Read Thado Chin 1 Samuel 21 Bible Online

1 Samuel 21 - Thado Chin bible

1 Samuel 21

¹ Chujouvin David Ahimelech thempu henga Nob'a ahungin ahi. Chule David to akimuto chu Ahimelech akichan, ajah-a, Ipidinga nachangseh nahi hija, koimatoh kilhonlou nahim? ati.

²Chuin David'in Ahimelech thempu jah-a, Lengpan kinkhatna eisola, kajah-a, Keiman kasolna thudol le kathupeh hi koimacha hetsah hih-in, ati ahi. Chule keiman kasohte hilai khulai mun'a chu kasol ahi.

³Hijeh chun tun nakhutna ipi umam? kakhutna changlhah nga ahiloule nakoma um umchu neipen, ati.

⁴Chuin thempu pan David adonbutnin, Kakhutna changlhah lham aumpon, changlhah thengbou aume; gollhangho chu numeija kon beh-a akichintup uva ahile, ati.

⁵Chuin David'in thempu pa chu adonbutnin, ajah-a, Atahbeh-in kahunga pat nithum tobang keiho-a kona numei ho kichomkoi ahin, chule gollhangho belho hi athenga ahi, chule changlhah chu tunia belsunga kisutheng hijongle, gelkhatna alham ahi ati.

⁶ Hitichun thempupan changlhah theng chu apetai; ajehchu khat akilahdoh tengle changlhah sapeh akhela koidinga Pakai angsunga kona kiladoh vetsahna changlhah tailou changlhah ding umlou ahi.

⁷Tun hicheni chun Saul sohte khat hia chun Pakai anga anakihenin; aminchu Doeg ahin, Edom mi Saul ganchingho lah-a apipuipen ahi.

⁸Chuin David'in Ahimelech henga, Nakhutna tengcha ahiloule chemjam umlou ham? ajehchu lengpa thuchu thukin ahijeh-in kachemjam le kagal manchah kahin poman tapoi, ati.

⁹ Chuin thempu pan, Ven, Elah phaichama natha Philistine mipa Goliath chemjam chu hia thempu sangkhol nunga ponin akijelin aume: nadeile hichu kilah-in; ajehchu hiche tailou chu adang aumpoi, ati. Chuin David'in, Chekal lhah chu umding ham; neipe jengin, ati.

¹⁰Chuin David akipatdoh-in, hicheni chun Saul ginna in ajamin, Gath lengpa Achish henga chetai.

¹¹ Chuin Achish sohten ajah-a, Hichehi chuche gam lengpa David hilouham? Mihon achung changa lampuma khat le khat kidonbut to-a la asah uva, Saul'in sangkhat athatnin, David'in sangsom athatne, atiuchu hilouham? atiuve.

¹² Chuin Davidn'in thuhochu alungsunga aching pai jengin, Gath lengpa Achish chu akicha lheh jengtan ahi.

¹³ Hitichun amasanguva achondan khelin, amitnuva chun akingolsah-in, kotpi kotkhah ho ajihpol letlut in, akhamul achun achilche akaisah dehduh-in ahi.

¹⁴Chujouvin Achish'in asohte jah-a, Veuvin, mingol ahi henasa ibola kahenga nahin pui uham?

¹⁵Mingol kangaichat hija, ka-angsunga angolna-a kichem dinga hitobang mihi nahin pui uham? Hitobang miho ka-insunga hunglut diham? ati.