Read Thado Chin 1 Samuel 15 Bible Online

1 Samuel 15 - Thado Chin bible

1 Samuel 15

¹ Samuel'in jong Saul jah-a, Pakaiyin ami Israelte chunga leng dinga nangma thao nudingin einasol ahin, hijeh chun tun Pakai thusei hi ngaijin.

² Janel Pakaiyin hitin aseije, Amalek'in Israel chunga ana thilbol, Egypt'a kona ahungtouva chu lampia iti ana lamtin ham ti kahe jingin ahi.

³Tun chenlang Amalek gasatnin, chule aneijouseu sumanghelin lang, amaho khatcha khenhih-in; pasal le numei agomin, naosen le noicheplai, bong le kelngoi, sangongsang le sanganho abonin thatgamin, ati.

⁴Chuin Saul'in mipi ho chu akhom khomin, Telaim mun'a chun keng sepaiho sangjani leh, Judah mi sangsom asimdoh-in ahi.

⁵Chuin Saul Amalek khopi khatna ahungin, phaichama chun achangpang tan ahi.

⁶Chuin Saul'in Ken miho jah-a, Cheovin, kipatdoh-un, Amelek mite-a kon chun chesuh-un, achuti loule keiman amahotoh kasuh mangtha dingu ahi: ajehchu Egypt'a kona Israelte ahungtouvu chun hepina nana musah-un ahi, ati. Hijeh chun Ken miho chu Amalek miho-a konin apotdoh taove.

⁷Chuin Saul'in Amalek mite chu Havilah'a pat Egypt toh kigalsai Shur lutna geijin anasuhmang pehtan ahi.

⁸Chuin aman Amalek mite lengpa Agag chu ahingin amanin, mijouse chu chemjam monghemin asumang sohkeijin ahi.

⁹Ahin Saul le mipi chun Agag le kelngoi hoipenho, bongchal thao ho, kelngoithao ho le anouhose chu ahing hoijun, ahin aphalou le dei umlou sechu asumang heltan ahi.

¹⁰Hichun Samuel henga Pakai thu ahung lhungin, hitin ati,

¹¹Saul lenga kanatundoh hi kakisih tai: ajehchu ama eijui na-a konin akileheijin, kathupeh ho atongdoh tapoi, ati. Hichun Samuel alungkham sahtan; jankhovah helin Pakai henga ataotai.

¹²Chuin Saul kimupi dinga Samuel jingpitah-a athochun, Samuel henga, Saul chu Carmel lhanga ahungin, chule vetan, minkhat akisemin, chule ache lelen, achedoh-in, Gilgal'a achesuhtai, tin aseipeh-uvin ahi.

¹³Chuin Saul henga Samuel ahungin: chule Saul'in ahenga, Pakai phattheiboh chang nahi; keiman Pakai thupeh chu kamolso tai, ati.

¹⁴Chuin Samuel'in, Kanakhanga kelngoi hamgin le bongchal hamgin kajah hi ipi thu hitam? ati.

¹⁵Chuin Saul'in, Amahon Amalek mite-a kona ahinkaiju ahi: ajehchu mipihon kelngoiho le bongchalho aphapenho chu Pakai na Pathen lhaina dinga ahing hoiju ahi; adangse vang kasumanghel taove, ati.

¹⁶Chuphatnin Samuel'in Saul henga, Khongaijin, tujana Pakaiyin kahenga ipi anaseijem nahilinge, ati. Chuin aman, Seijin, ati.

¹⁷Chuin Samuel'in, Namitmu-a neocha nahilaija chu Israel phungpi luchanga nakisema, Pakaiyin Israel pumpi chunga leng dinga thao nananu hilouham?

¹⁸Chule Pakaiyin kholjinin nasolin, nahenga, Chenlang michonse Amalek mitekhu gasumangsoh helin, chule abeitheng tokah seuvin amaho chu satnin, ati.

¹⁹Achutile ibola Pakai awchu ngailouva, thil kichom chunga nachuhjoh-a, chule Pakai mitmu-a thilse nabol ham? ati.

²⁰Chuin Saul'in Samuel jah-a, henge, keiman Pakai thusei kanitnin, Pakaiyin eisolna lampia chun kachen, Amalek lengpa Agag chu kahinpuijin, Amalek mite chu kasumang heltai.

²¹Ahin mipi hin suhmang heldingsa thilkichom kelngoiho le bongchalho, thil lah-a apha chung nungho chu Gilgal'a Pakai na Pathen henga ganlhaina-a dinga ahin kilah-u ahi, ati.

²²Chuin Samuel'in, Pakaiyin Pakai thusei ngai akipapi banga, govam thilpeh le ganlhainaho akipapi hinam? ven, thuman hi ganlhaina sanga phajo ahin, chule thusei kingaipeh hi kelngoichal thaotah sanga phajo ahi.

²³Ijeh inem itile golkeh hi aisana-a chonsetna toh kibang ahin, louchal kitihi khangitlouna le milim houna toh kibang ahi. Ajehchu nangman Pakai thusei napaidoh tah jeh-in, Aman jong leng nahina-a kona napaidoh ahitai, ati.

²⁴Chuin Saul'in Samuel henga, Keima kachonse tai: ijeh inem itile Pakai thupeh hole nangma thuho kapalkeh tai. Ajehchu mipi kakichatna, athu-u kanangai ahitai.

²⁵Hijeh chun, tun, nahenga katao ahi, kachonsetna neingaidamin lang, Pakai chu kahouthei nadingin keima toh kinungle kitnin, ati.

²⁶Chuin Samuel'in Saul jah-a, Keima nang toh kakinungle kit louding ahi: ajehchu nangman Pakai thu napaidoh ahitan, Pakaiyin Israelte chunga leng nahina-a kona napaidoh ahitai, ati.

²⁷ Chuin Samuel chu chemang dinga akiheija ahile, aman asangkhol chol mong chu amanin, aloi-eh tan ahi.

²⁸Chuin Samuel'in ajah-a, Tunia hi Pakaiyin Israel lenggam chu nanga kona alhetela, nangma sanga phajo naheng nakom khat henga apeh ahitai.

²⁹Chujongle Israel Thahatna chu jou louding, alung jong aheilou ding ahi; ajehchu ama lunghei ding mihem ahipoi, ati.

³⁰Chuphatnin aman, Keima kachonse tai: hitajongle katao ahi, kamite upaho masang le Israelte masanga neijabolin lang, Pakai na Pathen chu kahouthei nadingin keima toh kinungle kitnin, ati.

³¹Chuti chun Samuel chu Saul toh akinunglen, chuin Saul'in Pakai ahou tai.

³²Hichun Samuel'in, Amalek mite lengpa Agag chu kahenga hinpuijun ati. Chuin Agag chu ahenga ti kithing pumin ahungin ahi. Chule Agag chun, Thina tijat umtah chu chemanga ahitai, ati.

³³Chuin Samuel'in, Nachemjam chun numei ho chabei aso banga, numei lah-a nanujong chabei hiding ahitai, ati. Chuin Samuel'in Gilgal'a Pakai masanga chun Agag chu ahal halin asattel tan ahi.

³⁴Chujouvin Samuel chu Ramah'a achetan; chule Saul jong Saul umna Gibeah ah achetoutan ahi.

³⁵Chuin Samuel chu athi nikho geijin Saul kimupi dingin ahungkit tapoi; ahijeng vangin Samuel chu Saul dingin alunghem jingin ahi. Chule Saul chu Israelte chunga lenga anatun chu Pakai akisih tan ahi.