin; ahin koiman akhutna alan anepon ahi: ajehchu mipi chun hahselna chu akichatnu ahi.

²⁷Ahinla Jonathan'in apan mipi hahselna-a ahahsel chu anajapon; hijeh chun akhutna achoi molmuh-a chun khoiju lah chu asunlutnin, chuin akhutnin alan akama ahengtan ahile, amitchu hoitah-in ahung hahdoh theitan ahi.

²⁸Chuphatnin mipi lah-a khatnin adonbutnin, Napan mipi nasatah-a hahselna-a ahahsela, Tunia an ne-a michu sapset changhen ati ahi, ati. Chutichun mipi alhasam tan ahi.

²⁹Chuphatnin Jonathan'in, Kapan gamsunghi agentheisah ahi: Katao ahi, vetemin, hiche khoiju themkhat katep jeh-a kamithi iti hungha doh-a hitam.

³⁰Mipi jonghin amelmateu thil achom naova amuhouhi aning anopmin nomtah-in neleu phacheh louding ham? hijeh-a chu tugeija Philistine te tamtah itha theilouvu hilouham? ati.

³¹Chule hicheni chun Michmash'a pat Aijalon geijin Philistine te chu athat peh-un; chule mipi chu alhasamlheh taovin ahi.

³²Chuin mipi chu thil kichom chunga achuvin, kelngoiho, bongchalho, bongnouho chu tollhanga athatnun: athisan pumchun anetaovin ahi.

³³ Chuphatnin amahon Saul jah-a, Vetan, mipin thisan aneh uva konin Pakai dounan achonse taove, atiuve. Chuin aman, Nanghon nasukhelun; tuni hin songtum lentah neitahkhum taove, ati.

³⁴Chuin Saul'in, Mipi lah-a kithecheh unlang, ajah uvah, Amitakipmin nabongchalu, nakelngoiju hinkaijun, chule hikoma hin thatnuvin lang neuvin; thisan puma ne-in Pakai dounan chonse hih-un, ati. Chuin chuche jan chun mipi jouse amitakipmin abongchalu chu ahinkaijun, hikoma chun athat taove.

³⁵Chuin Saul'in Pakai dingin maicham khat asemin; hiche chu Pakai dinga maicham asem masat pentah ahi.

³⁶Chuin Saul'in, Eihon janlaijin Philistine te nung delsuh-u hitin, jingkhovah kahsen chommu hitin, chule amaho khatcha hinghoi pouhite, ati. Chuin amahon, Nangman phante nati tichu bolin, atiuve. Chuphatnin thempupan, Hilamhin Pathen naitadiu hite, ati.

³⁷Chuin Saul'in Pathen adongin; Philistine te satna kakonsuh dingham? Nangman amaho chu Israelte khutna napehdoh dingham? ati. Ahinla hiche nikho chun adonbut tapoi.

³⁸Chuin Saul'in, Mipi ho pipui jousen hilam hinai cheh-un: chule tunia hiche chonset hi hoilaija umham heuvin lang vetemun.

³⁹Ajehchu Israel huhhing-a hingjing Pakai mina kasei ahi, kachapa Jonathan chunga uma hijongle, ama thonlouva thiding ahi, ati. Ahinla mipi ho jouse lah-a konin khatchan adonbut pon ahi.

⁴⁰Chuphatnin aman Israelte jouse jah-a, Nangho langkhatna umunlang, keile kachapa Jonathan langkhatna kaum lhonding ahi, ati. Chuin mipin Saul jah-a, Nangman phante nati tichu boltan atiuve.

⁴¹ Hijeh chun Saul'in Israelte Pakai Pathen henga, Vang kisan dihtah hintah langin, ati. Chuin Saul le Jonathan chunga achutan, mipi vang ahoidohtai.

⁴²Chuin Saul'in, Keile kachapa Jonathan kah-a vang san uvin, ati. Chuin Jonathan chunga achutai.

⁴³Chuphatnin Saul'in Jonathan jah-a, Ipi nabolham neihilin, ati. Chuin Jonathan'in, Kakhutna um mol leh-a khoiju themcha khat katep ahi, chule ven, kathi teiding ahi, tin ahiltan ahi.

⁴⁴Chuin Saul'in, Pathen'in hitichun chule akalvalin jong boljenghen, ajehchu Jonathan, nangma nathi teiding ahi, ati.

⁴⁵Chuin mipi ho chun Saul jah-a, Israelte lah-a huhhingna loupitah bolla Jonathan hi thiding ham? Pathen'in jahda hen: Pakai hingjing mina kaseiju ahi, aluchunga kon samjang khatjon tolla lhalouding ahi; ajehchu tunin aman Pathen toh atongkhomin ahi, atiuve. Chutichun mipin Jonathan chu athilou nadin ahuhdoh taove.

⁴⁶Chujouvin Saul chu Philistine te nung adelna-a konin ache toutan; chule Philistine te jong aumnaova achetauve.

⁴⁷Chuti chun Saul'in Israelte chunga lengvai apon, ningtina amelmate jouse, Moab, Ammon chate, Edom, Zobah lengho, chule Philistine mite to akidouvin: chule akiheina lam tina gal ajoupeh-in ahi.

⁴⁸Chuin aman mipi janel akhomin, Amalek mite asatnin, chule amaho chom gama miho khutna konin Israelte ahuhdoh-in ahi.

⁴⁹Tun Saul chapate chu Jonathan, Ishui, chule Melchishua ahiuvin, chule achanu teni minchu hiche ahi; apeng masa nu min Merab ahin, chule aneojonu min Michal ahi.

⁵⁰Chule Saul inneipi min Ahinoam ahin, Ahimaaz chanu ahi. Chule ajanel gal lamkaipa minchu Abner ahin, Saul pangahpa Ner chapa ahi.

⁵¹Chule Kish chu Saul pa ahin, chule Abner pa Ner chu Abiel chapa ahi.

⁵²Chule Saul nikholai sungse chun Philistine mite toh kidouna chu anasalheh jengin ahi: chutichun Saul'in mihat le mihangsan amu poupouva ahile, amanin ama-a dingin akipui jengjin ahi.