Read Thado Chin 1 Samuel 18 Bible Online

1 Samuel 18 - Thado Chin bible

1 Samuel 18

¹Chuin ahitin ahi, Saul henga athusei achai phatnin, Jonathan hinna chu David hinna toh akijopmat tan, chule Jonathan'in David chu ama hinna bang bangin angailutan ahi.

²Chuin hicheni chun Saul'in ama akipuijin, chule a-in lam apa in'a achesah nom tapoi.

³Chujouvin Jonathan le David'in kitepna aneilhone; ajehchu aman ama hinna bangin amachu angailun ahi.

⁴Chuin Jonathan'in achunga kai asangkhol len chu asutlhan, avonho, achemjam le athalpi, chule akongah sannin David apetan ahi.

⁵Chuin Saul'in asolnalam lama David achedohjin, chule chingthei tah-in aumin ahi: chule Saul'in ama chu galbolho chunga lamkaijin atungin, ama chu mijouse mitmu le Saul sohte mitmun deisahna achangin ahi.

⁶Chuin ahitin ahi, David'in Philistine mipa atha-a, atha naova kona ahungkileu chun, Israelte khopiho jouse-a konin numei ho lasa le lam pumin, khongcha le thil gingtheiho thon thanom tah-in Saul lamto dingin ahungpot doh-un ahi.

⁷ Chuin numei hon la asaovin, Saul'in asang asang athatnin, David'in sangsom sangja athatne, tin khatle khat akidonbutnun ahi.

⁸Chuin Saul alung ahanglheh-in, akisei chun alung phatmosah lheh-in; aman, David'in sangsom athan aseijun, chule keiman sangkhat kathan bou aseijuve: lenggam tailou adang ipi alahbe ding umtam? ati.

⁹Chuin Saul'in chuche ni-a pat akalse chu David chu amit thiptan ahi.

¹⁰Chuin ahitin ahi, ajingin Pathen'a kona lhagao gilou chu Saul chungah ahungchun, insunga chun gaothu aseijin: phatdanga bangin David'in akhutnin semjang asaijin; chule Saul khutna chun tengcha khat aumin ahi.

¹¹Chuin Saul'in tengcha chun akhon ahi; ajehchu aman, David chu tengchan bangtoh khobeh inge, ati ahi, chuin David ama-a konin nivei ahoidoh-in ahi.

¹²Chuin Saul'in David chu akichatan ahi, ajehchu Pakaiyin ama aumpin, Saul chu adalha tai.

¹³Hijeh chun Saul'in ama-a konin asoldoh-in, sangkhat chunga gal lamkaijin apansah-in; chule ama mipi masanga chun alutle apotlejin ahi.

¹⁴Chuin David alampi jouse-a chingthei tah-in aumin; chule Pakaiyin aumpin ahi.

¹⁵Hijeh chun Saul'in ama chingtheitah-a aum amuphatnin, amachu akichatan ahi.

¹⁶Ahinla Israelte jouse le Judah ten David chu a-angsung uva alutle apotle jeh-in angailuvin ahi.

¹⁷Chuin Saul'in David jah-a, Ven, kachanu lenjonu Merab hi najidinga kapeh ding nahi: keidin hangtah-in pang poupouvin lang, Pakai galchu satnin, ati. Ajehchu Saul'in, Kakhut hi achunga chuhda hen, amavang Philistine te khut joh chu achunga chuhen, ati ahi.

¹⁸Chuin David'in Saul jah-a, Keima hi koi kahiham? chule kahinkho ipi hija, Israel insunga kapa insung ipi hija, lengpa tupa kahiding ham? ati.

¹⁹Ahinla Saul chanu Merab chu David akipeh ding phatchun ahitin ahi, Meholath mi Adriel jidin amanu akipetan ahi.

²⁰Chuin Saul chanu Michal'in David adeichan; chule Saul jah-ah aseipeh-un ahile ama akipah lheh-in ahi.

²¹Chuin Saul'in, Amanu hi amapa dinga thang ahitheina dingle, Philistine te khut achunga achuhthei nadin, amanu chu David penge, ati. Hijeh chun Saul'in David jah-a, Tunia katupa nahi ding ahitai, ati.

²²Chuin Saul'in asohte thu apen, ajah uva, David toh guhthim chan kihou unlang, ahenga, Ven, lengpan nachunga kipana aneijin, asohte jousen nangailui: hijeh chun tun lengpa tupa hitan tiuvin, ati.

²³Chuin Saul sohten thuho chu David jah-a aseijun ahi. Chuin David'in, Kei migenthei le mi nahsahmo kahi nahena saova, lengpa tupa hidingchu thil bailama nagelu ham? ati.

²⁴Chuin Saul sohten ajah-a, David'in hitin aseije tin aseipeh-un ahi.

²⁵Chuin Saul'in, Hitia hi David henga nasei dingu ahi, lengpan amelmate phu lahna dinga Philistine chep jakhat tailou numei man imacha angehpoi tin seijun, ati. Ahinla Saul'in David chu Philistine te khutna thisah agot ahibouve.

²⁶Chuin asohten hichethu chu David aseipeh phatnun, lengpa tupa hiding chu David akipah-in; nikhoho chu akichai hihlaije.

²⁷Chuin David akipatdoh-in, amale amite acheuvin, Philistine miho jani agathatnun: David'in achepmu ahinpon, lengpa tupa ahithei nadin, lhingkeijin lengpa apetaove. Chuin Saul'in ajidin achanu Michal apetai.

²⁸Chuin Saul'in Pakaiyin David aumpi chu ahetan, chule Saul chanu Michal'in amachu angailun ahi.

²⁹Chuin Saul'in David chu akicha cheh tan: Saul chu David melma ahijom jingtan ahi.

³⁰Chujouvin Philistine pipuiho apotdoh-un: chuin ahitin ahi, amaho potdoh nungun, David chu Saul sohte jouse sangin chingthei cheh-in aumtan; chutichun aminchu nasatah-in akithangin ahi.