Read Thado Chin 1 Samuel 2 Bible Online

1 Samuel 2 - Thado Chin bible

1 Samuel 2

¹ Chuin Hannah ataovin, Kalungsung Pakaiya akipah lheh-in, Pakaiya ka ki hi choisangin aumin ahi: nami huhhingna-a chu kakipa jeh-in, kamelmate chunga kakam akikeh lenin ahi.

²Pakai banga thenga koima aumpoi: ajehchu nang tailou koimacha dang aumpon; i-Pathen'u tobang songpi jong aumpoi.

³Kiletsah valin thu seitahih-in; nakamin hoithona thu pothih hen: ajehchu Pakai chu hetna Pathen ahin, chule aman thil kibol jouse aleptohji ahi.

⁴Mihatte thalpi abong gamin, chule akipal lhuho chu hatna-in ataiju akigah pehtai.

⁵Ana oivaho-a chu neh holnan amaho le amaho changlhah mandin akipedoh-un, anakel ho akelkit tapouve: chutichun achingan cha sagi ahingtan, chatam neinuchu alhasamtai.

⁶Pakaiyin athatnin achoh hingjin: chule thikholkhul'a apuisuh-in apuidoh kitjin ahi.

⁷Pakaiyin avaichatsah-in chule ahaosahjin; aman asunemin chule adomsang jin ahi.

⁸Aman mivaicha chu leivuija konin akaithouvin; leng chapate lah-a tousah dingle, loupina laltouna losah dingin; khutdo chu eh lah-a konin adom doh-in ahi. Ajehchu leiset khompi jouse Pakaiya ahin, achunguva chu vannoihi atun ahi.

⁹Aman amithengte kengchu achintup ding; chule migiloupa chu muthima thipbeh-a umding ahi; ajehchu thahatna koima dingjou louding ahi.

¹⁰Pakai douho chu ahal hala kisuchipdiu; amaho chunga Ama van'a kona hung kitumding ahi. Pakaiyin leiset kolmong gei thu atan ding; aman alengpa chu thahat apehding, athaonupa ki chu achoisang ding ahi, ati.

¹¹Chuin Elkanah a-in lam Ramah kho-a achetai. Chule chapang chun Eli thempu masanga Pakai kin aboltan ahi.

¹²Tun Eli chapa teni chu Belial chapate ahilhonin, amanin Pakai ahe lhonpon ahi.

¹³Chule mipi ho lah-a thempuho bolding chu, khattouvin akilhaina atodoh teng, sa chu asou laitah le thempu sohpa chun satul kathum neikhat ahinchoija;

¹⁴Chule aman hichu bel bilnei, khangbel len, ahiloule bel sunga chu asutlutna, satul ka-a ahin khaidoh jouse chu thempupan ama dinga akilahji ahi. Hitia hi Shiloh'a hung Israelte jouse henga aboljiu ahi.

¹⁵Sathao chu ago masang uva jong thempu sohpa chu hunga, ganlhaina bolpa jah-a chu, Thempupa-a dinga gopeh dingin saphe chu neipen; ajehchu aman nanga kona akihon minsa alah louding, asel bou alahding ahi, atiji ahi.

¹⁶Chule khattouvin ahenga, Amahon athao ago masat teiju ngai ahi, chujou tengle nahinnan adeijat jat kilah-in tia aseija ahileh; aman, Ahipoi, tu-a hi neipeh teiding ahi, achuti loule thahatsana kalahding ahi, tia adonbut ji ahi.

¹⁷Chuti chun gollhangho chonsetna chu Pakai masanga anasalheh jengtan; mihon Pakaiya thilto chu athetlo taovin ahi.

¹⁸Amavang chapangchan Samuel'in tupat ponnem thempu boitong sangkhol aki-ah in, Pakai anga lhacha na atongin ahi.

¹⁹Chukalvalin anun sangkhol chol neokhat akhuipeh-in, kumsehle ganlhaina boldinga a-inneipu toh ahungtou lhonteng ahinchoi pehjin ahi.

²⁰Chuin Eli'n Elkanah le a-inneipi phatthei aboh-in, Pakai henga thilpeh jalchun hiche numeija hin Pakaiyin sonle pah napelhon hen, ati. Chuin a-in lhona achelhon tai.

²¹Chuin Pakaiyin Hannah ahung vilin ahile amanun nao avopmin, chapa thumle chanu ni ahingin ahi. Chule chapang Samuel chu Pakai angsunga akhanglenin ahi.

²²Tun Eli atehlheh jengtan, Israelte jouse chunga achapateni thilbol jouse; houkhom ho houbuh kotphunga numei hung kikhom ho iti alup piji lhonham ti ajatan ahi.

²³Chuin aman aheng lhonna, Ibola chutobang thil nabolhon ham? Ajehchu nakhanset bollhon chu hiche miho-a konhin kajan ahi.

²⁴Ahipoi, kachateni; kajahhi thulhut phaloutah ahi: nangnin Pakai mite chu nachon khelsah lhon ahitai.

²⁵Mikhat tou midang douna-a achonsetna ahile, thutanpan athu atan ding ahin: ahin mikhat tou Pakai douna-a achonsetna ahile, kon ama dinga ataopeh dingham? ati. Ahijeng vangin Pakaiyin amani thading atup jeh chun, apao thusei chu angaideh lhonpon ahi.

²⁶ Chuin chapang Samuel chu akhang akhangin, Pakai le mihem deisah-in aumtan ahi.

²⁷Chuin Pathen mikhat Eli henga ahungin, ajah-a hitin ati, Pakaiyin hitin aseije, Amaho Egypt gama Pharaoh insunga aum laijuva chu napa insunga kichentah-a kana phondoh hitalou ham?

²⁸ Chule Israel phung jouse-a kona kathempu hiding, ka-maicham chunga thilto ding, gimnamtui halding, chule kamasanga thempu boitong sangkhol kivon dinga kana lhendoh hilouham? Chule Israel chate meija kigou thilpeh jouse napa insung kanapeh hilouham?

²⁹Ipi dinga kaumna-a kathupeh kaganlhaina le kathilto napeh manga, kami Israelte thilpeh jouse-a kon ahoipen chun nathao dohsah nadinga keisanga nachapateni najabol joh ham?

³⁰Hijeh chun Pakai Israel Pathen'in, Keiman nangma insungle napa insungchu a-imatih chana kamasanga vahle diu ahi, tia anasei ahin: ahinla tun Pakaiyin, Hichu keija konin gamla tahen; ajehchu eijabol ho chu kajabol ding, chule nahsah louva eibolho chu nahsah louva kabolding ahi, ati.

³¹Vetan, na-insunga tehse khatcha aumlouna dinga, nangma ban le napa insung mite ban kasatlhah nading nikhoho chu ahung lhungtai.

³²Chule Kachen namun le Pathen'in Israel apehding gou jouse-a chu melma khat aum namu ding: chule a-imatih chana na-insunga tehse umta louhel ding ahi.

³³Chule ka-maicham'a kona kasatlhah louding namipa chu namitlhi sosah dingle nalungsung suna dinga kakoiding: chule na-inna peng jouse chu adonglai cheh-a thiding ahiuve.

³⁴ Chule hichehohi nachapateni Hopni le Phinehas chunga thil hunglhung dingho namelchihna ahi; nikhat sunga anilhona thilhon ding ahi.

³⁵Chule keiman kalungthim le kangaito dungjuija tongding, keima dinga thempu tahsan umtah khat kitundoh ding: chule keiman a-insung dettah-a katundohpeh ding; chule ama a-itih-a kathaonupa masanga vahle jing ding ahi.

³⁶Chule hung hitiding ahi, na-in'a umnalai chasun chu ahenga hunguva dangka pehkhat le changlhah kamkhat athum diu, ahenga, Changlhah halkhat kaneh theina dingin, thempu natoh khat neipen, tia asei dingu ahi, ati.