Read Thado Chin 1 Samuel 17 Bible Online

1 Samuel 17 - Thado Chin bible

1 Samuel 17

¹Tun Judah gam Shochoh mun'a chun Philistine galsat ho chu galbol din akikhomun, chule Ephes-damim'a um Shochoh le Azekah kikah-ah ponbuh asongun ahi.

²Chuin Saul le Israelte jong akikhom khomun, Elah phaicham panga aponbuh-u asongun, Philistine te douna-a galsatdin akigongtoh taove.

³Chuin Philistine te chu molpang langkhatna adingun, chule Israelte chu molpang khatlama adingun ahi. Chule akah uva chun phaicham khat aume.

⁴Chuin Philistine te gebuh-a konin Gath khomi amin Goliath kiti mihat tah khat, tong gup le khap khatna sang ahungdoh-in ahi.

⁵Chule aman aluchunga sum-eng lukhuh akhuh-in, thih sangkhol aki-ah-in, asangkhol gihdan chu sum-eng shekel sanga agih ahi.

⁶Akengteni sum-eng ngaltomin akitomin, chule alengkou teni kikah-a sum-eng tengcha aumin ahi.

⁷Chule atenglung chu ponkhong ho talhang abangin, atengpeh gih chu thih shekel jagup ahi: chule mikhatnin apho apon amasanga achen ahi.

⁸Chuin ama adingin Israel galsat miho jah-a chun asamin, Ipi dinga galsat dinga hung kigola nahiuvem? keima Philistine kahi, nangho Saul sohte nahiu hilouham? nanghodin mikhat lheng unlang, amachu kahenga hungsuh hen.

⁹Aman eihung kisatpi jouva, eitha-a ahile, keiho nasoh-u hiuvingting; ahinla ken kajo-a, amachu katha-a ahile nangho kasoh nahiuva, neijen dingu ahi, ati.

¹⁰Chuin Philistine mipa chun, Tunia hi Israel galsat miho kataitom nahiuve; kaki satpi dingin, mi khat neipeuvin, ati.

¹¹Saul le Israel mijousen Philistine mipa thusei chu ajah phatnun, alungu alhan, akichalheh jengun ahi.

¹²Tun David chu Judah gam Bethlehem'a Ephrath mi Jesse chapa ahi; amapan chapa get aneijin, chule ama Saul nikholaija chun tehsetah ahitai.

¹³Chule Jesse chapa lenpen thumho chu acheuvin galmuna chun Saul ajuijun ahi. Chule achapa thum galmuna cheho minchu, achapa lenpen Eliab, abanna Abinadad, athumna Shammah ahiuve.

¹⁴Chule David chu alhumpen ahin, chule alenpen thumin Saul ajuiju ahi.

¹⁵Ahinla David chu achen Saul'a konin apa kelngoi ching dingin Bethlehem'a ahung kile kit tai.

¹⁶Chule Philistine mipa chun jingkah nilhah-in ahin naijin, nisomli sungin ahung kilah jingin ahi.

¹⁷Chuin Jesse'in achapa David jah-a, Tun na-ute dingin changkanpoh ephah khatle changlhah lhon somkhat choi jinlang, na-ute gebuh lama lhaijin,

¹⁸Chule hiche bongnoiha somkhat hi sangkhat chunga gal lamkaipa pohpeh-in, chule nasopite iti umuvem gavenlang thu hinle poh-in, ati.

¹⁹Tun Saul le Israel mite jouse chu Elah phaichama Philistine tetoh kisatdinga uma ahiuve.

²⁰Chuin David chu jingkah matah-in athouvin, kelngoiho chu achingtup ding khattoh adalhan, Jesse'n athupeh bangchun thilho chu apon achetai. Chuin janelho galkula kon galsat dinga akijotdoh uva, galsat dinga a-ao laitah-un, ngahphol chu agalhungtai.

²¹Ajehchu Israelte le Philistine te chu galsat mi le galsat mi kisatto din akigol cheh taove.

²²Chuin David'in thil chingtuppa henga athilpohho chu adalhan, galsat miho lah-a alhailutnin, a-ute chu chibai agabohtai.

²³Chuin amahotoh akihou laijin, veuvin, Gath mi Philistine mihatpa, amin Goliath kitipa chu Philistine galsat mihon lah-a konin ahungdoh-in, athusei ngaibang chun ahinsei kitnin ahile, hichu David'in ajatai.

²⁴Chuin Israel mite jousen mipa chu amuphatnun, ama-a konchun ajamun, hatah-in akichao vin ahi.

²⁵Chuin Israel miho chun, Ahungdoh mipa khu namuvem? Israelte sujum ding mongmonga hungdoh-a ahi; chule hiti ding ahi, ama that penpen chu lengpan haona nasatah-a ahaosah ding, chule amachu achanu jong apeh-a, apate insung chu Israel lah-a a-onthol sah ding ahi, atiuve.

²⁶Chuin David'in akoma dingho jah-a chun, hiche Philistine mipa thatna, Israel te-a kona minsetna lamangpa chu i-kilo dingham? ajehchu hiche cheptanlou Philistine mipa hi hoi koi hija, Pathen hing galsat miho hi ajumso ham? ati.

²⁷Chuin mihochun hitihin adonbutnun, Amapa that penpen chunga chu, akisei bang banga kibolding ahi, atiuve.

²⁸Chuin a-upa alenpen Eliab'in miho toh akihoulim chu ajan; David chunga chun Eliab lunghanna chu akoujah jengtan, ajah-a, Ibola hikoma hungsuh nahim? chule kelngoi lhomcha khat chu gamthipma koi nahin chin sah ham? naki letsah na le naphatlou kahei; ajehchu kidouna munoma hungsuh nahi, ati.

²⁹Chuin David'in tu-a hi ipi kabol em? ajeh uma hilouham? ati.

³⁰Chuin ama-a konin adangho lama akiheijin, chutobangma chun aseijin ahi: chuin mipin amachu amasa bangma chun adonbutnun ahi.

³¹Chuin David thusei ho ajah phatnun, Saul henga aga hetsah taovin ahile, aman akouding ahinsol tai.

³²Chuin David'in Saul jah-a, Ama jehkhun koimacha lunglha hihhel hen, nasohhi kache-a hiche Philistine mipa tokhun kaga kisat ding ahi, ati.

³³Chuin Saul'in David jah-a, Hiche Philistine mipa kidoupi dingkhun chethei pon nate: ajehchu nangma khangdong chabou nahin, amakhu aneova patna galbolmi hung hija ahi, ati.

³⁴Chuin David'in Saul jah-a, Nasohhin apa kelngoi ana chingin, hia chun keipi bahkai le vompi ahunga kelngoihon lah-a konin kelngoi nouho ahunglhoh jiteng;

³⁵Anung kadel jin, kakidel pin, akama konin kaloidoh-in kahuh dohjin ahi: chule keima thatdinga ahung kipatdoh-a ahile, akhamula kamanin, kajepmin, kathatjitai, ati.

³⁶Nasoh hin keipi bahkai le vompi ani-in kathatnin ahi: chule hiche cheptanlou Philistine mipa hi Pathen hing galsat mite ajumso kimu ahin, hiteho khat tobang chu hiding ahi, ati.

³⁷David'in aseiben, Pakaiyin keipi khophanga konle vompi khophanga kona eina huhdoh ahin, aman hiche Philistine mipa khutna kona jong eihuhdoh ding ati. Chuin Saul'in David henga, Chen, Pakaiyin naumpi hen, ati.

³⁸Chuin Saul'in agalvon chu David avonpeh'in, aluchanga chun sum-eng lukhuh akhuhpeh-in, thih sangkhol a-ah peh-in ahi.

³⁹Chuin David'in achemjam chu agalvon chunga akojin, cheding agon ahi; ajehchu hichu anapatep khahlou ahi. Chuin David'in Saul jah-a, Hicheho pumin chethei ponge, ajehchu hichehohi kamangkhapoi, ati. Chuti chun David'in asutlha gamtai.

⁴⁰Chuin atenggol akhutna achoijin, vachadunga konin songchang jolsel changnga alhengin, akelngoi chinna sakhao neo sunga akhumin; akhutna ahsongse achoijin, Philistine mipa chu anailut tan ahi.

⁴¹Chuin Philistine mipa ahungin, David chu ahin naipheijin; chule apho popa chu amasanga achen ahi.

⁴²Chule Philistine mipan avetle David amuphatnin, amachu anoiselheh-in ahi: ajehchu ama khangdong ahin, tahsa phatah le maiso hoitah ahi.

⁴³Chuin Philistine mipan David jah-a, Keima uicha kahia kahenga tenggol toh nahungham? ati. Chuin Philistine mipa chun a-pathenhou min panin David chu agaosaptai.

⁴⁴Chuin Philistine mipan David jah-a, Kahenga hungin, keiman naphe chu chunga leng vachate le gamlah-a gamsaho kapeh ding ahi, ati.

⁴⁵Chuin David'in Philistine mipa jah-a, Nangma kahenga chemjam le tengcha chule lum tho-a nahung ahin, hinlah keima vang nangin nataitom Israel galsat mite Pathen, janel Pakai mina chu hunga kahi.

⁴⁶Tunia hi Pakaiyin nangma kakhutna eipehdoh ding; chule nangma katha-a, nalu kalahding; chule leiset pumpin Israelte lah-a Pathen aumme ti ahetna diuva, Philistine sepai janel longchu tunia hi chunga leng vachate le leija gamsaho kapeh ding ahi.

⁴⁷Chule hichea kikhom jousehin Pakaiyin chemjam le tengchan ahuhhing poi ti ahetdiu ahi; ajehchu galsat hi Pakaiya ahin, aman nangho kakhut uva eipehlut diu ahitai, ati.

⁴⁸Chuin ahung hitin ahi, Philistine mipa ahung kipatdoh-a, David henglam ahin nai phatnin, kintah-in David chu Philistine galsat miho toh kisuto dingin alhaitan ahi.

⁴⁹Chuin David'in akhutnin sakhao sung asoh-in, chua konchun songchang khat alan, ahsongse-a chu asea ahile, Philistine mipa chalpanga achun, songchang chu achalpanga alutnin; chuin ama amaijin tolla alhutai.

⁵⁰ Chuti chun David'in Philistine mipa chu ahsongse le songchang khatnin ajouvin, Philistine mipa chu asepmin, athattai; ahinla David khutna chun chemjam aumpon ahi.

⁵¹ Hitichun David alhaijin, Philistine mipa chunga adingin, achemjam chu alan, apaija konchun asatdoh in, athatnin, hia chun alu atanbongtai. Chuin Philistine ten amihatpao athi chu amuphatnun ajamtaovin ahi.

⁵²Chuin Israelte le Judah miho akipatnun, hatah in a-aovun, phaicham le Ekron kotpi aphah kahseovin Philistine te chu anung delun ahi. Chule Philistine mipi ho chu Shaaraim lampi dunga, Gath le Ekron changeijin alhuchap jengun ahi.

⁵³Chuin Israel chate chu Philistine te anungdel uva konin ahung kileuvin, aponbuh houchu asumang taove.

⁵⁴Ahin David'in Philistine mipa luchang chu alan, Jerusalem'a ahinpotai; ahin agalvon vang apon in'a akoijin ahi.

⁵⁵Chuin Saul'in David Philistine mipa satdinga achedoh amuchun, janel gallamkai Abner jah-a, Abner hiche gollhangpa hi koicha ham? ati. Chuin Abner'in, Vo lengpa, nahinna hingjeng hen, kasei theipoi, ati.

⁵⁶Chuin lengpan, Khangdongpa chu koicha ham? hinkhol toh-in, ati.

⁵⁷Chuin David chu Philistine mipa atha-a kona ahung kile phatnin, Abner'in apuijin, akhutna Philistine mipa luchang pumin Saul masanga ahin puilut tai.

⁵⁸Chuin Saul'in ajah-a, Gollhang nangma koipen cha nahim? ati. Chuin David'in adonbutnin, Keima Bethlehem mi nasoh Jesse chapa kahi, ati.