Read Thado Chin 1 Samuel 20 Bible Online

1 Samuel 20 - Thado Chin bible

1 Samuel 20

¹Chuin David chu Ramah gam Naioth'a konin ajamin, Jonathan henga ahungin, ajah-a, Ipi kabol am? kakhan gitlouna ipi umam? chule napa anga kachonsetna ipi uma thadinga kahinkho hi aholham? ati.

²Chuin aman ajah-a, Nathi ding chu Pathen'in jahda hen: ven kapan keima hetsah louvin, thil len hihen, thilneo hijongle bolponte. Achutile ipi dinga kapan hicheho chu kakoma a-im dingham? Chutiponte, ati.

³Chuin David akihahsel kitleuvin, Namitmu-a lungsetna kachanhi napan chentah-in ahen; Jonathan'in hichehi hetda maihen, atiloule lungna getninte ati hinte. Ahinla hingjing Pakai le nangma mina pana kasei ahi, keima le thina kikah-a hi kalkhat sehbou uma ahi, ati.

⁴Hichun Jonathan'in David jah-a, Ipi hijongle nahinnan angaichat chanchu, nanga dinga kabolpeh ding nahi, ati.

⁵ Chuin David'in Jonathan jah-a, Ven jingkhu lhathah ni ahin, lengpa toh ankonga thonlouva katoukhom tei ngai ahi; ahinla anithum ni nilhah geija gamlah-a kaga kisel theinadin neisolin.

⁶Napan eiholmona aumhela ahile, David'in akhopi Bethlehem'a gache vahdin kakoma phalna khohtah-in athumin ahi: ajehchu insung pumpi-a dinga kumtin ganlhai chukoma aneiju ahi, tin seijin ati.

⁷Hitia chu aman, Aphai atia ahile, nasohhi lungmona kanei ding; amavang hatah-a alung hana ahileh, thilse angaitoi ti hejengin.

⁸Hijeh-a chu nasoh chunga hi hepina neitah-a na natoh ding ahi; ajehchu nasohhi Pakaiya kitepna naneipi ahitai. Hijeng jongle keima-a khangitlouna aumle, nangmatah in neithat jengin; ipi khoh-a napa henga neipui dingham? ati.

⁹Chuin Jonathan'in, Hichu nanga konin gamlahen: ajehchu kapan nachunga thilse bol agot kahet monga ahile, kahil louding ham? ati.

¹⁰Chuphatnin David'in Jonathan jah-a, Napan setah-in nadonbut tale, kon eihunghil dingham? ati.

¹¹Chuin Jonathan'in David jah-a, Hungin, loujaova chehite, ati. Chuin amani loujao lama achedoh lhontan ahi.

¹²Chuin Jonathan'in David jah-a, Pakai Israel Pathen chu ahetoh ahi! jing nikho, ahiloule nithum nikho hama kapa kadoh teng, David dinga apha ahia, chuteng nahenga mi kasol louva kahetsah louva ahile,

¹³Pakaiyin chutobang chun, chule akhohjo cheh-in Jonathan chunga boljenghen: ahinla nangma bolset dingchu kapa lunglhaina ahia ahile, lhamonga nachethei nadin nahetsah ingting, nasolmang nange. Chule kapa ana umpi bangchun Pakaiyin nangma naumpi hen.

¹⁴Chule kathilouna dinga kahinlai jenga Pakai phatna neimusah ding hilouvin;

¹⁵ A-itih-a dinga ka-insunga kona naphatna nasat tanhel louding ahi. Pakaiyin David melmate aboncha leiset chunga asuhmanghel nung jongle sattanhih helin, ati.

¹⁶Hitichun Jonathan'in David insung toh kitepna asemin, Pakaiyin David melmate chunga phu lahen, ati.

¹⁷Chuin Jonathan'in angailut jeh-in, David chu akihahsel sah kitnin ahi. Ajehchu aman ama hinna angailut bang banga angailut ahi.

¹⁸Hichun Jonathan'in David jah-a, Jing nikho khu lhathah ni ahin; natouna a-on ding jeh-a nakiholmo ding ahi.

¹⁹Chule nithum naum nungteng, nachesuh loija thukhoh aumtengle nakisel jina mun mama-a chu nahung ding, Ezel song panga chu na-umden ding ahi.

²⁰Chule keiman doikhat neibanga thalchang thum hiche panga chu kahinkap ding ahi.

²¹Chule ven, chapang khat kahinsol ding, Chenlang thalchang ho khu gaholdoh-in, katiding ahi. Chule chapang henga chu, Ven, thalchang ho chu nasih hilam panga aume, hinlan kati-a ahile, hung jengin. Ajehchu Pakai hingjing mina kasei ahi, nangma dingin lungmona aumin, setna aumpoi.

²²Ahinla gollhangpa jah-a chu, Ven, thalchang ho chu nakhel lama aume, kati-a ahile; nalampi-a che jengin: ajehchu Pakaiyin nasolmang ahi.

²³Chule nang le kei kikah-a iseidohho jouse chunga chun, ven, Pakai chu nang le kei kikah-a a-itih-in umjing hen, ati.

²⁴Chuti chun David amale ama gamlah-a akiselin: chuin lhathah nikho ahunglhun phatnin, lengpa chu an nedin atou lhatan ahi.

²⁵Chuin lengpa phat dangho bangin atouna chunga atouvin, bangpanga touna-a chun atouve: chuin Jonathan akipatdoh-in, chule Abner chu Saul panga atouvin, David munchu a-ongtan ahi.

²⁶Ahivangin Saul'in hicheni chun imacha aseipoi: ajeh chu aman, Achunga thilkhat tou soh-a thenglou hinte; thonlouva ama thenglou hinte, tia angaito ahi.

²⁷Chuin ajingin ahitin ahi, hichu chuche lha nini channi ahin, David munchu a-ongkit tai. Chuin Saul'in achapa Jonathan jah-a, Jesse chapa chu janhi-a jong, tunia jong ibola hunglou ham? ati.

²⁸Chuin Jonathan'in Saul adonbutnin, David'in Bethlehem'a chenadin hatah-in kakoma phalna athumin:

²⁹Katao ahi, neiche sah-in: ajehchu ka insung miten khopi sunga ganlhaina kaneidiu ahin; chule kasopipan chua umdin eithupeh-in ahi: chule tun, namitmu-a lungsetna kachana ahile, katao ahi, neichesah inlang kasopite gamunge, atin ahi. Hijeh-a chu lengpa dokhanga hunglou ahi, ati.

³⁰Chuphatnin Jonathan chunga Saul lunghana chu akoujah tan, ajah-a, Nang numei vahvei le golkeh chapa, nangman nangmatah jachat nadingle nanu sagohkeu jachatsah nadinga Jesse chapa chu nalhen ahi kahetlouva nabolham?

³¹Ajehchu Jesse chapa leiset chunga ahinlaisea nangma le nalenggam kiphutdet louding ahi. Hijeh chun tun kahenga din mi gakousah-in, ajehchu ama thiteiding ahi, ati.

³²Chuin Jonathan'in apa Saul adonbutnin, ajah-a, Ipi dinga ama kithat dingham? aman ipi abolem? ati.

³³Chuin Saul'in thadingin teng khatnin akhon ahi. Hichea konchun Jonathan'in apan David thading agotmong ahichu ahetai.

³⁴Hitichun Jonathan chu dokhanga konchun lunghang tah-in akipatdoh-in, chuche lha anini nichun an anetapoi. Ajehchu apan ajachatsah behseh jehchun, David chu alungkhampin ahi.

³⁵Chuin Jingkah-in ahitin ahi, David toh akitep phat tah chun Jonathan chu chapang khat toh apotdoh-in, loujaova chun achetai.

³⁶Chuin aman achapangpa jah-a, Lhaijinlang kathalchang kap ho chu gaholdoh-in atin. Chuin chapangpa chu alhai tolhonin, thalchang khat akal lama chun agah kapmin ahi.

³⁷Chuin chapangpa chun Jonathan'in akapdoh thalchang phung aphah phatnin, Jonathan'in chapangpa jah-a, Thalchang chu nakal peh-a uma hilouham? tin asame.

³⁸Chuin Jonathan'in chapang chu asamin, Kikinnon, gangin, umden hih-in, ati. Chuin Jonathan chapangpa chun thalchang ho chu achom khomin, apu henga ahungtai.

³⁹Ahin chapang pa chun imacha ahepon: Jonathan le David'in bou thil kibolchu ahelhone.

⁴⁰Chuin Jonathan'in amanchahho chapangpa apen, ajah-a, Chenlang khopi-a anapo lutan, ati.

⁴¹Chuin chapangpa achedoh doh-in, David lhanglama munkhatna konin ahung kipatdoh-in, amai tolla asulutnin, thumvei akunin ahi. Chuin khatle khat akichopto lhonin, David'in alhakang kahse chun hatah-in akika lhontan ahi.

⁴²Chuin Jonathan'in David henga, Lung mongin chetan, ajehchu ini-a Pakai mina ikihahsela, Pakai chu kei le nang kah-a, chule kei chilhahle nang chilhah ho kah-a a-itih-in ahetoh hijing tahen tia inasei ahitai, ati. Chuin ama akipatdoh-in achetai. Chule Jonathan jong khopi sunga alut tan ahi.