Read Thado Chin 1 Samuel 16 Bible Online

1 Samuel 16 - Thado Chin bible

1 Samuel 16

¹Chuin Pakaiyin Samuel jah-a, Israelte chunga alengchana kona kapaidoh henasa itihchan Saul dinga nalunghem dingham? nasaki-a thao sungdim minlang chen, keiman Bethlehem mi Jesse henga kasolding nahi: ajehchu achapate lah-a khu lengchang ding khat keiman gotsa kakoi ahitai, ati.

²Chuin Samuel'in, Iti kachethei dingham? Saul'in jadoh leh eithading ahi, ati. Chuin Pakaiyin, Bongla khat kaijinlang, Pakai henga ganlhaina neidinga hung kahi, tin.

³Chule ganlhaina-a chun Jesse kouvin, chule keiman nabolding chu kahilding ahi: chule nahenga kaminphah pachu keima dinga thao nanu ding ahi, ati.

⁴Chuin Samuel'in Pakai seibang chun abolin, Bethlehem'a ahungtan ahi. Chuin khopi-a upaho chu ahung jehchun atiu akithingin, Chamna-a hunga nahi hinam? atiuve.

⁵Chuin aman, Chamna ahinai: Pakai henga ganlhai bola hunga kahi: nangho kisuthengun lang kahenga ganlhaina-a hungun, ati. Chuin Jesse le achapate chu asuthengin, ganlhaina-a din akoutai.

⁶Chuin ahitin ahi, amaho ahung phatnun, aman Eliab chu aven, Pakai thaonupa chu amasanga umpa hi hiteijinte ati.

⁷Ahivangin Pakaiyin Samuel jah-a, Nangman amaiso ahiloule asandan chu vehih-in, ajehchu keiman amachu kadeilou ahi; ijeh inem itile Pakaiyin mihem thilvet banga avet ahipoi; ajehchu mihemin polam melput avet ahin, Pakaiyin vang lungsung avet ahi, atipeh-e.

⁸Chujouvin Jesse'n Abinadad akouvin, Samuel anga asolin ahi. Chuin aman, Hichepa jong Pakaiyin alhengpoi, ati.

⁹Chujouvin Jesse'n Shammah asolkitnin ahi. Chuin aman, Hichepa jong Pakaiyin alhengpoi atipeh-e.

¹⁰Avelin Jesse'n achapate sagiho chu Samuel anga asolin, ahi. Chuin Samuel'in Jesse jah-a, Hicheho hi Pakaiyin alhengpoi, ati.

¹¹Chuin Samuel'in Jesse jah-a, Hiche mun'a hi nachate jouse umkim sohkeiju vaham? ati. Chuin aman, Aneopenpa avat nalaije, chule ven ama kelngoi ching ahi, ati. Chuin Samuel'in Jesse jah-a, Gakousah-in; ajehchu ama hikoma ahunglhun masangse-a eiho itou loudiu ahi, ati.

¹²Chuin aman agakou sah-in, ahinpui taove. Tun amachu tahsa phatah, mitha hoitah, chule vetnom umtah ahi. Chuin Pakaiyin, Kipatdoh-in, thao nutan; ajehchu hichehi amapa chu ahi, ati.

¹³Hichun Samuel'in saki-a thaochu alan, asopite lah-a amachu thao anutai. Chuin chuche nikho-a patnin Pakai lhagao David chunga achutai. Hitichun Samuel akipatdoh-in, Ramah'a achetai.

¹⁴Ahinla Pakai lhagao chu Saul'a konin achemang tan, chule Pakaiya kon lhagao gilou khatnin asugimtan ahi.

¹⁵Chuin Saul sohten ahenga, Ven, tuahi Pathen'a kon lhagao gilou khatnin nasuhgim ahitai.

¹⁶Tun ka-pakaiyun namasanga um nasohte hin semjang saithem mikhat agahol nadiuvin thupeh neijin; chule hung hitiding ahi, Pathen'a kon lhagao gilou chu nachunga ahung umteng, aman semjang asai ding, chutengle nangma naphat jiding ahi, atiuve.

¹⁷Chuin Saul'in asohte jah-a, Tun asai themtah mikhat neipeuvin, amachu kahenga hinpuijun, ati.

¹⁸Chuin sohte lah-a khatnin adonbutnin, Ven, Bethlehem mi Jesse chapa semjang saithemtah, gal hat mihangsan, galbolmi, ijakaija hekhen themtah, chule melhoitah, Pakaiyin aumpi khat kamui, ati.

¹⁹Hijeh chun Saul'in Jesse henga thupole ho solin, ahenga, Kelngoiho toh umkhom nachapa David chu neihinsol peh-in, ati.

²⁰Chuin Jesse'n changlhah toh lengpitwi haikhat, chule kelnou khat sangan apohsah-in, achapa David khutna Saul athot tai.

²¹Chuin David Saul henga ahungin, amasanga adingtai: chule aman nasatah-in alungsetnin, agalvonpon ahung pangtai.

²²Chuin Saul'in Jesse henga, Katao ahi, David hi kamasanga dingjing hen; ajehchu ama kamitmun lungsetna achange, ati.

²³Chuin ahitin ahi, Pathen'a kon lhagao gilou chu Saul chunga aumtengle, David'in semjang alan, akhutna asaijin ahi: hitichun Saul chu alimdohjin, aphajitan, chule lhagao gilou chun adalhaji tan ahi.